1,000 ވަރަކަށް އޮސްޓްރޭލިޔާ ރައްޔިތުންނާ އެކު ދެވަނަ ބޮޑު ހަނގުރާމައިގެ ދުވަސްވަރު ފައްތައިލާފައިވާ ބޯޓެއް ކަނޑުގެ އަޑިން ހޯދައިފިއެވެ. އެ ބޯޓަކީ ޖަޕާނުގެ "މޮންޓެވީޑިޔޯ މަރޫ"އެވެ. ޓޯޕީޑޯ ޙަމަލާއެއްގައި އެ ބޯޓު ފައްތައިލާފައި ވަނީ ފިލިޕީންސްގެ އައްސޭރިފަށުގެ ސަރަޙައްދަކަށެވެ.
މޮންޓެވީޑިޔޯ މަރޫއަށް ހަމަލާދީފައި ވަނީ އެމެރިކާގެ ސަބްމެރިންއަކުންނެވެ. އެއީ، 1942 ވަނަ އަހަރުގެ ޖުލައި މަހުގެ 1 ވަނަ ދުވަހެވެ. ބޯޓަށް ޙަމަލާދިން ވަގުތު، އެ ބޯޓުގައި 1,000 އެއްހާ މީހުން ތިބިކަން ސަބްމެރިންގައި ތިބި ފަޅުވެރިންނަށް ނޭނގޭ ކަމުގައި ރިޕޯޓުތައް ބުނެއެވެ. ބޯޓުގައި ތިބީ ހަނގުރާމައިގެ މައިދާނުން ހައްޔަރުކޮށްފައިވާ މީހުންނެވެ.
މި ބޯޓު ހޯދުމުގެ މަސައްކަތް ކޮށްފައި ވަނީ ސައިލެންޓްވޯލްޑް ފައުންޑޭޝަން ކިޔާ މެރިޓައިމް އާކިއޮލޮޖީގެ ދާއިރާގައި ހަރަކާތްތެރިވާ ގުރޫޕަކުންނެވެ. މޮންޓެވީޑިޔޯ މަރޫއަށް ހަމަލާދީ ފައްތައިލުމަކީ، އޮސްޓްރޭލިޔާގެ އަސްކަރިއްޔާއަށް ކުރިމަތިވި ކަނޑުމަތީގެ އެންމެ ނުރައްކާތެރި އަދި އެންމެ ހިތާމަވެރި ހާދިސާއެވެ.
އެ ބޯޓު ފައްތައިލި ވަގުތު އޭގައި އޮސްޓްރޭލިޔާގެ 979 މީހުން ތިއްބެވެ. އޭގެ ތެރޭގައި 850 ސިފައިން ހިމެނެއެވެ. އަދި، އިތުރު 13 ޤައުމެއްގެ މީހުންނާ އެކު ޖުމުލަ 1,060 މީހެއްގެ ފުރާނަ އެ ހާދިސާގައި ގެއްލުނު ކަމުގައި ސައިލެންޓްވޯލްޑް ފައުންޑޭޝަނުން ބުނެއެވެ. ޖަޕާނުގެ ސިފައިން އެ މީހުން ހައްޔަރުކޮށްފައި ވަނީ ޕަޕުއާ ނިއު ގިނީގެ ރަށެއް ކަމުގައިވާ ރަބައުލްގައި ހަރަކާތްތެރިވަމުން ދަނިކޮށެވެ.
އެ ބޯޓު ހޯދުމަށް ސައިލެންޓްވޯލްޑް ފައުންޑޭޝަނުން މަސައްކަތް ފަށާފައި ވަނީ މީގެ ހަ މަސް ކުރިންނެވެ. ބޯޓު ފެނިފައި ވަނީ އޭޕްރިލް 6 ވަނަ ދުވަހު، ދެކުނު ޗައިނާ ކަނޑުގެ ސަރަޙައްދުންނެވެ. ޕިލިފީންސްގެ މައި ރަށް ކަމުގައިވާ ލުޒޯންގެ ހުޅަނގުއުތުރު ފަރާތުން ކަނޑުގެ ހަތަރު ކިލޯމީޓަރު އަޑިންނެވެ. އެއީ، ޓައިޓޭނިކް ފެތިފައި އޮތް ހިސާބަށްވުރެ ވެސް ފުން ހިސާބެކެވެ.
މޮންޓެވީޑިޔޯ މަރޫ ކަނޑުގެ އަޑިން ފެނުނު ނަމަވެސް، އެ ބޯޓަށް އެއްވެސް ފަރާތަކުން ގޯނާއެއް ނުކުރާނެއެވެ. އަދި، ބޯޓުގެ ތެރެއިން އެއްވެސް މީހެއްގެ ހަށިގަނޑެއް ވެސް އަދި އެއްވެސް އެއްޗެއް ނެގުމަށް މަސައްކަތް ނުކުރާނެ ކަމުގައި ސައިލެންޓްވޯލްޑް ފައުންޑޭޝަނުން ބުނެއެވެ. ބޯޓާއި، ބޯޓުގައި މަރުވި މީހުންގެ ހަށިތައް ފެނިފައި މި ވަނީ 81 އަހަރުގެ ދިގު އިންތިޒާރަކަށް ފަހުއެވެ.
އޮސްޓްރޭލިޔާގެ ސިފައިންނާއި ޢާންމުންގެ އިތުރުން އެ ބޯޓުގައި ދެން ތިބީ އިނގިރޭސިވިލާތާއި، ޑެންމާކާއި، އެސްޓޯނިޔާއާއި، ފިންލެންޑާއި، އަޔަލެންޑާއި، ދަ ނެދަރލެންޑްސާއި، ނިއު ޒިލެންޑާއި، ސޮލޮމޮން އައިލެންޑްސާއި، ސްވިޑެންގެ އިތުރުން އެމެރިކާ ރައްޔިތުންނެވެ.