ލީބިޔާގެ އައްސޭރިފަށަށް ބޯޓެއް ފެތުނު ހާދިސާގައި މަރުވި މީހުންގެ ޢަދަދު 34 އަށް އަރައިފިއެވެ. އޭޕްރިލް 19 ވަނަ ދުވަހު ހިނގި މި ހާދިސާގައި ބޯޓު ފެތިފައި ވަނީ ލީބިޔާގެ ވެރިރަށް ތަރާބުލުސްގެ ހުޅަނގުން އޮންނަ ސަބްރާތާގެ އައްސޭރިފަށުގެ ސަރަޙައްދަކަށެވެ. އެ ސަރަޙައްދުގެ ގޮނޑުދޮށުން މަރުވެފައިވާ އިތުރު މީހުންގެ ހަށިތައް ފެންނަމުންދާ ކަމުގައި ލީބިޔާގެ ރެޑް ކްރެސެންޓުން ބުނެއެވެ.
އެ ސަރަޙައްދުން އިތުރު 11 މީހެއްގެ ހަށިގަނޑު ފެނި، އެ ހަށިތައް ލީބިޔާގެ އޮފިޝަލުންނާ ހަވާލުކޮށްފައިވާ ކަމުގައި އެ ޤައުމުގެ ރެޑް ކްރެސެންޓުން ބުނެއެވެ. އަދި، އިތުރު މީހުންގެ ހަށިތައް ގޮނޑުދޮށަށް ލައްގަމުންދާ ކަމަށާއި، މި ހާދިސާގައި މަރުވި މީހުންގެ ޢަދަދު އިތުރުވާނެ ކަމަށް ބެލެވޭ ކަމުގައި ވެސް ރެޑް ކްރެސެންޓުން ބުނެއެވެ. އޭޕްރިލް 23 ވަނަ ދުވަހު ވެސް 17 މީހެއްގެ ހަށިގަނޑު ފެނިފައިވެއެވެ.
ސަބްރާތާގެ އައްސޭރިފަށަށް ފެތިފައިވާ ބޯޓަކީ، 100 ވަރަކަށް މީހުންނާ އެކު ދަތުރުކުރަމުންދިޔަ ބޯޓެކެވެ. އޭގައި ތިބީ ޤަވާޢިދާ ޚިލާފަށް ވިލާތުގެ ޤައުމުތަކަށް ހިޖުރަކުރަން މަސައްކަތް ކުރި ރެފިޔުޖީންނެވެ. އެ ބޯޓު ދިޔަވާން ފަށާފައިވާ ކަމުގެ މަޢުލޫމާތު މަދަނީ ޖަމުޢިއްޔާއެއް ކަމުގައިވާ "އެލާމް ފޯން" އަށް ލިބުނު ކަމަށާއި، އެ ކަން ލީބިޔާގެ ކޯސްޓްގާޑަށް އެންގި ނަމަވެސް، އެއްވެސް އިދާރާއަކުން އެ ކަމާ މެދު ފިޔަވަޅެއް އަޅާފައި ނުވާ ކަމުގައި އެ ޖަމުޢިއްޔާއިން ބުނެއެވެ. އެލާމް ފޯނަކީ ކަނޑުމަތީގެ ހާދިސާތައް ރިޕޯޓުކުރުމަށް ހުޅުވައިލާފައިވާ ހޮޓްލައިނެކެވެ.
ލީބިޔާގެ ކުރީގެ ލީޑަރު މުއައްމަރް އަލް-ޤައްޒާފީގެ ސަރުކާރު 2011 ވަނަ އަހަރު ވައްޓައިލިފަހުން އިންސާނީ ވަގުފާރީގެ ދާއިރާގައި ހަރަކާތްތެރިވާ ގުރޫޕުތަކުގެ މައި މަރުކަޒަކަށް އެ ޤައުމު ވަނީ ބަދަލުވެފައެވެ. އެ ގުރޫޕުތައް މެދުވެރިވެގެން ޤަވާޢިދާ ޚިލާފަށް ވިލާތާގެ ޤައުމުތަކަށް ހިޖުރަކުރަން މަސައްކަތް ކުރާ މީހުންގެ އަތުން އެ ގުރޫޕުތަކުން އެވުރެޖުކޮށް ބޮލަކަށް 650 އެމެރިކާ ޑޮލަރަށްވުރެ މަތީ ޢަދަދުތަކުން ފީއެއް ނަގައެވެ.
ލީބިޔާގެ އިތުރުން އަވަށްޓެރި ތޫނިސް ވެސް ވަނީ ހިޖުރަކުރާ މީހުންގެ މައި މަގަކަށް ވެފައެވެ. އޭޕްރިލް 24 ވަނަ ދުވަހު ތޫނިސް ކައިރިއަށް ވެސް ވަނީ ދެ ބޯޓެއް ފެތި، 31 މީހުން މަރުވެފައެވެ. އެ ބޯޓުތަކުން ގެއްލުނު ބައެއް މީހުންގެ ހަށިތައް ހޯދުމަށް އެ ޤައުމުގެ ކޯސްޓްގާޑުން އަދިވެސް ދަނީ މަސައްކަތް ކުރަމުންނެވެ.