އިންޑޮނީޝިޔާގެ ހުޅަނގުގައިވާ ރިޔާއޫ ޕުރޮވިންސުގެ އައްސޭރިފަށުގައި ދަތުރުކުރަމުންދިޔަ ބޯޓެއް ބަންޑުންޖަހައިލާ 11 މީހުން މަރުވެއްޖެއެވެ. މި ހާދިސާގައި މަރުވި މީހުންގެ ތެރޭގައި ގިނައީ އަންހެނުންނާއި ކުޑަކުދިންނެވެ. ބަންޑުންޖަހައިލާފައިވާ ބޯޓަކީ ޓެމްބިލަހަން ބަނދަރުން ފުރައިގެން ރިޔާއޫ ޕުރޮވިންސުގެ ޓަންޖުންގް ޕިނޭންގަށް ދަތުރުކުރި ބޯޓެކެވެ.
މި ހާދިސާ ހިނގި ވަގުތު ބޯޓުގައި 74 ފަސިންޖަރުން ތިއްބެވެ. ބޯޓު ބަންޑުންޖަހައިލާ އެންމެން ކަނޑުވި އިރު، 62 މީހުން ވަނީ ސަލާމަތްކޮށްފައެވެ. މަރުވެފައިވާ 11 މީހެއްގެ ހަށިގަނޑު މިހާތަނަށް ހޯދިފައިވާއިރު، ގެއްލިފައިވާ ކަމަށް ބެލެވޭ އިތުރު މީހެއްގެ ހަށިގަނޑު ހޯދުމަށް އޮފިޝަލުން އަދިވެސް ދަނީ މަސައްކަތް ކުރަމުންނެވެ.
ޓެމްބިލަހަން ބަނދަރަކީ ރިޔާއޫ ޕުރޮވިންސާ 198 ކިލޯމީޓަރު ދުރުގައި އޮންނަ ރަށެކެވެ. ބޯޓު ބަންޑުންޖަހައިލަން މެދުވެރިވި ސަބަބު ދެނެގަތުމަށް އޮފިޝަލުން ދަނީ ތަހުޤީޤު ކުރަމުންނެވެ. "އެވެލިން ކެލިސްޓާ 1"ގެ ނަންދީފައިވާ ބޯޓުގައި 74 އަށްވުރެ ގިނަ މީހުން ދަތުރުކޮށްފައިވުމަކީ އެކަށީގެންވާ ކަމެއް ކަމުގައި ވެސް އޮފިޝަލުން ވިދާޅުވެއެވެ.
17,000 އަށްވުރެ ގިނަ ރަށުގެ މައްޗަށް އެކުލެވިގެންވާ އިންޑޮނީޝިޔާގެ ކަނޑުމަތީގެ ހާދިސާތައް ގިނަކަން ފާހަގަކުރެވެއެވެ. މި ފަދަ ހާދިސާތައް ގިނަވާ އެއް ސަބަބަކީ ސަލާމަތީ ފިޔަވަޅުތަކަށް އިހުމާލުވުމެވެ. 2018 ވަނަ އަހަރު މި ފަދަ ފެރީއެއް ބަންޑުންޖަހައިލި ހާދިސާއެއްގައި 150 ވަރަކަށް މީހުން މަރުވިއެވެ. އެ ފެރީ ފެތިފައި ވަނީ ސުމާޓްރާ އައިލެންޑްގައި އޮންނަ ދުނިޔޭގެ އެންމެ ފުން އެއް ފެންގަނޑަށެވެ.