ސޫދާންގެ ވެރިރަށް ޚަރްތޫމްގައި ހުންނަ ޞިއްޙީ ދާއިރާގެ ލެބޯޓްރީއެއް ހަނގުރާމަވެރިންގެ އަތްދަށަށް ގޮސްފައިވާ ކަމުގައި ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ)އިން ބުނެފިއެވެ. ސޫދާނުގައި ހުންނަވާ އެ ޖަމުޢިއްޔާގެ އިސް އޮފިޝަލެއް ކަމުގައިވާ ޑރ ނިމާ ސަޢީދު އާބިދު ވިދާޅުވީ، ހަނގުރާމަވެރިން ލެބޯޓްރީ ހިސާރު ކުރުމަށް ފަހު، އެ ތަނުގައި މަސައްކަތް ކުރާ ޓެކްނީޝަނުން ފޮނުވައިލާފައިވާ ކަމުގައެވެ.
ޚަރްތޫމްގައި ހުންނަ ލެބޯޓްރީ ހިސާރު ކޮށްފައި މި ވަނީ، ސޫދާންގެ އަސްކަރިއްޔާއާއި ރެޕިޑް ސަޕޯޓް ފޯސަސް (އާރް.އެސް.އެފް)ގެ ފައުޖުތަކާ ދެމެދު ފަށާފައިވާ ހަނގުރާމައިގެ ތެރެއިންނެވެ. ނަމަވެސް، އެ ލެބޯޓްރީއަށް ވަދެ އެ ތަން ހިސާރު ކުރީ ކޮން ފަރާތަކުން ކަން އަދި ސާފެއް ނޫނެވެ. އެ ތަނަކީ ގިނަ ޢަދަދެއްގެ ބަޔޮލޮޖިކަލް ސާމާނު ހުރި ތަނެއް ކަމަށާއި، އެ ތަން ހިސާރު ކުރުމުގެ ސަބަބުން ނުރައްކާތެރި ހާދިސާއެއް ހިނގައިފާނެ ކަމުގެ ބިރު ހީވެފައިވާ ކަމުގައި ޑރ ނިމާ ވިދާޅުވިއެވެ.
"މިއީ ވަރަށް ނުރައްކާތެރި ހާލަތެއް. އެ ތަނުގައި ޕޯލިޔޯއާއި މީސްލްސްގެ އިތުރުން ކޮލެރާ ފަދަ ނުރައްކާތެރި ވައިރަސްތައް އެކަހެރިކޮށް، ރައްކާކޮށްފައި ހުންނާނެ. އެ ތަން ހިސާރު ކުރުމާ އެކު، ވަރަށް ނުރައްކާތެރި ހާލަތެއް މި ވަނީ މެދުވެރިވެފައި،" ޑރ ނިމާ ވިދާޅުވިއެވެ. އެ ތަނުން މި ވަގުތު ކަރަންޓުގެ ޚިދުމަތް ވެސް މެދުކެނޑިފައިވާ ކަމުގައި އޮފިޝަލުން ވިދާޅުވެއެވެ.
ދާޚިލީ ހަމަނުޖެހުންތައް ފެށުމުގެ ކުރިން ވެސް ސޫދާންގެ އާބާދީގެ ބޮޑު ބައެއް ދިރިއުޅެމުން ގޮސްފައި ވަނީ ފަޤީރުކަމާއި ބަނޑުހައިހޫނުކަމުގައެވެ. އެއިރު ވެސް، ސޫދާންގެ އާބާދީގެ ތިންބައިކުޅަ އެއްބައި މީހުން، ނުވަތަ 16 މިލިޔަނެއްހާ މީހުން ތިބީ އިންސާނީ އެހީތެރިކަމަށް ބޭނުންވެފައެވެ. އަދި، މިހާރު ފަށާފައިވާ ހަމަނުޖެހުންތަކާ އެކު އެތަކެއް ހާސް ބަޔަކު އެ ޤައުމު ދޫކޮށް ރެފިޔުޖީންގެ ހާލުގައި އެހެން ޤައުމުތަކަށް ހިޖުރަކުރަން ޖެހޭނެ ކަމުގައި އ.ދއިން އަންދާޒާ ކުރެއެވެ.
ސޫދާންގެ އަސްކަރިއްޔާއާއި އާރް.އެސް.އެފްގެ ފައުޖުތަކާ ދެމެދު ހަނގުރާމަ ކުރަން ފަށާފައި ވަނީ އޭޕްރިލް މަހުގެ 15 ވަނަ ދުވަހު ވެރިރަށް ޚަރްތޫމަށް އަރައި ރިޔާސީ ގަނޑުވަރު ހިސާރުކުރަން އާރް.އެސް.އެފުން މަސައްކަތް ފެށުމުންނެވެ. މި ހަނގުރާމައިގައި މިހާތަނަށް 420 އަށްވުރެ ގިނަ މީހުން މަރުވެފައިވާ ކަމުގައި ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ)އިން ބުނެއެވެ. އަދި، 3,000 އަށްވުރެ ގިނަ މީހުން ވަނީ ޒަޚަމުވެފައެވެ.
ސޫދާނުގައި ދާޚިލީ ހަމަނުޖެހުން ހަނގުރާމައަކަށް ބަދަލުވެފައި މި ވަނީ، އަސްކަރިއްޔާގެ އިސްވެރިޔާ ޖެނެރަލް ޢަބްދުލް ފައްތާޙް އަލް-ބުރްހާނާއި އާރް.އެސް.އެފްގެ އިސްވެރިޔާ ޖެނެރަލް މުޙައްމަދު ހަމްދާން ދަގަލޯއާ ދެމެދު އޮތް ވެރިކަމުގެ ތަޅާފޮޅުމުގެ ތެރެއިންނެވެ. އެ ޤައުމުގައި ވެރިކަން ކުރަމުންދާ އިންތިގާލީ ކައުންސިލުގައި އެންމެ އިސް ދައުރެއް އަދާކުރަނީ ޖެނެރަލް އަލް-ބުރްހާނެވެ. އަދި، ދަގަލޯ މަސައްކަތް ކުރަނީ އޭނާގެ ނައިބެއްގެ ގޮތުގައެވެ.