ނިއުކްލިޔަރ ހަތިޔާރު ބޭނުންކޮށްފިނަމަ އުތުރު ކޮރެޔާގެ ސަރުކާރު ވައްޓައިލާނެކަމުގެ އިންޒާރުދީފި
އުތުރު ކޮރެޔާއިން ނިއުކްލިޔަރ ހަތިޔާރު ބޭނުންކޮށްފި ނަމަ އެ ޤައުމުގެ ސަރުކާރު ވައްޓައިލާނެ ކަމުގެ އިންޒާރު އެމެރިކާއާއި ދެކުނު ކޮރެޔާއިން ދީފިއެވެ. އެމެރިކާއާއި ދެކުނު ކޮރެޔާއިން މި ގޮތަށް އިންޒާރުދީފައި ވަނީ ދެކުނު ކޮރެޔާގެ ރައީސް ޔޫން ސުކް ޔޯލް މިހާރު އެމެރިކާއަށް ކުރައްވަމުން ގެންދަވާ ދަތުރުފުޅުގެ ތެރެއިން އެ ޤައުމުގެ ރައީސް ޖޯ ބައިޑަނާ އެކު ބޭއްވެވި ބައްދަލުވުމެއްގައެވެ.
ވައިޓް ހައުސްގެ އޯވަލް އޮފީހުގައި ބޭއްވި މަޝްވަރާތަކަށް ފަހު ދެ ބޭފުޅުން ވިދާޅުވީ، އުތުރު ކޮރެޔާއިން ނިއުކްލިޔަރ ހަތިޔާރު ބޭނުންކޮށްގެން ޙަމަލާއެއްދީފި ނަމަ، އެ ޤައުމާ ދެކޮޅަށް ނިއުކްލިޔަރ ހަތިޔާރު ބޭނުންކުރާނެ ކަމުގައެވެ. އަދި، އުތުރު ކޮރެޔާގެ ނުރައްކާތަކުން ދެކުނު ކޮރެޔާ ސަލާމަތް ކުރުމުގައި އެމެރިކާއިން ދެމި އޮންނާނެ ކަމުގައި ބައިޑަން ވިދާޅުވިއެވެ.
"އެމެރިކާ ނުވަތަ އެމެރިކާގެ އެކުވެރިއަކާ ދެކޮޅަށް އުތުރު ކޮރެޔާއިން ނިއުކްލިޔަރ ޙަމަލާއެއް ދީފިނަމަ، އެ ޤައުމުގައި އެ ވަގުތަކު އޮތް ސަރުކާރެއް ނިމުން ގެންނާނަން،" އުތުރު ކޮރެޔާއަށް އިންޒާރު ދެއްވަމުން ބައިޑަން ވިދާޅުވިއެވެ.
ޔޫން ވިދާޅުވީ، އޭނާ އެންމެ ބޮޑު އިސްކަމެއް ދެއްވަނީ ސަރަޙައްދީ ސުލްޙަމަސަލަސް ކަން ދެމެހެއްޓުމަށް ކަމުގައެވެ. ނަމަވެސް، އުތުރު ކޮރެޔާއިން ދެކުނަށް ޙަމަލާއެއް ދީފި ނަމަ، އެ ޤައުމުގެ ދިފާޢުގައި އެމެރިކާއިން ތެދުވާނެ ކަމުގެ ޔަގީންކަން ބައިޑަން ދެއްވާފައިވާ ކަމުގައި ވެސް އޭނާ ވިދާޅުވިއެވެ. އަދި، އުތުރު ކޮރެޔާއާ ދެކޮޅަށް ނިއުކްލިޔަރ ހަތިޔާރު ބޭނުންކުރަން އެމެރިކާއިން ފަސް ނުޖެހޭނެ ކަމުގައި ވެސް އޭނާ ވިދާޅުވިއެވެ.
މީގެ އިތުރުން، ދެކުނު ކޮރެޔާގެ ސަލާމަތާއި ރައްކާތެރިކަން ކަށަވަރު ކުރުމަށް އެމެރިކާއާ ގުޅިގެން މަސައްކަތް ކުރުމަށް ވެސް ދެ ބޭފުޅުން ވަނީ އެއްބަސްވެ ވަޑައިގަންނަވާފައެވެ. މި ގޮތުން، ދެ ޤައުމުގެ ދެމެދުގައި ޖާސޫސީ މަޢުލޫމާތު ހިއްސާކުރުމާއި، މަޢުލޫމާތު ބަދަލުކުރުން ހިމެނެއެވެ. އަދި، ދެ ޤައުމުގެ ދެމެދުގައި އަސްކަރީ ދާއިރާއިން ގުޅުން ބަދަހިކުރުމާ ގުޅޭ ގޮތުން ވެސް ދެ ބޭފުޅުން ވަނީ މަޝްވަރާ ކުރައްވާފައެވެ.
ޔޫން އެމެރިކާއަށް ވަޑައިގަންނަވާފައި މި ވަނީ އުތުރު ކޮރެޔާއިން ހުއްޓުމެއް ނެތި އ.ދގެ ސަލާމަތީ މަޖިލީހުގެ ޤަރާރުތަކާ ޚިލާފަށް މިސައިލް ޓެސްޓުތައް ހަދަމުންދާ ދަނޑިވަޅެއްގައެވެ. މި ފަދަ ކޮންމެ ޓެސްޓަކާ އެކު، ދެކުނު ކޮރެޔާގެ އިތުރުން ޖަޕާނުގެ ރައްޔިތުންނަށް ވެސް އިތުރު ބިރުވެރިކަމަކާ ކުރިމަތިލާން ޖެހެއެވެ. ބައެއް މިސައިލްތައް ވެއްޓިފައި ވަނީ ޖަޕާނުގެ އިޤްތިޞާދީ ކަނޑުގެ ސަރަޙައްދު ކައިރިއަށެވެ.
އުތުރު ކޮރެޔާއިން ޓެސްޓު ކުރި އިންޓަރކޮންޓިނެންޓަލް ބެލިސްޓިކް މިސައިލް (އައި.ސީ.ބީ.އެމް)އެއް ޖަޕާނުގެ މަތިން ވެސް ދަތުރުކޮށްފައިވެއެވެ. އެ ޤައުމުން ވަނީ ހަކަތައިގެ ގޮތުގައި ސޮލިޑް-ފިޔުލް އަންދާ އައި.ސީ.ބީ.އެމެއް ވެސް މި ހިނގާ އޭޕްރިލް މަހުގެ ތެރޭގައި ޓެސްޓުކޮށްފައެވެ.
އުތުރު ކޮރެޔާގެ މި ފަދަ އަމަލުތަކާ ގުޅިގެން ސަރަޙައްދީ ހަމަޖެހުމާއި ސަލާމަތަށް ހުރަސްއެޅިފައިވާއިރު، ދެކުނު ކޮރެޔާއިން ދަނީ އެމެރިކާއާ އެކު އޮތް ގުޅުންތައް އިތުރަށް ހަރުދަނާ ކުރަމުންނެވެ. އަދި، ޖަޕާނާ އެކު އޮތް ކިލަނބުވެފައިވާ ގުޅުންތައް ރަނގަޅު ކުރަން ވެސް ދެކުނު ކޮރެޔާއިން ދަނީ މަސައްކަތް ކުރަމުންނެވެ.