ފިތުރު ޢީދު ބަންދާއި ދިމާކޮށް އެމްއެންޑީއެފް ކޯސްޓްގާޑުން، ކަނޑު އުޅަނދުގެ ރައްކާތެރިކަން ބެއްލެވުމުގެ ޚާއްސަ އޮޕަރޭޝަނެއް ފައްޓަވައިފިއެވެ.
"އޮޕަރޭޝަން ފިތުރު 2023"ގެ ނަމުގައި ފެއްޓެވި މި އޮޕަރޭޝަނަކީ އެމްއެންޑީއެފް މާލެ އޭރިއާ ކޮމާންޑް ކޯސްޓްގާޑް ސެކަންޑް ސްކޮޑްރަންއިން ފެއްޓެވި އޮޕަރޭޝަނެކެވެ.
މި އޮޕަރޭޝަންގެ މަޤުޞަދަކީ ޢީދު ބަންދަކީ ކަނޑުމަގުން ގިނަ އަދަދެއްގެ ބަޔަކު ދަތުރުކުރާ ދުވަސްވަރަކަށްވުމާއެކު، ކަނޑު މަތިން ދިމާވެދާނެ ނުރައްކާތެރި ހާދިސާތައް މަދުކުރުމަށް ހޭލުންތެރިކުރުންކަމަށް އެމްއެންޑީއެފްއިން ވިދާޅުވެއެވެ. އަދި އުޅަނދުގެ ސަލާމަތާއި ރައްކާތެރިކަމަށް އަޅަންޖެހޭ ފިޔަވަޅުތައް އެޅުމުގެ ގޮތުން ކުރިއަށްގެންދަވާ އޮޕަރޭޝަނެއްކަމަށްވެސް އެމްއެންޑީއެފްއިން ވިދާޅުވެއެވެ.
މި އޮޕަރޭޝަނުގައި އުޅަނދު ފަހަރުގެ ސަލާމަތީ ސެޓްފިކެޓްގައި ބަޔާންކޮށްފައި ހުންނަ ކަންކަން ފުރިހަމަ ކުރެވިފައިވޭތޯ ބެލުން ކުރިއަށްދާނެއެވެ. އޭގެ ތެރޭގައި މެރިން ވީ.އެޗް.އެފް ޗެކް ކުރުމާއި އުޅަނދުގެ ކެޕްޓަން އަތުގައި ކަނޑުގެ އުޅަނދު ދުއްވުމުގެ ލައިސަންސް އޮތްތޯ ބެލުމުގެ އިތުރުން ދަތުރުވެރިންގެ ސަލާމަތާއި ރައްކާތެރިކަމާ ގުޅޭ ކަންކަން ބެލުމަށް ހިމެނެއެވެ. އަދި މާލޭގެ ބަނދަރުން ފުރާ އުޅަނދުތަކާއި މާލޭގެ ބަނދަރަށް ވަންނަ އުޅަނދުފަހަރުވެސް ޗެކް ކުރާނެއެވެ.
މި އޮޕަރޭޝަން ކުރިއަށްދާނީ މިމަހުގެ 19 އިން 24 ވަނަ ދުވަހާއި ހަމައަށެވެ.
އެކި މުނާސަބުތަކާއި ގުޅިގެން އަންނަ ބަންދުތަކާ ދިމާކޮށް، އުޅަނދުތަކުގެ ރައްކާތެރިކަން ބެއްލެވުމަށް އެމްއެންޑީއެފް އަދި ފުލުހުން ގުޅިގެން ހާއްސަ އޮޕަރޭޝަންތައް ހިންގަވަމުންދެއެވެ.
މިއީ ޢީދު ބަންދާއި ސްކޫލް ބަންދު ދުވަސްވަރަށްވުމާއެކު، ގިނަ ބަޔަކު އަންނަނީ އަތޮޅުތަކަށް އަދި މާލެއަށް ދަތުރުކުރަމުންނެވެ.