މާދަމާއަކީ މިއަހަރުގެ ފިތުރު ޢީދު ދުވަސްކަމުގައި ކަނޑައަޅުއްވައިފިއެވެ.
މާދަމާއަކީ މިއަަހަރުގެ ފިތުރު އީދު ދުވަސްކަމުގައި ކަނޑަައަޅުއްވައި، އިއުލާންކުުރެއްވީ ޝައްވާލުމަހުގެ ހަނދު ސާބިތުކުރުމަށް މިރޭ އިސްލާމީ މަރުކަޒުގައި ބޭއްވި ޖަލްސާއަށްފަހު، އިސްލާމިކް މިނިސްޓަރ ޑރ. އަހުމަދު ޒާހިރު އިއްވެވި ހަނދާއިބެހޭ ބަޔާނުގައެވެ.
އިސްލާމިކް މިނިސްޓަރ ޑރ. އަހުމަދު ޒާހިރު އިއްވެވި ބަޔާނުގައި ވިދާޅުވީ ދިވެހިރާއްޖޭގެ ހުރިހާ ސަރަހައްދަކަށާއި އިސްލާމީ ހުރިހާ ޤައުމަކަށްވެސް 1444 ވަނަ އަހަރުގެ ޝައްވާލު މަހުގެ ހަނދު ފެންނާނެކަމަށް އިތުބާރުހުރި ފަލަކީ ހިސާބުތަކުން ދައްކާފައިވާކަމަށެވެ. އަދި އިސްލާމީ ބައެއް ޤައުމުތަކަށް ހަނދު ފެނިފައިވާކަމަށް ރަސްމީ ހަބަރު ލިބިފައިވާކަމަށްވެސް އިސްލާމިކް މިނިސްޓަރގެ ބަޔާނުގައިވެއެވެ. އެހެންކަމުން އޭޕްރީލް 20 ވާ ހުކުރު ދުވަހަކީ ހިޖުރީ ސަނަތުން 1444 ވަނަ އަހަރުގެ ޝައްވާލު މަހުގެ އެއްވަނަ ދުވަސްކަމަށާއި އަދި އެދުވަހަކީ މިއަހަރުގެ ފިތުރު އީދު ދުވަސްކަމުގައި ކަނޑައަޅުއްވާފައިވާކަމަށް ހަނދާއިބެހޭ ބެހޭގޮތުން އިއްވެވި ބަޔާނުގައި މިނިސްޓަރ ވިދާޅުވިއެވެ.
ރާއްޖޭގެ އިތުރުން ސައުދީ އަރަބިއްޔާއާއި އިސްލާމީ ވަރަށް ގިނަ ޤައުމުތަކުން ވަނީ މާދަމާއަކީ މިއަހަރުގެ ފިތުރު އީދު ދުވަސްކަަމަށް ކަނޑައަޅާފައެވެ. ނަމަވެސް އިރުމަތީ އޭޝިޔާގެ ބައެއް ޤައުމުތަކުން ފިތުރު އީދު ދުވަހުގެ ގޮތުގައި ކަނޑައަޅާފައިވަނީ ހޮނިހިރުދުވަހެވެ.
ރަމަޟާން މަހެކޭ އެއްފަދައިން ޝައްވާލު މަހުގެ ހަނދުބެލުމަކީވެސް އިސްލާމީ ޤައުމުތަކުގައި ކޮންމެއަހަރަކުވެސް ކުރަންޖެހޭ މުހިންމު ކަމެކެވެ. ކޮންމެ ހަނދުމަހެއްގެވެސް ދިގުމިނަކީ ކުރުވެގެން 29 ދުވަސް އަދި ދިގުވެގެން 30 ދުވަހެވެ.
މިޒަމާނުގައި ރާއްޖޭގައިވެސް އަދި އިސްލާމީ ބޮޑެތި އެހެން ޤައުމުތަކުގައިވެސް ހަނދުބެލުމުގައި ބުރަވަނީ އިތުބާރުހުރި ފަލަކީ ހިސާބަށެވެ. މިހެން ހަދަނީ ޢަމަލީގޮތުން ހަނދުބަލާއިރު، އުދަރެހުގައި ވިލާގިނަނަމަ ހަނދު ހުއްޓަސް ހަނދު ފެނުމުގެ ފުރުސަތު ކުޑަވާތީއެވެ. ނަމާދު ވަގުތު ބެލުމާއި މިނޫންވެސް ވަރަށް ގިނަ ކަންކަމުގައި އިސްލާމީ ޤައުމުތަކުގައި ފަލަކީ ހިސާބަށް ބަރޯސާވެއެވެ.