އެމެރިކާއާއި ދެކުނު ކޮރެޔާއާ ދެމެދު އަސްކަރީ ދާއިރާއިން ގުޅުން ބަދަހިކުރުމާ ގުޅޭ ގޮތުން މަޝްވަރާ ކުރުމަށް ދެކުނު ކޮރެޔާގެ ރައީސް ޔޫން ސުކް ޔޯލް އެމެރިކާއަށް ވަޑައިގަންނަވައިފިއެވެ. ޔޫންގެ މި ދަތުރުފުޅުގެ އެޖެންޑާގެ އެންމެ ކުރީގައި އޮތީ އުތުރު ކޮރެޔާގެ އަސްކަރީ ހަރަކާތްތަކާ ގުޅިގެން ސަރަޙައްދީ ސަލާމަތާއި ރައްކާތެރިކަމަށް ކުރިމަތިވެފައިވާ ގޮންޖެހުންތަކަށް ހައްލެއް ހޯދުމެވެ.
އުތުރު ކޮރެޔާއިން ހުއްޓުމެއް ނެތި ދަނީ އ.ދގެ ސަލާމަތީ މަޖިލީހުގެ ޤަރާރުތަކާ ޚިލާފަށް މިސައިލް ޓެސްޓުތައް ހަދަމުންނެވެ. މި ފަދަ ކޮންމެ ޓެސްޓަކާ އެކު، ދެކުނު ކޮރެޔާގެ އިތުރުން ޖަޕާނުގެ ރައްޔިތުންނަށް ވެސް އިތުރު ބިރުވެރިކަމަކާ ކުރިމަތިލާން ޖެހެއެވެ. ބައެއް މިސައިލްތައް ވެއްޓިފައި ވަނީ ޖަޕާނުގެ އިޤްތިޞާދީ ކަނޑުގެ ސަރަޙައްދު ކައިރިއަށެވެ.
އުތުރު ކޮރެޔާއިން ޓެސްޓު ކުރި އިންޓަރކޮންޓިނެންޓަލް ބެލިސްޓިކް މިސައިލް (އައި.ސީ.ބީ.އެމް)އެއް ޖަޕާނުގެ މަތިން ވެސް ދަތުރުކޮށްފައިވެއެވެ. އެ ޤައުމުން ވަނީ ހަކަތައިގެ ގޮތުގައި ސޮލިޑް-ފިޔުލް އަންދާ އައި.ސީ.ބީ.އެމެއް ވެސް މި ހިނގާ އޭޕްރިލް މަހުގެ ތެރޭގައި ޓެސްޓުކޮށްފައެވެ.
އުތުރު ކޮރެޔާގެ މި ފަދަ އަމަލުތަކާ ގުޅިގެން ސަރަޙައްދީ ހަމަޖެހުމާއި ސަލާމަތަށް ހުރަސްއެޅިފައިވާއިރު، ދެކުނު ކޮރެޔާއިން ދަނީ އެމެރިކާއާ އެކު އޮތް ގުޅުންތައް އިތުރަށް ހަރުދަނާ ކުރަމުންނެވެ. އަދި، ޖަޕާނާ އެކު އޮތް ކިލަނބުވެފައިވާ ގުޅުންތައް ރަނގަޅު ކުރަން ވެސް ދެކުނު ކޮރެޔާއިން ދަނީ މަސައްކަތް ކުރަމުންނެވެ.
ޔޫން އެމެރިކާއަށް ވަޑައިގަންނަވާފައި މި ވަނީ، ދެކުނު ކޮރެޔާގެ ރައްޔިތުންގެ މެދުގައި އޭނާއަށް އޮތް މަގުބޫލުކަން ކުޑަވެފައިވާ ދަނޑިވަޅެއްގައެވެ. އޭނާއަށް އޮތް ތާޢީދު ދަށްވެފައިވާ އެއް ސަބަބަކީ، އެމެރިކާއިން ދެކުނު ކޮރެޔާއަށް ޖާސޫސް ކުރާ ކަން ދާދިފަހުން ލީކުކޮށްލާފައިވާ އެމެރިކާގެ ޖާސޫސީ ލިޔެކިޔުންތަކަކުން ހާމަވުމާ ގުޅިގެން އެ ކަމާ މެދު އެއްވެއް ފިޔަވަޅެއް ނޭޅުމުންނެވެ.
އަދި، އެމެރިކާގެ ނިއުކްލިޔަރ ހަތިޔާރު ދެކުނު ކޮރެޔާގައި ބެހެއްޓުމަކީ ވެސް އެ ޤައުމުގެ ބައެއް ރައްޔިތުން މިހާރު ރުހޭ ކަމެއް ނޫނެވެ. އަދި، ދެކުނު ކޮރެޔާއިން އަމިއްލައަށް ނިއުކްލިޔަރ ހަތިޔާރު އުފައްދަން ފަށަންވެއްޖެ ކަމަށް އެ ޤައުމުގެ ގިނަ ޢަދަދެއްގެ ރައްޔިތުން ގަބޫލުކުރެއެވެ. ޔޫން ވެސް ވަނީ އެ ކަމަށް ތާޢީދުކޮށް ދާދިފަހުން ވާހަކަފުޅު ދައްކަވާފައެވެ.
ޔޫން އެމެރިކާއަށް ކުރައްވަމުން ގެންދަވާ ދަތުރުފުޅުގައި ރައީސް ޖޯ ބައިޑަންއާ އެކު ބާއްވަވާ މަޝްވަރާތަކުގައި، ދެ ޤައުމުގެ ދެމެދުގައި ޖާސޫސީ މަޢުލޫމާތު ހިއްސާ ކުރުން އިތުރަށް ހަރުދަނާ ކުރުމާ ގުޅޭ ގޮތުން މަޝްވަރާ ކުރައްވާނެ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ. އެއީ، ދެކުނު ކޮރެޔާގެ ސަލާމަތާއި ރައްކާތެރިކަން ކަށަވަރު ކުރުމަށް މުހިންމު ފިޔަވަޅަކަށް ވާނެ ކަމަށް ވެސް އެ ފަރާތްތަކުން ގަބޫލުކުރެއެވެ.
ރަޝިޔާއިން ޔޫކްރެއިނަށް އަރައި ކުރަމުންދާ ހަނގުރާމައިގައި ދެކުނު ކޮރެޔާއިން ޔޫކްރެއިނަށް އިތުރު އެހީތެރިކަން ފޯރުކޮށްދިނުމަށް ޔޫންއާ އެކު ބާއްވާ ބައްދަލުވުމުގައި ބައިޑަން ބާރު އަޅުއްވާނެ ކަމަށް ވެސް ބެލެވެއެވެ. އެއް ސަބަބަކީ، ދެކުނު ކޮރެޔާއަކީ ނުވަވަނައަށް އެންމެ ގިނައިން ހަތިޔާރު އެކްސްޕޯޓްކުރާ ޤައުމަށްވުމެވެ.
ދެކުނު ކޮރެޔާއިން ޕޮލެންޑަށް އަސްކަރީ ޓޭންކުފަހަރާއި "ހޮވިޓްޒަރ" މަރުކާގެ އާޓިލަރީ ބަޑި ވިއްކާފައި ވީ ނަމަވެސް، ހަނގުރާމައެއްގައި ބައިވެރިވާ އެއްވެސް ޤައުމަކަށް ހަތިޔާރު ވިއްކުމަކީ އެ ޤައުމުން ދެކޮޅު ކަމެކެވެ. ނަމަވެސް، ދެކުނު ކޮރެޔާއިން ވަނީ ޔޫކްރެއިނަށް އިންސާނީ އެހީތެރިކަން ފޯރުކޮށްދީފައެވެ.
ޔޫން އެމެރިކާއަށް ކުރައްވާ ހަ ދުވަހުގެ ދަތުރުފުޅުގައި ބައިޑަންއާ ބައްދަލުކުރެއްވުމުގެ އިތުރުން އެ ޤައުމުގެ ޗެމްބަރ އޮފް ކޮމަރސްއާއި ނާސާއަށް ޒިޔާރަތް ކުރައްވަން ވަނީ ހަމަޖެހިފައެވެ. އަދި، ހާވަރޑް ޔުނިވަރސިޓީގައި ތަޤުރީރު ކުރެއްވުމަށް ވެސް ވަނީ ހަމަޖެހިފައެވެ.