މޯލްޑިވްސް ސްޓޭޓް ޝިޕިން (އެމްއެސްއެސް)ގެ މެނޭޖިން ޑިރެކްޓަރުގެ މަގާމަށް ކެޕްޓަން މުހައްމަދު ނާޒިމް އައްޔަންކޮށްފިއެވެ. އެމްޑީއަށް އައްޔަން ކުރުމުގެ ކުރިން އޭނާ ހުންނެވީ އެމްއެސްއެސްގެ އެގްޒެކެޓިވް ޑިރެކްޓަރުގެ މަގާމުގައެވެ. އަދި އޭގެކުރިން އެ ކުންފުނީގެ ޖެނެރަލް މެނޭޖަރުކަންވެސް ކުރައްވާފައިވެއެވެ.
އެސްޓީއޯގެ ސަބްސިޑަރީ ކުންފުންޏެއްގެ ގޮތުގައި އެމްއެސްއެސް އުފައްދާފައިވަނީ 2020 ވަނަ އަހަރުއެވެ. ކެޕްޓަން ނާޒިމް އަންނަނީ އެ ކުންފުނި އުފެދުނީއްސުރެން އެކުންފުނީގައި މަސައްކަތް ކުރަމުންނެވެ. ނާޒިމަކީ މިމަޤާމަށް ގާބިލް އަދި ތަޖުރިބާ ލިބިފައިވާ ފަރާތެއްކަމަށް އެމްއެސްއެސްއިން ވަނީ ބުނެފައެވެ.
ނާޒިމް ވަނީ ބަލްކް ކާގޯ އުފުލާ ދުނިޔޭގެ އެންމެ ބޮޑު އެއް ކުންފުނި، ޖަރުމަނުގެ އޮލެންޑޯފް ކެރިއާސްގެ ބޯޓުތަކުގައި ސެކަންޑް އަދި ތާޑް އޮފިސަރެއްގެ ވަޒީފާ 6 އަހަރު ވަންދެން އަދާކުރައްވާފައެވެ. އަދި ކަނޑުދަތުރުފަތުރާ ގުޅޭ ތަފާތު ޚިދުމަތްތައް ދޭ ދުނިޔޭގެ އެންމެ ބޮޑު އެއް ކުންފުނި، ނެދަލެންޑްސްގެ ވިލެމްސަން ހޯލްޑިންސްގެ ބޯޓުތަކުގައި ޗީފް އޮފިސަރެއްގެ ވަޒީފާއާއި ހޮންގް ކޮންގުގެ އެންގްލޯ-އީސްޓާން ލައިނުގެ ބޯޓުތަކުގައި ފަސްޓް އޮފިސަރެއްގެ މަގާމުގައި 4 އަހަރު އޭނާ ވަނީ މީގެކުރިން މަސައްކަތްކޮށްފައެވެ.
އެމްއެސްއެސްގެ މެނޭޖިން ޑިރެކްޓަރުގެ މަގާމު ހުސްވީ އެ މަގާމުގައި ހުންނެވި އަބްދުﷲ ސައީދު، އެސްޓީއޯގެ މެނޭޖިން ޑިރެކްޓަރަކަށް މި މަހުގެ 4ގައި އައްޔަންކުރެއްވުމުންނެވެ.