ޤައުމުގެ އިސްލާމީ ޝަޚުޞިއްޔަތު ރައްކާތެރިކޮށް ދެމެހެއްޓުމަށް ޢަޒުމް ކަނޑައަޅަންޖެހޭ: ޢީދު ޚުތުބާ

ކުރިއަށް އޮތް ޖީލުތަކަށް އިސްލާމްދީނުގެ މަތިވެރި ޢަޤީދާ ފޯރުކޮށްދީ، ޤައުމުގެ އިސްލާމީ ޝަޚުޞިއްޔަތު ރައްކާތެރިކޮށް ދެމެހެއްޓުމަށް މިއަދު ޢަޒުމް ކަނޑައަޅަން ޖެހޭކަމަށް ފިތުރުގެ ޢީދު ދުވަހުގެ ޚުތުބާގައި ވިދާޅުވެއްޖެއެވެ.

މާލެއާއި ހުޅުމާލެ އާއި ވިލިމާލެ ހިމެނޭހެން މާލޭ ސިޓީގެ 6 ސަރަޙައްދެއްގައި އަދި އަތޮޅުތެރޭގެ ރަށްތަކުގައި މިއަދު ފިތުރު ޢީދު ނަމާދު ބޮޑު ޖަމާޢަތުގައި ކުރިއެވެ.

މިއަދު އީދު ޚުތުބާގައި ވިދާޅުވީ ޢީދު ނަމާދަށްޓަކައި އެއްވެ ތިބި ތިބުމުން ހާމަކޮށްދެނީ މުޖުތަމަޢުގެ އެއްބައިވަންތަކަމާއި، ކުޑަކުދިންނާއި ބޮޑެތިމީހުންގެ މެދުގައި، ފަޤީރުންނާއި މުއްސަނދިންގެ މެދުގައި އޮތް ކުލުނުވެރިކަމާއި ލޯބިކަމަށެވެ.

މިފަދަ މާތް ދުވަހެއް ފާހަގަކުރާއިރު ރުޅިވެރިކަމާއި ޙަސަދަވެރިކަމުން އަޅުގަނޑުމެންގެ ހިތްތައް ސާފުކުރުމަށް ޚުޠުބާގައި ވަނީ ނަސޭޙަތްތެރިވެވަޑައިގެންފައެވެ. އަދި މުޖުތަމަޢުގެ ގުޅުމާއި، ޢާއިލާ އާއި އެއްބަނޑު އެއްބަފާކަމުގެ ގުޅުންތައް ދެމެހެއްޓުމަށް ވެސް ނަސޭޙަތްތެރިވެވަޑައިގަތެވެ.

"ބައިބައި ނުވެ، އެއްގަލަކަށް އަރަމާ ހިނގާށެވެ! އަހަރެމެންގެ ތެރެއިން ކޮންމެ މީހަކުވެސް އަނެކާގެ ޙައްޤު އަދާކުރަމާ ހިނގާށެވެ! މައިންބަފައިންގެ ޙައްޤުން ފަށަމާ ހިނގާށޭ! މައިންބަފައިންކުރެ ހަމަ އެކަކުވެސް ހިތުގައި ނުޖައްސަން މިއަދު ޢަޒްމު ކަނޑައަޅަމާ ހިނގާށެވެ!" ޚިތުބާގައި ނަސޭޙަތްތެރިވެވަޑައިގެންފައިވެއެވެ.

ރަމަޟާންމަސް ވަކިވެގެން ދިޔަނަމަވެސް، ޙެޔޮ ޢަމަލުތައް ދޫކޮށްނުލުމަށް ޚުޠުބާގައި ވަނީ ގޮވާލައްވައިފައެވެ. އަދި ނަމާދުކުރުމާއި ޤުރުއާން ކިޔެވުމާއި، ޒިކުރު ކުރުމުގައި ދެމިތިބުމަށް ވަނީ ބާރުއަޅުއްވައިފައެވެ.

ޢީދަކީ، އިންސާނިއްޔަތުކަން ފާޅުވާންޖެހޭ މުނާސަބާއެއް ފާހަގަކުރައްވަމުން ޚުޠުބާގައި ވިދާޅުވީ މިއީ ދޭދޭ ފަރުދުންގެ މެދުގައި އަރާރުމެއް ދެކޮޅުވެރިކަމެއް އޮތްނަމަ އެކަންކަން ނައްތައިލަންވީ ވަގުތުކަމަށެވެ. އިސްލާމް ދީން ގޮވާލަނީ އަހަރަމެންނަކީ އެއްބަޔަކު އަނެއްބަޔަކު ދެކެ ލޯބިވާ ބަޔަކު ކަމުގައި ވުމަށްކަމަށް ވެސް ޚުޠުބާގައި ފާހަގަކުރެއްވިއެވެ.

މާލެ ސިޓީގައި ބޮޑު ޖަމާޢަތުގައި ޢީދު ނަމާދުކުރުން މިއަހަރުވެސް އޮތީ މާފަންނު ސްޓޭޑިއަމްގައެވެ. އަދި އިސްލާމީ މަރުކަޒާއި މައިދާން ސަރަޙައްދުގަޔާއި، ސަލްމާން މިސްކިތުގައިވެސް ބޮޑު ޖަމާޢަތުގައި ޢީދު ނަމާދުކުރިއެވެ. ހުޅުމާލޭގައި ބޮޑު ޖަމާޢަތުގައި ޢީދުނަމާދު ކުރީ ހުޅުމާލޭގައި ފޭސް 1- ގެ ސިންތެޓިކް ޓްރެކުގަ އާއި، ފޭސް-2 ގެ ކްރިކެޓް ސްޓޭޑިއަމް އަޅާ ސަރަަޙައްދުގައެވެ. ވިލިމާލޭގައި ބޮޑު ޖަމާޢަތުގައި ޢީދު ނަމާދުކުރީ ބޯޅަ ދަނޑުގައެވެ. އަތޮޅުތަކުގެ ގިނަ ރަށްރަށުގައިވެސް ބޮޑު ޖަމާޢަތުގައި ޢީދު ނަމާދުކުރިއެވެ.