ސްޕެއިންގެ އަސްކަރިއްޔާއިން ބޭނުންކުރާ "ލެޕަޑް ޓޫ.އޭ.ފޯ" މަރުކާގެ ހަ އަސްކަރީ ޓޭންކު ޔޫކްރެއިނަށް ފޮނުވުމުގެ ދަތުރު ފަށައިފިއެވެ. ލެޕަޑް ޓޭންކަކީ ޖަރުމަނުވިލާތުގައި އުފައްދާފައިވާ އެންމެ ފަހުގެ ޒަމާނީ އަސްކަރީ ޓޭންކެކެވެ. އެ ޓޭންކުތައް ޔޫކްރެއިނަށް ގެންދަނީ ކަނޑުމަގުންނެވެ.
ލެޕަޑް އަސްކަރީ ޓޭންކުގެ އިތުރުން ސްޕެއިނުން ޔޫކްރެއިނަށް ގިނަ ޢަދަދެއްގެ އަސްކަރީ އުޅަނދުފަހަރު ފޮނުވާނެއެވެ. އޭގެ ތެރޭގައި ވަޒަން ނާރާ ގޮތަށް ފަރުމާކޮށްފައިވާ ސިފައިން އުފުލާ އުޅަނދުފަހަރު ވެސް ހިމެނެއެވެ. އެ ތަކެތި ފުރަތަމަ ގެންދާނީ ޕޮލެންޑަށެވެ. އަދި، އެއަށްފަހު ޔޫކްރެއިނުގެ ސިފައިންނަށް އެ ތަކެތި ފޯރުކޮށްދޭނެއެވެ.
ސްޕެއިންގެ ދިފާޢީ ވަޒީރު މާރްގަރީޓާ ރޯބްލްސް ވިދާޅުވީ ޔޫކްރެއިނަށް ލެޕަޑް މަރުކާގެ 10 އަސްކަރީ ޓޭންކު ފޯރުކޮށްދޭނެ ކަމުގައެވެ. އެ ތަކެތި ބޭނުންކުރާނެ ޔޫކްރެއިނުގެ 40 ސިފައިންނާއި، އެ ތަކެތި މަރާމާތުކުރާނެ 15 މެކޭނިކުން ވެސް ސްޕެއިނުން ވަނީ ތަމްރީނުކޮށްދީފައެވެ. ޔޫކްރެއިނަށް ފޮނުވާ އިތުރު ހަތަރު އަސްކަރީ ޓޭންކު މަރާމާތު ކުރުމުގެ މަސައްކަތް ސްޕެއިނުން މިހާރު ދަނީ ކުރަމުންނެވެ.
ޔޫކްރެއިނަށް އަރާފައިވާ ރަޝިޔާގެ އިސްތިއުމާރީ ސިފައިންނާ ދެކޮޅަށް ޔޫކްރެއިނުގެ ފައުޖުތަކުން ކުރަމުންދާ ހަނގުރާމައިގައި މި ވަގުތު ބޭނުން ކުރަމުން ދަނީ ކުރީގެ ރޫސީ ވިލާތުގެ ޒަމާނުގައި އުފައްދާފައިވާ ދުވަސްވެ، ބައުވެފައިވާ ޓޭންކުފަހަރެވެ. އައު ޓޭންކުތަކާ އެކު، ޔޫކްރެއިންގެ ފައުޖުތަކުގެ އަސްކަރީ ގާބިލުކަން އިތުރުވާނެ ކަމަށް މަސްރަޙު ދިރާސާކުރާ ފަރާތްތަކުން ބުނެއެވެ.
ނޭޓޯގެ ޤައުމުތަކުން ވަނީ ލެޕަޑް 2 މަރުކާގެ 48 އަސްކަރީ ޓޭންކު ފޮނުވަން ވަޢުދުވެފައެވެ. އަދި، އެމެރިކާއިން ވަނީ އެ ޤައުމުގައި އުފައްދާ "އެބްރާމްސް" މަރުކާގެ 31 ޓޭންކު ފޮނުވާނެ ކަމަށް ބުނެފައެވެ. އިނގިރޭސިވިލާތުން ވެސް ވަނީ އެ ޤައުމުގައި އުފައްދާ "ޗެލެންޖަރ 2" މަރުކާގެ ޓޭންކުފަހަރު ޔޫކްރެއިނަށް ފޯރުކޮށްދޭނެ ކަމުގައި ބުނެފައެވެ. މި ތަކެތި ޔޫކްރެއިނަށް ފޮނުވަން ފަށާފައި މި ވަނީ، އެ ޤައުމަށް އަރާފައިވާ ރަޝިޔާގެ ފައުޖުތަކާ ދެކޮޅަށް ވަރުގަދަ އަސްކަރީ ކެމްޕޭނެއް ފެށުމަށް ތައްޔާރުވަމުންދާ ދަނޑިވަޅެއްގައެވެ.