ދުނިޔޭގެ ފަތުރުވެރިކަމުގެ ޖަމްޢިއްޔާ، ޔޫ.އެން.ޑަބްލިއު.ޓީ.އޯއިން ކުރިއަށް ގެންދާ "ބެސްޓް ޓޫރިޒަމް ވިލެޖަސް 2023" އަށް ވާދަކުރުމަށް ރަށްރަށުގެ ނަން ހުށަހެޅުމުގެ ފުރުޞަތު ޓޫރިޒަމް މިނިސްޓްރީން އިތުރުކުރައްވައިފިއެވެ.
"ބެސްޓް ޓޫރިޒަމް ވިލެޖަސް" އަކީ ރަށްފުށުގެ ކުރިއެރުމާއި، ތަރައްޤީ އަދި ދުޅަހެޔޮ ދިރިއުޅުމަށް މަގުފަހިކޮށްދޭ މައި ވަޞީލަތުގައި ފަތުރުވެރިކަން ބޭނުންކުރުމަށް ހިތްވަރު ދިނުމުގެ ގޮތުން، ރަށްފުށު ފަތުރުވެރިކަމަށް އަމާޒުކޮށްގެން 2021 ވަނައަހަރުން ފެށިގެން އދ.ގެ ފަތުރުވެރިކަމާބެހޭ އިދާރާ، ޔޫ.އެން.ޑަބްލިއު.ޓީ.އޯއިން ހިންގާ ޕްރޮގްރާމެކެވެ. މި ޕްރޮގްރާމަށް ރާއްޖޭގައި ރަށްފުށު ފަތުރުވެރިކަމަށް ޚާއްޞަ 8 ރަށެއްގެ ޕްރޮޕޯސަލް ހުށަހެޅުމުގެ ފުރުޞަތު ޓޫރިޒަމް މިނިސްޓްރީން ވަނީ ހުޅުއްވައިލައްވައިފައެވެ.
ކުރިން އޮތްގޮތުން "ބެސްޓް ޓޫރިޒަމް ވިލެޖަސް" އަށް ރަށްރަށުގެ ނަން ހުށައެޅުމުގެ ފުރުޞަތު އޮތީ މިމަހުގެ 20 ވަނަ ދުވަހާ ހަމައަށެވެ. ނަމަވެސް މިހާރު މިނިސްޓްރީން ވަނީ މިމަހުގެ 25 ވަނަ ދުވަހުގެ ނިޔަލަށް މި މުއްދަތު އިތުރުކުރައްވައިފައެވެ. މިނިސްޓްރީން ވިދާޅުވީ، މުއްދަތު އިތުރުކުރެއްވީ ވީހާވެސް ގިނަ ރަށްތަކަށް މި ފުރުޞަތު ދެއްވުމުގެ ބޭނުމުގައި ކަމަށެވެ.
ރާއްޖޭގައި މިހާރު ގެސްޓްހައުސް ވިޔަފާރި ވަނީ ވަރަށް ބޮޑަށް ފުޅާވެފައެވެ. އެގޮތުން 100 އަށްވުރެ ގިނަ ރަށުގައި ގެސްޓުހައުސް އެބަހުއްޓެވެ.
ނަން ހުށަހަޅާ ރަށްތަކުގެ ތެރެއިން ފަތުރުވެރިކަން ފުޅާވުމަށް މަގުފަހިވެފައިވާ މިންވަރަށް ބެލުމަށްފަހު އެންމެ ރަނގަޅު ރަށްތަކުގެ ތެރެއިން ގިނަވެގެން 8 ރަށް ރާއްޖޭގެ ފަރާތުން "ބެސްޓް ޓޫރިޒަމް ވިލެޖަސް 2023" އަށް ހުށައަޅާނެއެވެ. މިކަމަށް ބޭނުންވާ އެޕްލިކޭޝަން ފޯމާއި، "ކެނޑިޑެސީ ޑޮކިއުމެންޓް" ފުރިހަމަކުރުމާއި، ވީޑިއޯ އަދި ޖެނެރަލް ޕްރެޒެންޓޭޝަން ތައްޔާރުކުރުމުގައި ޓޫރިޒަމް މިނިސްޓްރީން މިރަށްތަކަށް އެހީތެރިވެދެއްވާނެ ކަމަށް އެ މިނިސްޓްރީން ވިދާޅުވިއެވެ.
މި ޕްރޮގްރާމްގައި ބައިވެރިވެވޭނީ، ރާއްޖޭގައި ފަތުރުވެރިކަން ތަރައްޤީވެ، ކުރިއެރުމަށް މަގުފަހިވެފައިވާ ރަށްތަކުގެ ތެރެއިން ރަށުގައި ދިރިއުޅޭ އާބާދީގެ ޢަދަދު 15،000 އަށް ވުރެ މަތިނޫން ރަށްރަށަށެވެ.
ޓޫރިޒަމް މިނިސްޓްރީން ވިދާޅުވީ ރަށްތައް ހޮވުމުގައި ޔޫ.އެން.ޑަބްލިއު.ޓީ.އޯއިން އެންމެ ބޮޑަށް އިސްކަންދޭނީ ރަށުގައި ސަގާފީ ގޮތުން ހިމާޔަތްކުރެވިފައިވާ ތަންތަނަށް ކަމަށެވެ. އަދި ޤުދުރަތީ ރީތި ތަންތަން ޙިމާޔަތް ކުރެވިފައިވާނަމަ އެ ތަންތަނުގެ މަޢުލޫމާތު ވެސް ހުށައަޅާ ފޯމްގައި ހިމެނުން މުހިންމު ކަމަށެއެވެ. އަދި ސަގާފީ ތަރިކަ ޙިމާޔަތްކޮށް، ރައްކާތެރިކުރެވޭ ސިޔާސަތުތަކަށް އެއްބާރުލުން ދިނުމުގެ ގޮތުން ރަށުފެންވަރުގައި ކުރާ މަސައްކަތަކަށް ބެލޭނެކަމަށް އެ މިނިސްޓްރީއިން ވިދާޅުވިއެވެ.
މިޕްރޮގްރާމްގެ ދަށުން މިހާތަނަށް 40 ޤައުމަކުން 70 އަށް ވުރެ ގިނަ އަވަށާއި، ރަށް ދުނިޔޭގެ ފެންވަރުގައި ވަނީ ފާހަގަކޮށްފައެވެ. ޔޫ.އެން.ޑަބްލިއު.ޓީ.އޯ ގެ މެންބަރު ޤައުމުތަކަށް ހުޅުވާލައިގެން ކުރިއަށްގެންދާ މި ޕްރޮގްރާމްގައި ބައިވެރިވެ، ހޮވޭ އަވަށާއި، ރަށްތައް ފަތުރުވެރިކަން ތަރައްޤީކުރުމުގެ ލާމަޞީލު ނަމޫނާއެއް ގޮތުގައި ދުނިޔޭގެ ފެންވަރުގައި ފާހަގަކުރެއެވެ.