ޔޫކްރެއިނަށް އަރައިގެން އުޅޭ ރަޝިޔާގެ އިސްތިއުމާރީ ސިފައިންނާ ޔޫކްރެއިނުގެ ފައުޖުތަކުން ކުރަމުންދާ ހަނގުރާމައިގެ ކުރީ ސަފަށް އެ ޤައުމުގެ ރައީސް ވޮލޮޑޮމީރް ޒެލެންސްކީ ޒިޔާރަތް ކުރައްވައިފިއެވެ. ޒެލެންސްކީ ވަޑައިގަންނަވާފައި ވަނީ ޔޫކްރެއިނުގެ އިރުމަތީގައި އޮންނަ ޑޮނެޓްސްކުގެ ރަށެއް ކަމުގައިވާ އަވްދީވްކާއަށެވެ. ޑޮނެޓްސްކަކީ އިރުމަތީ ޔޫކްރެއިނުގެ ދޮންބާސް ސަރަޙައްދުގެ މައި އެއް ސަރަޙައްދެވެ.
ދޮންބާސްގައި ހިމެނޭ ޑޮނެޓްސްކާއި ލުހާންސްކްގެ ބޮޑު ބައެއް މިހާރު ވެސް އޮތީ ރަޝިޔާ ސިފައިން އަތްދަށުގައެވެ. އެ ދެ ސަރަޙައްދުގައި ހިމެނޭ އެހެން ރަށްތައް ހިފުމަށް ރަޝިޔާ ސިފައިން މަސައްކަތް ކުރަމުންދާއިރު، ޑޮނެޓްސްކުގައި އޮންނަ ބަޚްމުތްގެ ބޮޑު ސަރަޙައްދަކަށް އަރައިގަނެފައިވާނެ ކަމުގައި ރަޝިޔާގެ ފައުޖުތަކުން ބުނެއެވެ.
ބަޚްމުތްގެ އިތުރުން އަވްދީވްކާއަށް ވެސް ރަޝިޔާ ސިފައިން ދަނީ ވަރުގަދަ ހަމަލާތަކެއް ދެމުންނެވެ. އަދި، ބަޚްމުތެކޭ އެއް ފަދައިން ރަޝިޔާގެ މިސައިލާއި ރޮކެޓާއި އާޓިލަރީ ބަޑީގެ ހަމަލާތަކުގައި އަވްދީވްކާގެ ބޮޑު ސަރަޙައްދެއް ވެސް އޮތީ ސުންނާފަތި ކޮށްލާފައެވެ.
އަވްދީވްކާއަށް ކުރެއްވި ދަތުރުފުޅުގައި ޒެލެންސްކީ ވަނީ އެ ރަށް ދިފާޢުކުރުމަށް ހަނގުރާމަ ކުރަމުންދާ ޔޫކްރެއިންގެ ސިފައިންނާ ބައްދަލުކުރައްވައި، އެ މީހުންނާ އެކު ވަގުތުކޮޅެއް ހޭދަ ކުރައްވާފައެވެ. ޒެލެންސްކީ އަވްދީވްކާއަށް ވަޑައިގަންނަވާފައި ވަނީ، ރަޝިޔާ ސިފައިން އަތްގަދަކޮށްފައިވާ ޔޫކްރެއިނުގެ ދެ ސަރަޙައްދަކަށް އެ ޤައުމުގެ ރައީސް ވްލަޑިމިޔަރ ޕުޓިން ވެސް ޒިޔާރަތް ކުރައްވާފައިވާ ދަނޑިވަޅެއްގައެވެ.
ޕުޓިން ވަޑައިގަންނަވާފައި ވަނީ ލުހާންސްކާއި ޚަރްސަނަށެވެ. ޚަރްސަނަކީ ޔޫކްރެއިނުގެ ދެކުނުގައިވާ ސަރަޙައްދެކެވެ. އަދި، ލުހާންސަކީ އެ ޤައުމުގެ އިރުމަތީގައިވާ ދޮންބާސް އެކުލެވިގެންދާ ދެ ސަރަޙައްދުގެ ތެރެއިން އެއް ހިސާބެވެ. ޚަރްސަނަށް ކުރެއްވި ދަތުރުފުޅުގައި ރަޝިޔާގެ އަސްކަރިއްޔާގެ އިސް އޮފިސަރުންގެ ބައްދަލުވުމެއްގައި ޕުޓިން ބައިވެރިވެ ވަޑައިގެންނެވިއެވެ.
ލުހާންސްކަށް ވަޑައިގަންނަވައި، ރަޝިޔާގެ ނޭޝަނަލް ގާޑުގެ މައި މަރުކަޒަށް ވެސް އޭނާ ޒިޔާރަތްކުރެއްވިއެވެ. އަދި، ޔޫކްރެއިނަށް އޭނާ ފޮނުވި ސިފައިންގެ އިސް އޮފިސަރުންނާ ބައްދަލުކުރެއްވިއެވެ. އޭގެ ކުރިން އޭނާ ވަނީ ކްރައިމިޔާގެ އިތުރުން ޑޮނެޓްސްކުގެ އެހެން ރަށެއް ކަމުގައިވާ މަރިޔުޕޮލްއަށް ވެސް ވަޑައިގަންނަވާފައެވެ. ކްރައިމިޔާއަކީ 2014 ވަނަ އަހަރު ރަޝިޔާއިން ފޭރިގަނެފައިވާ ބިމެކެވެ.
2022 ވަނަ އަހަރުގެ ފެބްރުވަރީ މަހުގެ 24 ވަނަ ދުވަހު ޔޫކްރެއިނަށް އަރައި ރަޝިޔާގެ ސިފައިން ފެށި ހަނގުރާމައިގައި އަތްގަދަކޮށްފައިވާ ޔޫކްރެއިނުގެ ސަރަޙައްދުތަކުގެ ތެރޭގައި ހިމެނެނީ އިރުމަތީގައިވާ ލުހާންސްކާއި ޑޮނެޓްސްކުގެ އިތުރުން ދެކުނުގައިވާ ޒަޕޮރީޜިޔާއާއި ޚަރްސަނެވެ. ނަމަވެސް، ޔޫކްރެއިނުގެ ފައުޖުތަކުން 2022 ވަނަ އަހަރުގެ ނޮވެންބަރު މަހުގެ ތެރޭގައި ޚަރްސަންގެ ބޮޑު ސަރަޙައްދެއް ވަނީ މިނިވަންކޮށްފައެވެ