ކޮމަންވެލްތުން ރާއްޖެއާ މެދު ގޮތެއް ނިންމެވިއިރު، ފިޔަވަޅުނޭޅީ އަވައްޓެރި އިންޑިއާއާއި ޕާކިސްތާނުން ރާއްޖޭގެ ދިފާޢުގައި ކުރި މަސައްކަތުގެ ސަބަބުންކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ތިލަދުންމަތީ އުތުރުބުރީ އުތީމު ބަނދަރު ހުޅުއްވައިދެއްވައި ވާހަކަފުޅު ދައްކަވަމުންނެވެ. މި ރަސްމިއްޔާތުގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ، އދ. ފިޔަވައި އެންމެ މުހިންމު ޖަމްޢިއްޔާއަކީ ކޮމަންވެލްތު ކަމަށާއި، ކޮމަންވެލްތުން ފިޔަވަޅު އެޅިނަމަ އެކަމުގެ ގެއްލުން ރާއްޖޭގެ ހުރިހާ ދިމާއަކުން އުފުލާނެކަމަށެވެ.
އިސްލާމް ދީނާއި ރާއްޖޭގެ މިނިވަންކަމަށް އެންމެ ވަރުގަދަ ޖިހާދެއް ކުރެއްވިކަމަށް ތާރީޚުން އެނގެން އޮތް ބޮޑުތަކުރުފާނުގެ އުފަން ރަށް، އުތީމުގައި ހުންނަވައި ވާހަކަފުޅުދައްކަވަމުން ރައީސް ވިދާޅުވީ، މީގެކުރިންވެސް އެކި ފަހަރުމަތިން ދިވެހިންގެ މިނިވަންކަން ގެއްލޭފަދަ ކަންތައްތަކެއް ކުރުމަށް ދިވެހިންގެ ބަޔަކު ނިކުމެ މަސައްކަތްތަކެއް ކުރިކަން އެނގެން އެބައޮތްކަމަށާއި މިހާރު ރާއްޖޭގައި އިޔާދަވަމުން މިދަނީ އެފަދަ ކަމެއްކަމަށެވެ. ދިވެހިންނަށް ކުލުނުވެރިކަމެއް އަދި އިޙްސާންތެރިކަމެއް ހުރި މީހަކު ދިވެހިރާއްޖޭގެ ކަންތައްތައް ނިންމުމަށް ބޭރުގެ ފަރާތްތަކަށް ދަޢުވަތު ދީގެން ރާއްޖޭގެ ކަރާމާތާއި، އިސްލާމްދީނަށް ގޮންޖެހުމަށް މަސައްކަތްތެއް ނުކުރާނެކަމަށް ވިދާޅުވިއެވެ. ދިވެހިންނަކީ އިސްލާމް ދީނުގެމަތީ، އެހެން ޤައުމުތަކަށް އިޙްތިރާމްކޮށް، އަވައްޓެރި އަދި ދުރު ޤައުމުތަކާއެކު މަސައްކަތްކުރާ ބައެއްކަމަށް ރައީސް ވިދާޅުވިއެވެ.
އުތީމުގައި ބޭއްވެވި މިރަސްމިއްޔާތުގައި ކުރީގެ ރައީސް މުޙައްމަދު ނަޝީދު ބޭސްފަރުވާއަށް އިނގިރޭސިވިލާތަށް ކުރައްވާ ދަތުރުފުޅަށް އިޝާރާތްކުރައްވައި ރައީސް ވިދާޅުވީ، ރައީސް ނަޝީދުގެ މައިބަދައިގެ އޮޕަރޭޝަނެއް ކުރައްވަން ޖެހިވަޑައިނުގަންނަވާކަން މިހާރު އެނގިވަޑައިގަންނަވާ ކަމަށެވެ. އެ އޮޕަރޭޝަންގެ ބަދަލުގައި މިހާރު ޖެހިވަޑައިގަންނަވަނީ އިންޖެކްޝަނެއް ޖައްސަވަން ކަމަށް ވިދާޅުވިއެވެ. އެހެންކަމުން އެކަން ކުރައްވައިގެން ދިވެހިރައްޔިތުންގެ ގާތަށް އެނބުރި ރާއްޖެ ވަޑައިގަތުމަށް ރައީސް ވަނީ އިލްތިމާސް ކުރައްވާފައެވެ. އަދި ވިދާޅުވީ، ރާއްޖެއިން ބޭރުގައި ހުންނަވައިގެން ކުރައްވާ ކަންކަމުން ގެއްލުން ވަނީ އެމަނިކުފާނަށް އެކަނި ނޫން ކަމަށާއި، މުޅި ޤައުމަށް އެކަމުގެ ގެއްލުމާ ކުރިމަތިލާން ޖެހޭނެކަމަށެވެ. ރާއްޖެއިން ބޭރުން އެހީ ހޯދައިގެން ތަރައްޤީގެ އެތައް މަޝްރޫޢުތަކެއް ހިންގަވާއިރު ބޭރު ޤައުމުތަކުގެ ކުރިމަތީގައި ރާއްޖެއަށް ގެއްލުންވާ ގޮތަށް ޢަމަލުކުރުމަކީ އެއްގޮތަކަށްވެސް އެދެވިގެންވާ ކަމެއް ނޫންކަމަށްވެސް ރައީސް ޔާމީންގެ ވާހަކަފުޅުގައި ފާހަގަކުރެއްވިއެވެ.
ރައީސް ވިދާޅުވީ ރާއްޖޭގައި އިންސާނީ ޙައްޤެއް ގެއްލިގެން އުޅޭކަމަށް ޤަބޫލުފުޅުނުކުރައްވާ ކަމަށާއި، މިއީ ރާއްޖޭގައި ވަކި ބަޔަކަށް ދިމާވަގެން އުޅޭ އުނދަގުލެއް ކަމަށެވެ. އެ އުނދަގޫ މުޅި ދިވެހި އުންމަތަށް އުފުލަންޖެހޭކަމަށް ވާނަމަ އެކަން ކުރާ ބަޔަކީ ދިވެހިންނަށް ޙައްޤުތަކެއް ހޯދައިދޭން މަސައްކަތްކުރާ ބައެއް ނޫންކަމަށް ރައީސުލްޖުމްހޫރިއްޔާގެ ވާހަކަފުޅުގައި ފާހަގަކުރެއްވިއެވެ.