އީރާނުގެ ރައީސް އިބްރާހީމް ރައީސީ ސޫރިޔާއަށް ދަތުރުފުޅެއް ކުރެއްވުމަށް ހަމަޖެހިފައިވާ ކަމުގައި އީރާނުން ހާމަކޮށްފިއެވެ. އީރާނުގެ ޚާރިޖީ ވަޒީރު ޙުސައިން އާމިރު-ޢަބްދުاللهހިއަނާ ހަވާލާދީ ސޫރިޔާގެ އަލް-ވަޠަން ނޫހުން ބުނީ ކުރިއަށް އޮތް ހަފުތާގެ ބުދަ ދުވަހު ރައީސީ ސޫރިޔާއަށް ވަޑައިގެންނެވުމަށް ހަމަޖެހިފައިވާ ކަމުގައެވެ. މިއީ، ސޫރިޔާގެ ދާޚިލީ ހަނގުރާމަ ފެށި ފަހުން އެ ޤައުމަށް ކުރައްވާ ފުރަތަމަ ދަތުރުފުޅެވެ.
ރައީސީ ސޫރިޔާއަށް ވަޑައިގަންނަވަން ހަމަޖެހިފައި މި ވަނީ ސަރަޙައްދީ ހަމަޖެހުން ގާއިމުކުރުމަށް ދެ ޤައުމުން ކުރަމުންދާ މަސައްކަތްތަކާ ގުޅޭ ގޮތުން މަޝްވަރާކުރުމަށް ކަމުގައި ޢަބްދުހިاللهއަން ވިދާޅުވިއެވެ. އަދި، ދެ ޤައުމުގެ ދެމެދުގައި އޮތް ގާތް ގުޅުންތައް އިތުރަށް ބަދަހިކުރުމަށް ކަމުގައި ވެސް އޭނާ ވިދާޅުވިއެވެ.
12 އަހަރަށް ދެމިގެންދިޔަ ސޫރިޔާގެ ދާޚިލީ ހަނގުރާމައިގައި އީރާނުން ވަނީ އެ ޤައުމަށް އަސްކަރީ ދާއިރާއިންނާއި މާލީ ގޮތުން އެހީތެރިކަން ފޯރުކޮށްދީފައެވެ. ސޫރިޔާގެ ސަރުކާރާ ދެކޮޅަށް ތެދުވެ ހަނގުރާމަކުރި ފަރާތްތަކާ ދެކޮޅަށް މަސައްކަތްކުރުމުގައި އެހީތެރިކަން ފޯރުކޮށްދިނުމަށް އީރާނުން ވަނީ އެ ޤައުމުގެ އަސްކަރީ މުޝީރުން ސޫރިޔާއަށް ފޮނުވާފައެވެ.
ރައީސީ ސޫރިޔާއަށް ވަޑައިގަންނަވަން ހަމަޖެހިފައި މި ވަނީ މެދުއިރުމަތީގެ ދެ ބާރު ކަމުގައި ބެލެވޭ އީރާނާއި ސަޢޫދީ ޢަރަބިއްޔާއާ ދެމެދު ގުޅުންތައް ބަދަހިކުރަން ފަށާފައިވާ ދަނޑިވަޅެއްގައެވެ. އަދި، ސޫރިޔާއާއި ޢަރަބި ދުނިޔޭގެ ޤައުމުތަކާ މެދު ކެނޑިފައި އޮތް ގުޅުންތައް އަލުން އިޔާދަކުރަން މަސައްކަތް ކުރަމުންދާ ވަގުތެއްގައެވެ. އޭނާގެ ދަތުރުފުޅުގެ ސަބަބުން މެދުއިރުމަތީގެ ގުޅުންތައް ރަނގަޅުކުރަން އިތުރު ދޮރުތަކެއް ހުޅުވިގެންދާނެ ކަމުގައި ޢަބްދުހިاللهއަން ވިދާޅުވިއެވެ.
ސޫރިޔާގެ ރައީސް ބައްޝާރް ހާފިޛް އަލް-އަސަދު ވެސް ވަނީ ހުސްވި 2022 ވަނަ އަހަރުގެ މޭ މަހުގެ ތެރޭގައި ތެހެރާނަށް ވަޑައިގަންނަވާފައެވެ. އެއީ، 2011 ވަނަ އަހަރު ސޫރިޔާގެ ދާޚިލީ ހަނގުރާމަ ފެށި ފަހުން އޭނާ ތެހެރާނަށް ވަޑައިގެންނެވި ދެވަނަ ފަހަރެވެ. ޢަބްދުاللهހިއަން ވަނީ ޖަނަވަރީ މަހުގެ ތެރޭގައި ދިމިޝްޤަށް ވަޑައިގަންނަވާފައެވެ.
އީރާނުގެ ރައީސަކު އެންމެ ފަހުން ސޫރިޔާއަށް ދަތުރުފުޅެއް ކުރައްވާފައި ވަނީ 2010 ވަނަ އަހަރެވެ. އެއީ އީރާނުގެ ކުރީގެ ރައީސް މަޙްމޫދު އަޙްމަދީނެޖާދެވެ. ސޫރިޔާގެ ދާޚިލީ ހަނގުރާމައިގައި އަސަދުގެ ސަރުކާރަށް އެންމެ ބޮޑަށް އެހީތެރިކަން ފޯރުކޮށްދީފައިވާ ޤައުމުތަކުގެ ތެރޭގައި އީރާނާއި ރަޝިޔާ ހިމެނެއެވެ. ސޫރިޔާގެ ދާޚިލީ ހަނގުރާމައިގައި 500,000 އަށްވުރެ ގިނަ މީހުން މަރުވެ، އެތަކެއް މިލިޔަން މީހުން ހާލުގައި ޖެހުނެވެ.