ސަރުކާރުން އިސްނަންގަވައިގެން އަލުން ފަށްޓަވާ ސިޔާސީ ޕާޓީތަކުގެ މަޝްވަރާތައް މިރޭ ކުރިއަށްގެންދިއުމަށް ތައްޔާރަށް އޮތްކަމަށް ސަރުކާރުން ހާމަކުރައްވައިފިއެވެ. ރައީސުލްޖުމްހޫރިއްޔާގެ އޮފީހުގެ ތަރުޖަމާނު އިބްރާހީމް މުޢާޒް ޢަލީ ވިދާޅުވީ، ސިޔާސީ ޕާޓީތަކާއިއެކު ސަރުކާރުން ކުރިއަށްގެންދިއުމަށް ނިންމަވާފައިވާ މަޝްވަރާތައް ކުރިން ކަޑަނޑައެޅިފައިވާ ގޮތަށް މިރޭ ކުރިއަށްދާނެ ކަމަށާއި، މަޝްވަރާ ބައްދަލުވުމުގެ އެޖެންޑާއަކީ ހުޅުވާލެވިފައިވާ އެޖެންޑާއެއް ކަމަށެވެ.
ސަރުކާރުން އިސްނަންގަވައިގެން ސިޔާސީ ޕާޓީތަކާއިއެކު އަލުން ފައްޓަވާ މަޝްވަރާތަކުގެ ފުރަތަމަ ބައްދަލުވުން މިރޭ 8:30 ގައި ބާއްވަވާގޮތަށް ވަނީ އެޖެންޑާ ކުރައްވާފައެވެ. މަޝްވަރާތަކުގައި ބައިވެރިވުމަށް ސިޔާސީ 6 ޕާޓީއަކަށް ސަރުކާރުން ދައުވަތު ފޮނުއްވަވާފައިވެއެވެ. އެއީ ސަރުކާރު ކޯލިޝަންގައި ހިމެނޭ ޕީޕީއެމާއި އެމްޑީއޭގެ އިތުރުން ޖުމްހޫރީ ޕާޓީއާއި ޑީއާރުޕީ އަދި އިދިކޮޅު އެމްޑީޕީ އާއި އަދާލަތު ޕާޓީއެވެ.
މިދިޔަ އަހަރު ކުރިއަށްގެންދެވި މަޝްވަރާތަކާ ޚިލާފަށް މިފަހަރުގެ މަޝްވަރާތައް ކުރިއަށްގެންދަވާނީ ހުރިހާ ސިޔާސީ ޕާޓީތަކެއް އެއް މޭޒުދޮށުގައިކަމަށް ސަރުކާރުން ހާމަކުރައްވައެވެ. އަދި ކޮންމެ ޕާޓީއަކުން 2 މަންދޫބުން މިރޭގެ މަޝްވަރާތަކުގައި ބައިވެރިވުމަށް ސަރުކާރުން ވަނީ ފުރުޞަތު ދެއްވާފައެވެ. ސަރުކާރުގެ ފަރާތުން މަޝްވަރާތަކުގައި ބައިވެރިވެވަޑައިގަންނަވަނީ ފިޝަރީޒް މިނިސްޓަރ ޑރ.މުޙައްމަދު ޝައިނީއާއި، ޑިފެންސް މިނިސްޓަރ އާދަމް ޝަރީފް ޢުމަރާއި، ޔޫތު މިނިސްޓަރ އަޙްމަދު ޡުހޫރެވެ.
މިހާތަނަށް އެއްވެސް ސިޔާސީ ޕާޓީއަކުން ސަރުކާރުން ފޮނުއްވެވި ދަޢުވަތު ޤަބޫލްނުކުރައްވާކަން ރަސްމީކޮށް ސަރުކާރަށް އަންގާފައި ނުވާކަމަށް ސަރުކާރުން ހާމަކުރައްވައެވެ. މަޝްވަރާތައް ފެއްޓެވުމަށް ރައީސް ޔާމީން ނިންމެވީ ދިވެހިރާއްޖެ ތަރައްޤީ ކުރެއްވުމަށާއި، ޤައުމު ބިނާކުރެއްވުމަށް ކުރައްވާ މަސައްކަތް ހަލުވިކުރައްވައި، ރައްޔިތުންގެ އެއްބައިވަންތަކަށް އިތުރުކުރެއްވުމަށް ކަމަށް އެމަނިކުފާނު ވިދާޅުވެފައިވެއެވެ.