ސްޕެއިންގެ ވެރިރަށް މެޑްރިޑުގެ ރެސްޓޯރެންޓެއްގައި ހިނގި ނުރައްކާތެރި އަލިފާނުގެ ހާދިސާއެއްގައި ދެ މީހުން މަރުވެއްޖެއެވެ. މި ހާދިސާ ހިނގާފައި ވަނީ މެޑްރިޑުގެ ހުޅަނގުގައި ހުންނަ އިޓަލީވިލާތުގެ ކެއުންތަކަށް މަޝްހޫރު ރެސްޓޯރެންޓެއްގައެވެ. މި ހާދިސާގައި އިތުރު 10 މީހަކު ވަނީ ފިހިފައެވެ.
އަލިފާނުގެ ހާދިސާ ހިނގަން މެދުވެރިވީ، ކަސްޓަމަރުންތަކެއް އޯޑަރުކުރި ކެއުމެއް "ފްލެމްބީ" ކުރަން ނުވަތަ އޭގައި ހުޅުޖަހަން ރެސްޓޯރެންޓުގެ ވެއިޓަރެއް މަސައްކަތް ކުރި ވަގުތުގައެވެ. އެ ޑިޝް ނުވަތަ ކާތަކެތީގައި ވެރިޓަރު ހުޅުޖެހުމުން، ރެސްޓޯރެންޓް ޒީނަތްތެރިކުރުމަށް ބަހައްޓާފައިވާ އެއްޗެހިތަކެއްގައި ހުޅުހިފައި، އަލިފާންގަނޑު ފެތުރިގަނެފައިވާ ކަމުގައި މެޑްރިޑްގެ ކުއްލި ހާލަތްތަކާ ބެހޭ އިދާރާގެ މެނޭޖަރު މޮންޓްސީ މާރްކޯސް ވިދާޅުވިއެވެ.
މި ހާދިސާގައި މަރުވި މީހުންގެ ތެރޭގައި އެ ވޭޓަރު ވެސް ހިމެނެއެވެ. ދެވަނައަށް މަރުވީ، ރެސްޓޯރެންޓުގެ އެއް ވެރިއެކެވެ. އެ ދެ މީހުން ވެސް މަރުވެފައި ވަނީ ހޮސްޕިޓަލަށް ގެންގޮސް ފަރުވާދޭން ފެށި ފަހުން ކަމުގައި މާރްކޯސް ވިދާޅުވިއެވެ.
މި ހާދިސާގައި ޒަޚަމުވި 10 މީހުންގެ ތެރެއިން ހަ މީހަކަށް ހޮސްޕިޓަލުގައި އެޑްމިޓްކޮށްގެން ފަރުވާދެމުންދާ ކަމުގައި ވެސް އޮފިޝަލުން ވިދާޅުވިއެވެ. އެ ހަ މީހުންގެ ހާލު ސީރިޔަސް ކަމުގައި ޑޮކްޓަރުން ވިދާޅުވިއެވެ. ރެސްޓޯރެންޓުގައި ރޯވި އަލިފާންގަނޑު ވަރަށް އަވަހަށް ނިއްވައިލެވިފައި ވަނީ، އެ ތަނާ ވަރަށް ގާތުގައި އަލިފާން ނިއްވާ ސްޓޭޝަނުން ހުރުމުގެ ސަބަބުން ކަމަށް އޮފިޝަލުން ވިދާޅުވިއެވެ.