އިނގިރޭސިވިލާތުގެ ބޮޑުވަޒީރުގެ ނައިބު ޑޮމިނިކް ރާބް އިސްތިއުފާ ދެއްވައިފިއެވެ. ރާބް އިސްތިއުފާ ހުށަހަޅުއްވާފައި ވަނީ، އެކުގައި މަސައްކަތް ކުރާ ފަރާތްތަކަށް އޭނާ ގަނާކުރައްވާ ކަމަށް ކުރެވޭ ތުހުމަތުތަކުގެ ތަހުޤީޤެއް ސަރުކާރުން ފަށާފައިވާ ދަނޑިވަޅެއްގައި، އެ ކަމާ ގުޅިގެންނެވެ. އޭނާ ވަނީ ބޮޑުވަޒީރު ރިޝީ ސުނަކުގެ ސަރުކާރުން މިހާތަނަށް ވަކިވެ ވަޑައިގެންނެވި އެންމެ އިސް ބޭފުޅާއެވެ.
ފާއިތުވި ހައެއްކަ މަހުގެ ތެރޭގައި ސުނަކުގެ ސަރުކާރުގެ އިސް މަގާމުތައް ފުރުއްވާ ތިން ބޭފުޅަކު މި ވަނީ އިސްތިއުފާ ދެއްވާފައެވެ. މި ކަމާ ގުޅިގެން، ވެރިކަން ކުރާ ކޮންޒަރވެޓިވް ޕާޓީ ކުރިއަރުވަން ސުނަކް ކުރައްވަމުން ގެންދަވާ މަސައްކަތްތަކަށް ނޭދެވޭ އަސަރުތަކެއް ކޮށްފައިވާ ކަމުގައި މަސްރަޙު ދިރާސާކުރާ ފަރާތްތަކުން ގަބޫލުކުރެއެވެ. އަދި، ރާބްގެ އިސްތިއުފާއަކީ ސުނަކްގެ ސަރުކާރަށް ލިބުނު ބޮޑު ވެއްޓުމެއްގެ ގޮތުގައި ވެސް އެ ފަރާތްތަކުން ސިފަކުރެއެވެ.
ރާބްގެ އިސްތިއުފާގެ ސިޓީ ފޮނުއްވާފައި ވަނީ، ގަނާކުރުމުގެ ތުހުމަތުގައި އޭނާއާ ދެކޮޅަށް ފަށާފައިވާ ތަހުޤީޤުގެ ރިޕޯޓު ހާމަކުރަން ތައްޔާރުވެފައިވާ ދަނޑިވަޅެއްގައެވެ. "އަޅުގަނޑާ އެކު މަސައްކަތް ކުރާ މީހުންނަށް އަޅުގަނޑު ގަނާކޮށްފައިވާ ކަމަށް ކުރެވޭ ތުހުމަތުތައް ތަހުޤީޤު ކޮށްދިނުމަށް އެދި ހުށަހެޅީ ވެސް ޚުދު އަޅުގަނޑު. އެ ތަހުޤީޤުގެ ރިޕޯޓު ހާމަކުރުމުގެ ކުރިން އިސްތިއުފާ ދޭން ޖެހޭނެ ކަމަށް އަޅުގަނޑު ގަބޫލުކުރަން،" ރާބްގެ އިސްތިއުފާގެ ސިޓީގައި އޭނާ ވިދާޅުވިއެވެ.
ރާބާ ދެކޮޅަށް ތަހުޤީޤު ފަށާފައި ވަނީ ހުސްވި 2022 ވަނަ އަހަރުގެ ނޮވެންބަރު މަހުއެވެ. ސަރުކާރުގެ އިސް މަގާމުތައް ފުރުއްވާ ގިނަ ޢަދަދެއްގެ ބޭފުޅުންތަކެއް ރާބާ ދެކޮޅަށް ގަނާކުރުމުގެ ތުހުމަތު ކުރައްވާފައިވެއެވެ. ޖަސްޓިސް މިނިސްޓަރުގެ މަޤާމު ވެސް ފުރުއްވަމުން ގެންދަވާ ރާބް ވަނީ ގިނަ ތުހުމަތުތައް ދޮގު ކުރައްވާފައެވެ. އަދި، އެއްވެސް މީހަކާ ދިމާލަށް އަވަގުރާނަ ގޮވައި، އަޑުހަރުކޮށް އިންޒާރުދީ، ޒުވާބުކޮށް، ބިރު ދައްކައި، އަތް އިސްކޮށްފައި ނުވާނެ ކަމުގައި ވެސް ރާބް ވިދާޅުވެއެވެ. ނަމަވެސް، އެ ފަދަ ކަމެއް ކުރެވިފައިވާ ނަމަ، އެ ކަމަކަށް މަޢާފަށް އެދިވަޑައިގަންނަވާ ކަމުގައި ވެސް ރާބް ވިދާޅުވިއެވެ.
އޭނާގެ އިސްތިއުފާއާ ގުޅިގެން، ކުރިއަށް އޮތް އިނގިރޭސިވިލާތުގެ ލޯކަލް ކައުންސިލްތަކުގެ އިންތިޚާބުގައި ކޮންޒަރވެޓިވް ޕާޓީއަށް ނޭދެވޭ އަސަރުތަކެއް ކުރާނެ ކަމަށް މަސްރަޙު ދިރާސާކުރާ ފަރާތްތަކުން ގަބޫލުކުރެއެވެ. ކޮންޒަރވެޓިވް ޕާޓީއަށް އެ އިންތިޚާބުގައި ކާމިޔާބީއެއް ހޯދޭނެ ކަމާ މެދު އެ ފަރާތްތަކުން ދަނީ ސުވާލު އުފައްދަމުންނެވެ. ރާބްގެ އިސްތިއުފާއާ ގުޅިގެން ވާހަކަ ދައްކަން ޑައުނިންގް ސްޓްރީޓުން ވަނީ ދެކޮޅު ހަދާފައެވެ.
ސުނަކްގެ ނައިބުގެ ހައިސިއްޔަތުން ރާބް އަދާކުރައްވާފައި ވަނީ ރަމްޒީ ދައުރެކެވެ. ވެރިކަމުގެ ކަންކަމާ އޭނާ ހަވާލުވެ ވަޑައިގަންނަވާފައި ވަނީ، ޤާނޫނު ހަދާ މަޖިލީހުގެ މަސައްކަތްތަކުން ސުނަކް ދުރުވެ ވަޑައިގަންނަވަން ޖެހޭ ހާލަތްތަކުގައި އެކަންޏެވެ. ނަމަވެސް، އޭނާއަކީ ސުނަކްގެ ވަރަށް ގާތް ބޭފުޅެކެވެ. އަދި، ބޮޑުވަޒީރު ކަމުގެ މަގާމަށް ސުނަކް ކުރެއްވި ކެމްޕޭނުގައި ރާބް ވަނީ އިސް ދައުރެއް އަދާކުރައްވާފައެވެ.