ސަޢޫދީ ޢަރަބިއްޔާގެ ޚާރިޖީ ވަޒީރު ޕްރިންސް ފައިޞަލް ބިން ފަރްޙާން ސޫރިޔާގެ ވެރިރަށް ދިމިޝްޤަށް ވަޑައިގަންނަވައި، އެ ޤައުމުގެ ރައީސް ބައްޝާރު ހާފިޛުލް އަސަދާ ބައްދަލުކުރައްވައިފިއެވެ. މިއީ، 2011 ވަނަ އަހަރު ފެށި ސޫރިޔާގެ ދާޚިލީ ހަނގުރާމައާ ގުޅިގެން ދެ ޤައުމުގެ ދެމެދުގައި އޮތް ޚާރިޖީ ގުޅުން މެދުކެނޑުމަށް ފަހު އަސަދާއި ޕްރިންސް ފައިޞަލް ބައްދަލުކުރައްވާ ފުރަތަމަ ފަހަރެވެ.
ޕްރިންސް ފައިޞަލްގެ ދަތުރުފުޅާ އެކު ޤަރުނެއްގެ މެދުކެނޑުމަކަށް ފަހު ދެ ޤައުމުގެ ދެމެދުގައި އޮތް ގުޅުންތައް އަލުން ބަދަހިކުރަން ފެށިފައިވާ ކަމުގައި ސޫރިޔާގެ ދަޢުލަތުގެ މީޑިޔާ ސަނާއިން ރިޕޯޓުކުރެއެވެ. އަސަދުގެ ސަރުކާރަކީ އީރާނާ ގާތް ގުޅުމެއް ބާއްވަމުން އަންނަ ސަރުކާރެކެވެ.
"ސަޢޫދީ ޢަރަބިއްޔާއާއި ސޫރިޔާއާ ދެމެދު ގާތްގުޅުމެއް އޮންނަން ޖެހޭ. އެއީ އެންމެ ރަނގަޅު ގޮތް. މި ގުޅުންތަކުގެ ސަބަބުން ދެ ޤައުމަށް ވެސް ފައިދާ ވާނެ. އަދި މުޅި ޢަރަބި ދުނިޔޭގެ އިތުރުން މުޅި ދުނިޔެއަށް ވެސް ފައިދާތަކެއް ލިބޭނެ،" ސަނާއަށް ދެއްވި ބަސްދީގަތުމެއްގައި އަސަދު ވިދާޅުވިއެވެ.
ޕްރިންސް ފައިޞަލް ދިމިޝްޤަށް ވަޑައިގަންނަވާފައި މި ވަނީ، ހަތް އަހަރުގެ މެދުކެނޑުމަކަށް ފަހު ސަޢޫދީ ޢަރަބިއްޔާއާއި އީރާނުން ސިޔާސީ ގުޅުން އަލުން ގާއިމުކޮށްފައިވާ ދަނޑިވަޅެއްގައެވެ. ސަޢޫދީ ޢަރަބިއްޔާއާއި އީރާނާ ދެމެދު ސިޔާސީ ގުޅުން އަލުން ގާއިމުކޮށްފައި ވަނީ މާރިޗު މަހުގެ 10 ވަނަ ދުވަހުއެވެ.
ސޫރިޔާއާއި ސަޢޫދީ ޢަރަބިއްޔާއާ ދެމެދު އޮތް ގުޅުންތައް އަލުން ބަދަހިކުރުމާ ގުޅޭ ގޮތުން މަޝްވަރާ ކުރެއްވުމަށް ސޫރިޔާގެ ޚާރިޖީ ވަޒީރު ފައިޞަލް މިޤުދާދު ވެސް ދާދިފަހުން ވަނީ ރިޔާޟަށް ދަތުރުފުޅެއް ކުރައްވާފައެވެ. މި މަހުގެ 13 ވަނަ ދުވަހު ކުރެއްވި އެ ދަތުރުފުޅުގައި އޭނާ ވަނީ ޕްރިންސް ފައިޞަލާ ބައްދަލުކުރައްވައި ސޫރިޔާގެ ދާޚިލީ ހަނގުރާމަ ނިމުމަކަށް ގެނެސް، ހަމަޖެހުން ގާއިމުކުރުމާ ގުޅޭ ގޮތުން މަޝްވަރާ ކުރެއްވިއެވެ. އަދި، ސޫރިޔާގެ ދާޚިލީ ހަނގުރާމައާ ގުޅިގެން އެހެން ޤައުމުތަކަށް ހިޖުރަކޮށްފައިވާ އެ ޤައުމުގެ ރައްޔިތުން އެނބުރި ޤައުމަށް ގެންދިޔުމާ ގުޅޭ ގޮތުން ވެސް މަޝްވަރާ ކުރެއްވި ކަމުގައި ސަޢޫދީ ޢަރަބިއްޔާއިން ބުނެއެވެ.
ސޫރިޔާގެ ދާޚިލީ ހަނގުރާމަ ފެށުނީ، އަސަދުގެ ސަރުކާރާ ދެކޮޅަށް އަޑުއުފުލައި، މުޒާހަރާ ކުރުމަށް ބާއްވަމުން ދިޔަ މުޒާހަރާތަކެއް ރޫޅައިލުމަށް އޭނާގެ ސަރުކާރުން ބާރުގެ ބޭނުންކުރުމުގެ ސަބަބުންނެވެ. ހަނގުރާމަ ފެށުމާ އެކު ޢަރަބި ދުނިޔޭގެ ގިނަ ޤައުމުތަކަކުން ވަނީ ސޫރިޔާއާ ދެމެދު އޮތް ގުޅުންތައް ކަނޑައިލާފައެވެ. އަދި، ޢަރަބި ލީގުން ވެސް އެ ޤައުމު ވަނީ އެކަހެރިކޮށްފައެވެ.
ނަމަވެސް، ސޫރިޔާއާއި ޢަރަބި ދުނިޔޭގެ ޤައުމުތަކާ ދެމެދު ފަހަކަށް އައިސް ގުޅުންތައް އާލާކުރަން ފަށާފައިވާ ކަން ފާހަގަކުރެވެއެވެ. އަސަދު ދާދި ފަހުން ވަނީ މިޞްރާއި އޮމާނުގެ އިތުރުން ސަޢޫދީ ޢަރަބިއްޔާއަށް ވެސް ވަޑައިގަންނަވާފައެވެ. އަދި، އެ ޤައުމުތަކާ އެކު ގުޅުންތައް ބަދަހިކުރުމުގެ މަސައްކަތް ވަނީ ފަށާފައެވެ.