ސޫދާންގެ އަސްކަރިއްޔާއާއި ރެޕިޑް ސަޕޯޓް ފޯސަސް (އާރް.އެސް.އެފް)ގެ ފައުޖުތަކާ ދެމެދު ހިނގަމުންދާ ހަނގުރާމައިގައި މަރުވެފައިވާ މީހުންގެ ޢަދަދު 512 އަށްވުރެ މައްޗަށް އަރާފައިވާ ކަމުގައި އެ ޤައުމުގެ ޞިއްޙަތާ ބެހޭ ވުޒާރާއިން ހާމަކޮށްފިއެވެ. ޙަމަލާ ބަދަލުކުރުން ވަގުތީ ގޮތުން މެދުކަނޑައިލަން ދެ ފަރާތުން އެއްބަސްވެފައިވީ ނަމަވެސް، ވެރިރަށް ޚަރްތޫމާއި ބޮޑެތި އެހެން ރަށްތަކުގެ ދެ ފަރާތުން އަދިވެސް ދަނީ ވަރުގަދައަށް ޙަމަލާ ބަދަލުކުރަމުންނެވެ.
ސޫދާންގެ ޞިއްޙަތާ ބެހޭ ވުޒާރާއިން ބުނީ، މި ހަނގުރާމައިގައި ޒަޚަމުވެފައިވާ މީހުންގެ ޢަދަދު 4,193 އަށް އަރާފައިވާ ކަމުގައެވެ. އަދި، މަރުވެފައިވާ މީހުންގެ ޢަދަދު 500 އަށްވުރެ މައްޗަށް އަރާފައިވާ ކަމުގައި އެ ވުޒާރާއިން ބުނި ނަމަވެސް، ހަޤީޤަތުގައި އެ ޢަދަދު އެއަށްވުރެ އިތުރުވާނެ ކަމަށް ބެލެވޭ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.
ސޫދާންގެ ވެރިރަށް ޚަރްތޫމްގައި ތިބި އެހެން ޤައުމުތަކުން ރައްޔިތުން އެ ޤައުމުން ބޭލުމަށް އެ ޤައުމުތަކުން އަދިވެސް މަސައްކަތް ކުރަމުންދާއިރު، ސޫދާންގެ އަސްކަރީ މަތިންދާބޯޓުތަކުން ދަނީ ހުއްޓުމެއް ނެތި އާރް.އެސް.އެފްގެ ފައުޖުތަކުގެ އަމާޒުތަކަށް ޙަމަލާ ދެމުންނެވެ. ސޫދާންގައި ތިބި ތުރުކީވިލާތުގެ ރައްޔިތުން ސަލާމަކުރުމުގައި މަސައްކަތުގައި ހަރަކާތްތެރިވި އެ ޤައުމުގެ އަސްކަރީ މަތިންދާބޯޓަކަށް ވެސް ޙަމަލާދީފައިވާ ކަމުގައި އެ ޤައުމުން ބުނެއެވެ.
ޚަރްތޫމްގެ އިތުރުން ސޫދާންގެ ހުޅަނގުގައި އޮންނަ ހަމަނުޖެހުން ބޮޑު ދާރްފޫރްގައި ވެސް ދެ ފަރާތުގެ ފައުޖުތަކުން ދަނީ ހަނގުރާމަ ކުރަމުންނެވެ. ދާރްފޫރުގެ ރަށެއް ކަމުގައިވާ އަލް ޖެނީނާގައި ޢާންމުންގެ ގިނަ ޢަދަދެއްގެ ބަޔަކު މަރުވެފައިވާ ކަމުގައި އ.ދއިން ބުނެއެވެ.
ސޫދާންގެ ހަމަނުޖެހުންތައް ހަނގުރާމައަކަށް ބަދަލުވީ އާރް.އެސް.އެސްގެ އިސްވެރިޔާ ޖެނެރަލް މުޙައްމަދު ހަމްދާން ދަގަލޯގެ ފައުޖުތަކުން ވެރިރަށް ޚަރްތޫމަށް އަރައި އެ ޤައުމުގެ ރިޔާސީ ގަނޑުވަރާއި އަސްކަރިއްޔާގެ އިސްވެރިޔާ ޖެނެރަލް ޢަބްދުލް ފައްތާޙް އަލް-ބުރްހާންގެ ގެކޮޅު ހިސާރުކުރަން މަސައްކަތް ފެށުމުންނެވެ. އެއީ އޭޕްރިލް މަހުގެ 15 ވަނަ ދުވަހެވެ.
ދެ ފަރާތުގެ ދެމެދުގައި ޙަމަލާ ބަދަލުކުރުންތައް މެދުކަނޑައިލަން އެމެރިކާއާއި، ސަޢޫދީ ޢަރަބިއްޔާއާއި، އެފްރިކާގެ އިއްތިހާދު (އޭ.ޔޫ)އާއި، އ.ދއިން ދަނީ މަސައްކަތް ކުރަމުންނެވެ. ޙަމަލާ ބަދަލުކުރުން މެދުކަނޑައިލަން ދެ ފަރާތުން އެއްބަސްވެފައިވީ ނަމަވެސް، ދެ ފަރާތުގެ ފައުޖުތަކުން އަދިވެސް ދަނީ ހަނގުރާމަ ކުރަމުންނެވެ.