ޗައިނާގެ ވެރިރަށް ބެއިޖިންގްގެ ހޮސްޕިޓަލެއްގައި ހިނގި ނުރައްކާތެރި އަލިފާނުގެ ހާދިސާއެއްގައި 29 މީހުން މަރުވެއްޖެއެވެ. މި ހާދިސާ ހިނގާފައި ވަނީ ފެންގްޓައި ޑިސްޓްރިކްޓުގައި ހުންނަ ބެއިޖިންގް ޗޮންގްފެންގް ހޮސްޕިޓަލުގައެވެ. ހޮސްޕިޓަލުގައި ރޯވި އަލިފާންގަނޑު ނިއްވައިލެވިފައި ވަނީ ދޮޅު ގަޑިއިރުގެ މަސައްކަތަށް ފަހުއެވެ.
މި ހާދިސާގައި މަރުވި މީހުންގެ ތެރޭގައި ހިމެނެނީ 16 އަންހެނުންނާއި 13 ފިރިހެނުންނެވެ. މަރުވި މީހުންގެ ތެރެއިން 26 މީހުންނަކީ ބަލިމީހުންނެވެ. މި ހާދިސާގައި ހޮސްޕިޓަލުގައި ދެ މުވައްޒަފުންނާއި، ބަލިމީހެއްގެ ޢާއިލާ މެންބަރެއް ވެސް މަރުވިއެވެ. މި ހާދިސާގައި 42 މީހަކަށް އަނިޔާވި ކަމުގައި ހޮސްޕިޓަލުގެ އޮފިޝަލުން ވިދާޅުވެއެވެ. އޭގެ ތެރެއިން 39 މީހަކަށް އަދިވެސް ދަނީ ފަރުވާދެމުންނެވެ.
ހޮސްޕިޓަލުގައި އަލިފާނުގެ ހާދިސާ ހިނގަން މެދުވެރިވި ސަބަބު ދެނެގަތުމަށް ތަހުޤީޤު ފަށާފައިވާއިރު، މި ކަމުގައި ޒިންމާވާ ކަމަށް ބެލެވޭ 12 މީހަކު ހައްޔަރުކޮށްފައިވާ ކަމަށް ބެއިޖިންގްގެ ޢާންމު ސަލާމަތާ ބެހޭ އިދާރާގެ އިސް އޮފިޝަލެއް ކަމުގައިވާ ސުން ހައިޓާއޯ ވިދާޅުވިއެވެ. ހައްޔަރުކޮށްފައިވާ މީހުންގެ ތެރޭގައި ހޮސްޕިޓަލުގެ ޑިރެކްޓަރާއި އެ ތަނުގައި މަރާމާތުގެ މަސައްކަތްތަކެއް ކުރަމުންދިޔަ ކުންފުންޏެއްގެ މުވައްޒަފުންތަކެއް ވެސް ހިމެނެއެވެ.
ތަހުޤީޤަށް މިހާތަނަށް ހާމަވެފައިވާ ގޮތުގައި ފުރަތަމަ ރޯވެފައި ވަނީ މަރާމާތް ކުރުމުގެ މަސައްކަތްތައް ކުރިއަށްދިޔަ ބައިގައެވެ. އަދި، އިތުރު ސަރަޙައްދުތަކަށް އަލިފާންގަނޑު ވަނީ ފެތުރިފައެވެ. އަލިފާނުގެ ހާދިސާގައި މަރުވި މީހުންގެ ޢާއިލާތަކަށް ފެންގްޓައި ޑިސްޓްރިކްޓުގެ މޭޔަރުގެ ނައިބު ލީ ޒޮންގްރޮންގް ވަނީ ތަޢުޒިޔާ ވިދާޅުވެފައެވެ. އަދި، އަނިޔާވި މީހުންނަށް ސަރުކާރުން އެހީތެރިކަން ފޯރުކޮށްދޭނެ ކަމުގައި ވެސް އޭނާ ވިދާޅުވިއެވެ.
މީގެ ކުރިން ވެސް ޗައިނާގައި މި ފަދަ ނުރައްކާތެރި އަދި ހިތާމަވެރި އަލިފާނުގެ ހާދިސާތައް ހިނގާފައިވެއެވެ. 2022 ވަނަ އަހަރުގެ ނޮވެންބަރު މަހު އެ ޤައުމުގެ ހުޅަނގުއުތުރުގައިވާ ޝިންޖިއާންގްގައި ހުންނަ އެޕާޓްމަންޓް ޢިމާރާތެއްގައި ހިނގި ނުރައްކާތެރި އަލިފާނުގެ ހާދިސާއެއްގައި 10 މީހުން މަރުވިއެވެ. އަދި، ހަމަ އެ މަހު، މެދުތެރޭ ޗައިނާގައި ހުރި ކާރުޚާނާއެއްގައި ރޯވެ 38 މީހުން މަރުވިއެވެ.