އިސްރާޢީލުން ވެރިވެގަނެފައިވާ ފަލަސްޠީނުގެ ހުޅަނގު އައްސޭރިއަށް ޔަހޫދީ އަސްކަރިއްޔާގެ ސިފައިން އަރައި ހިންގި ލާއިންސާނީ އުދުވާންތަކެއްގައި ފަލަސްޠީނުގެ ޒުވާނެއް ޝަހީދުކޮށްލައިފިއެވެ. ޔަހޫދީ ޓެރެރިސްޓު ސިފައިން އަރައި އުދުވާންތައް ހިންގާފައި ވަނީ ހުޅަނގު އައްސޭރީގެ ބައިތް ލަޙަމްގައެވެ.
ފަލަސްޠީނުގެ ޞިއްޙަތާ ބެހޭ ވުޒާރާއިން ބުނީ ޔަހޫދީ ޖައްބާރު ސިފައިންގެ ޝިކާރައަކަށްވެ ޝަހީދުވެފައި ވަނީ 16 އަހަރުގެ މުޞްޠަފާ އާމިރު ސަބާޙް ކަމުގައެވެ. ޔަހޫދީ ސިފައިން އޭނާގެ ހަށިގަނޑަށް ބަޑިޖަހައި ޝަހީދުކޮށްލާފައި ވަނީ ބައިތް ލަޙަމްގެ ތަޤޫޢުގައެވެ.
ޔަހޫދީ އަސްކަރިއްޔާއިން ބުނީ ސަބާޙަށް ޙަމަލާދީފައި ވަނީ، ބައިތް ލަޙަމްގައި އޮޕަރޭޝަނެއް ހިންގަން އެ ރަށަށް އެރި ސިފައިންނާ ދިމާލަށް ގައު އުކުމުގެ ސަބަބުން ކަމުގައެވެ. ޔަހޫދީ ސިފައިންގެ ޙަމަލާތަކުގައި ފަލަސްޠީނުގެ އިތުރު ބަޔަކު ޒަޚަމުވި ކަމުގައި ރިޕޯޓުތައް ބުނެއެވެ.
އޭޕްރިލް 28 ވަނަ ދުވަހު ވެސް ޔަހޫދީ ސިފައިން ވަނީ ބަޑިޖަހައި ފަލަސްޠީނުގެ އިތުރު މީހަކު ޝަހީދުކޮށްލާފައެވެ. އޭނާއަށް ޙަމަލާދީފައި ވަނީ ބާރު ދުވެލީގައި ދުއްވާފައި ގޮސް ކާރަކުން ޖައްސައި ޔަހޫދީންގެ ބަޔަކަށް ޙަމަލާދޭން އޭނާ މަސައްކަތް ކުރުމުން ކަމުގައި އިސްރާޢީލުގެ އަސްކަރިއްޔާއިން ބުނެއެވެ.
ޔަހޫދީ އަސްކަރިއްޔާއިން މި އަހަރުގެ ތެރޭގައި ފަލަސްޠީނުގެ ބިންތަކަށް އަރައި ގިނަ އުދުވާންތަކެއް ހިންގާފައިވެއެވެ. މި އުދުވާންތަކުގައި ޝަހީދުކޮށްލާފައިވާ ފަލަސްޠީނުގެ ރައްޔިތުންގެ ޢަދަދު މިހާރު ވަނީ 100 އަށް އަރާފައެވެ. މީގެ ތެރޭގައި ގިނައީ ޢާންމުންނެވެ. އަންހެނުންނާއި އުމުރުން ދުވަސްވީ މީހުންނާއި ކުޑަކުދިންނެވެ.