ހުޅުމާލޭގައި މިއަދު ހިނގި އެކްސިޑެންޓްގައި އަނިޔާވި 18 އަހަރުގެ ފިރިހެން މީހާގެ ޙާލު ސީރިއަސްކަމަށް އޭޑީކޭއިން ބުނެފިއެވެ.
މި އެކްސިޑެެންޑް ހިނގީ މިއަދު ހެނދުނު، ހުޅުމާލޭގެ ފޭސް 2 ގެ ނިރޮޅުމަގުގައި ކާރަކާއި ސައިކަލެއް ޖެހިގެންނެވެ.
އަނިޔާވި ޒުވާނާއަަށް ފުރަތަމަ ފަރުވާ ދިނީ ހުޅުމާލޭ ހޮސްޕިޓަލްގައެވެ. ނަމަވެސް އަނިޔާތަކުގައި ސިކުނޑިއަށް ލޭ އެޅިފައިވާތީ، އޭނާ އިތުރު ފަރުވާއަށް އޭޑީކޭ ހޮސްޕިޓަލަށް ވަނީ ބަދަލުކޮށްފައެވެ.
އޭޑީކޭ ހޮސްޕިޓަލުން ޕީއެސްއެމްއަށް މަޢުލޫމާތުދެމުން ބުނީ އަނިޔާވި މީހާގެ ޙާލު ސީރިއަސްކަމުން ފަރުވާދެމުން އަންނަނީ ހޮސްޕިޓަލްގެ އައިސީޔޫގައި ކަމަށެވެ. ނަމަވެސް އެމީހާއަށް ލިބިފައިވާ އަނިޔާގެ ތަފްޞީލާއި، ފަރުވާގެ މަޢުލޫމާތު ޙިއްޞާކޮށްފައެއް ނުވެއެވެ.
މި ޙާދިސާއާ ގުޅިގެން ބަލަންޖެހޭ ކަންކަން ބަލައި މައްސަލަ އިތުރަށް ތަޙުޤީޤު ކުރަމުންދާކަމަށް ފުލުހުން ވިދާޅުވެއެވެ.
ފަހަކަށް އައިސް މަގުމަތީގައި އެކްސިޑެންޓްތައް ހިނގާ މިންވަރު ރާއްޖޭގައި އަންނަނީ އިތުރުވަމުންނެވެ. މިކަމާގުޅިގެން އެކްސިޑެންޓްތައް ހިނގާ މިންވަރު މަދުކޮށް، މަގުމަތީގެ ސަލާމަތާއި ރައްކާތެރިކަމާއި، ޓްރެފިކް ޤާނޫނުތަކަށް އާއްމުން ހޭލުންތެރިކުރުމަށް ކަމާބެހޭ ފަރާތްތަކުން ދަނީ މަސައްކަތްކުރަމުންނެވެ.