އެކި ކުށްކުށުގައި މީހުން ބަންދުކޮށްފައި ތިބޭ ތަންތަނަކީ އާއްމުކޮށްވެސް ހޫނު ތަންތަންކަމުން، މިފަދަ ހޫނު ދުވަސްވަރެއްގައި އެތަންތަނުގެ ފިނި ހޫނުމިނަށް ޚާއްސަ ސަމާލްކަމެއް ދިނުމަށް ހިއުމަން ރައިޓްސް ކޮމިޝަން އޮފް ދި މޯލްޑިވްސްއިން ތަންފީޒީ އިދާރާތަކަށް އަންގަވައިފިއެވެ.
އެޗްއާރްސީއެމްއިން ނެރެފައިވާ ނޫސްބަޔާނެއްގައި ވިދާޅުވީ މިއަހަރު ރާއްޖެއަށް އާދަޔާ ޚިލާފައި ހޫނު ގަދަވެފައިވާކަން މޫސުމާބެހޭ ޤައުމީ އިދާރާއިން ހާމަކުރައްވާފައިވާކަމަށެވެ. އެގޮތުން މާލެ ހިމެނޭ ސަރަހައްދުގައިވެސް އިޙުސާސުކުރެވޭ ހޫނުމިން 43 ޑިގްރީ ސެސްލިއަސްއާ ހަމައަށް މަތިވެފައިވާކަމަށް މެޓް އޮފީހުގެ މަޢުލޫމާތުން ފާހަގަވާކަމަށް އެޗްއާރުސީއެމްއިން ބުނެއެވެ.
ކަރެކްޝަންސް އަދި ފުލުހުންގެ ބެލުމުގެ ދަށުން މީހުން ބަންދުގައި ބައިތިއްބާ ތަންތަނުގައި އާއްމު ދުވަސްތަކުގައިވެސް ހޫނު ގަދަކަން ފާހަގަވާކަމަށް އެޗްއާރްސީއެމްގެ ބަޔާނުގައިވެއެވެ. އަދި ގޮޅިތަކުގައި ވައި ދައުރުވުމުގެ މައްސަލަތައްވެސް އެ ކޮމިޝަނުން ފާހަގަކުރެއެވެ.
އެހެންކަމުން މިދުވަސްވަރު އާދަޔާއި ޚިލާފަށް ހޫނު ގަދަކަން މެޓް އޮފީހުންވެސް ހާމަކޮށްފައިވާތީ، ތަންފީޒީ އިދާރާތަކުން އެކަމަށް ޚާއްސަ ސަމާލުކަމެއް ދިނުމަށް އެޗްއާރްސީއެމްއިން ވަނީ އަންގާފައެވެ.
އެގޮތުން ޖަލުތަކާއި، ޖުވެނައިލް ޑިޓެންޝަން ސެންޓަރ، އިމިގްރޭޝަން ޑިޓެންޝަން ސެންޓަރ، ދިވެހި ފުލުހުންގެ ބެލުމުގެ ދަށުން ހިންގާ ކަސްޓޯޑިއަލް ޖަލުތަކާއި ނެޝަނަލް ރީ-އިންޓަގްރޭޝަން ސެންޓަރާއި މާލޭގައި އަތޮޅުތަކުގެ ޕޮލިސް ސްޓޭޝަންތަކުގައި މީހުން ބަންދުކޮށް ބެހެއްޓުމުގައި މިކަމަށް ސަމާލްވުމަށް ވަނީ އަންގާފައެވެ. އަދި މުވައްސަސާތަކުގެ ކެރި ފޯރުންތެރިކަން ހުރި މިންވަރަކުން، ގޮޅިތައް އިތުރަށް ހޫނުވިޔަ ނުދިނުމަށް ހަމަޖައްސަންޖެހޭ އެންމެހާ އިންތިޒާމުތައް ހަމަޖެއްސުމަށް އެދި މޯލްޑިވްސް ކަރެކްޝަނަލް ސަރވިސް އަދި ދިވެހި ފުލުހުންގެ ޚިދުމަތަށް، ހިއުމަން ރައިޓްސް ކޮމިޝަން އޮފް ދި މޯލްޑިވްސްއިން ވަނީ އަންގާފައެވެ.
މިއަހަރުގެ އެކި ދުވަސްވަރު ހޫނު ގަދަވާނެކަމަށްވެސް މެޓުން ލަފާކުރެއެވެ.