ހުރިހާ ޤައުމެއްގައިވެސް ބޭނުންކުރާ، ނަމަވެސް އެއްގޮތް ސިފަތައް ހުންނަ ހަމައެކަނި ދައުލަތުގެ ލިޔުމަކީ އެ ޤައުމެއްގެ ޕާސްޕޯޓެވެ. ޕާސްޕޯޓަކީ ބައިނަލްއަޤްވާމީ އުސޫލުތަކެއްގެ ތެރެއިން ބޭނުންކުރާ ކޮން ޤައުމެއްގެ ކާކުކަން އަންގައިދޭ އައިޑެންޓިޓީއެއް ނުވަތަ ލިޔުމެކެވެ. އެކި ޤައުމުތަކަށް ދަތުރުކުރާއިރު އަތުގައި އޮންނަ ޕާސްޕޯޓަކީ ބާރުގަދަ ޕާސްޕޯޓަކަށްވާނަމަ ދަތުރުކުރުމުގައި އެއްވެސް ދައްޗެއް ކުރިމައްޗެއް ނުވާނެއެވެ. އަދި އެކަމުގެ ސަބަބުން ލިބޭ ފަސޭހަތަކާއި ލުއިތައްވެސް އިތުރުވާނެއެވެ.
އެކި ޤައުމުތަކުގެ ޕާސްޕޯޓްތަކުގެ ބާރުގަދަކަން ނުވަތަ ދަތުރުކުރުމަށް ލިބޭ ފަސޭހަތައް ބެލުމަށް މިންގަނޑުތަކެއް ހުރެއެވެ. އެގޮތުން ޕާސްޕޯޓް ބޭނުންކޮށްގެން ވީޒާ ނެތި ނުވަތަ ފަސޭހަކަމާއިއެކު ވަދެވޭ ޤައުމުތަކުގެ ނިސްބަތަށް ބަލައިގެން، ނެރޭ ހެންލީ ޕާސްޕޯޓު އިންޑެކްސްއަކީ ދުނިޔޭގެ އެންމެ ބާރުގަދަ ޕާސްޕޯޓްތަކާއި އެންމެ ނިކަމެތި ޕާސްޕޯޓްތައް އެނގޭނެ ތަފާސް ހިސާބުތަކެކެވެ.
ހެންލީ ޕާސްޕޯޓު އިންޑެކްސްއިން ދައްކާގޮތުން ދިވެހި ޕާސްޕޯޓަކީ ދެކުނު އޭޝިޔާ ސަރަހައްދުގައިވެސް ބޭނުންކުރާ އެންމެ ބާރުގަދަ ޕާސްޕޯޓެވެ. ދިވެހި ޕާސްޕޯޓްގެ މޮބިލިޓީ ސްކޮރ ނުވަތަ ޕާސްޕޯޓް ހިފައިގެން ދަތުރުކުރެވޭ ޤައުމުތަކުގެ އަދަދު އުޅެނީ 90 އަށްވުރެ އިތުރެވެ. އަދި އެންމެ ބާރުގަދަ ޕާސްޕޯޓްގެ ލިސްޓުގައި ރާއްޖެ އުޅެނީ ތައިލެންޑާއި، އިންޑިއާ އަދި ޗައިނާފަދަ ކުރިއަރާފައިވާ ޤައުމުތަކަށްވުރެ ކުރީގައެވެ.
މީގެ 5 އަހަރު ކުރިއަށް ބަލާލާއިރު 2017 ވަނަ އަހަރު ދިވެހި ޕާސްޕޯޓް ހިފައިގެން ދަތުރުކުރެވެނީ 75 ޤައުމަކަށެވެ. ބާރުގަދަ ޕާސްޕޯޓްތަކުގެ ލިސްްޓުގައި ރާއްޖެ އޮތީ 56 ވަނައިގައެވެ. ނަމަވެސް މިއަދު މަންޒަރު ވަރަށް ތަފާތުކަން އަދަދުތަކަށް ބަލާލުމުން ފެނެއެވެ.
މިއަހަރު އާއްމުކޮށްފައިވާ ހެންލީ ޕާސްޕޯޓު އިންޑެކްސްގައިވާ ގޮތުން ދިވެހި ޕާސްޕޯޓް ހިފައިގެން 94 ޤައުމަކަށް ދުރާލާ ވީޒާ ނުނަގައި ދަތުރުކުރެވޭނެއެވެ. އެއާއެކު ޕާސްޕޯޓް ޕަވަރ ރޭންކް ނުވަތަ ބާރުގަދަ ޕާސްޕޯޓްތަކުގެ ލިސްޓުގައި ރާއްޖެ އުޅެނީ މެދުއިރުމަތީގެ މުއްސަނދި ޤައުމެއްކަމަށްވާ އޮމްނާއެކު ލިސްޓުގެ 48 ވަނައިގައެވެ. މިިދިޔަ އަހަރު ރާއްޖެ އޮތީ 50 ވަނަގައެވެ. އެހެންކަމުން މިއީ މިދިޔަ އަހަރާއި އަޅާބަލާއިރު 2 ދަރަޖައިގެ އިތުރުވުމެކެވެ.
ދިވެހި ޕާސްޕޯޓާއެކު ދުރާލާ ވިސާ ނުލައި ދެވޭ 94 ޤައުމުގެ ތެރެއިން 50 ޤައުމަކަށް ވީޒާއާ ނުލައި ދަތުރުކުރެއެވެ. 40 ޤައުމަކުން އޮންއެރައިވަލް ވީޒާ ނުވަތަ އެ ޤައުމަކަށް ދިއުމުން ވީޒާ ހަމަޖެހެއެވެ. އަދި 2 ޤައުމަކުން އިލެކްޓްރޯނިކް ޓެރެވަލް އޮތޯރައިޒޭޝަން، އީޓީއޭ ނުވަތަ ކުޑަވަގުތުކޮޅެއްގެ ތެރޭގައި އޮންލައިންކޮށް ވީޒާ ހަމަޖެހެއެވެ. ޖުމްލަކޮށް ބަލާނަމަ ދިވެހި ޕާސްޕޯޓާއެކު ދުނިޔޭގެ 47 އިންސައްތަ ނުވަތަ ދެބައިކުޅައެއްބަޔާއި ގާތްކުރާ އަދަދެއްގެ ޤައުމަކަށް ދުރާލާ ވީޒާ ނުނަގައި ދަތުުރުކުރެވޭނެއެވެ.
ސަރަހައްދީ ޤައުމުތަކާއި އަޅާބަލާއިރު ދިވެހި ޕާސްޕޯޓާއި އަރާހަމަކޮށްލެވޭނެ ޕާސްޕޯޓެއް ނެތެވެ. ވިޒާ ނުލައި ދިވެހި ޕާސްޕޯޓާއެކު 94 ޤައުމަކަށް ދަތުރުކުރެވޭއިރު، އިންޑިއާ ޕާސްޕޯޓުގައި ދަތުރުކުރެެވެނީ 70 ޤައުމަކަށެެވެ. ބޫޓާން 66، ސްރީލަންކާ 54، ނޭޕާލް 54، ބަންގްލަދޭޝް 48، ޕާކިސްތާނު 45 އަދި އަފްޣާނިސްތާނަށް ޕާސްޕޯޓްގައި ދެވެނީ 39 ޤައުމަކަށެވެ.
މިދިޔަ 5 އަހަރުތެރޭގައި 20 ވަރަކަށް ޤައުމަށް ދުރާލާ ވީޒާ ނުނަގައި، ފަސޭހަކަމާއެކު ދަތުރުކުރެވޭނެ އިންތިޒާމް ވަނީ ހަމަޖެހިގެން ގޮސްފައެވެ. މިއީ ހަމަޤައިމުވެސް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ގެންގުޅުއްވާ ހުޅުވާލެވިފައިވާ، އަދި ވަކި ފަރާތަކަށް ނުޖެހޭ ހާރިޖީ ސިޔާސަތުގެ ސަބަބުން ލިބެމުންދާ ކުރިއެރުމާއި ތަރައްޤީއެވެ. ބާރުގަދަ ޕާސްޕޯޓެއް ދިވެހިންގެ އަތުގައި އޮތުމަކީ ހާރިޖީ ސިޔާސަތުގެ ކާމިޔާބީވެސް ރަމްޒުކޮށްދޭ ހެއްކެކެވެ.
ނަމަވެސް ޤައުމުތަކާއެކު ޚާރިޖީ ގުޅުން ހަރުދަނާކުރަނީ އެ ގުޅުންތަކުގެ ސަބަބުން، ރައްޔިތުންނަށް ފައިދާއާއި ލާބަ ލިބޭނެކަން ކަށަވަރު ކޮށްގެން، ރާއްޖޭގެ އަމިއްލަ މިނިވަންކަމާއި ސިޔާދަތު ފުރިހަމައަށް ރައްކާތެރިކުރުމާއެކު ކަމުގެ ޔަގީންކަން ސަރުކާރުން ރައްޔިތުންނަށް އަރުވައެވެ.