އެމެރިކާގެ އިރުދެކުނު އެލެބާމާ ސްޓޭޓްގެ ޑޭޑްވިލް ކިޔާ ރަށެއްގައި ބޭއްވި އުފަންދުވަހުގެ ޕާޓީއެއްގައި ބަޑިޖަހައި ހަތަރު މީހުން މަރައިލައިފިއެވެ. ޑޭޑްވިލްއަކީ އެލެބާމާގެ ވެރިރަށް މޮންޓްގޮމެރީގެ އިރުއުތުރުން އޮންނަ ކުޑަ ރަށެކެވެ. މި ހާދިސާގައި 28 މީހުން ޒަޚަމުވި ކަމުގައި އެލެބާމާގެ ފުލުހުންގެ އިދާރާއިން ބުނެއެވެ.
ބަޑީގެ ހަމަލާ ދީފައި ވަނީ ޑޭޑްވިލްގައި ދިރިއުޅޭ އަންހެން ކުއްޖަކަށް 16 އަހަރު ފުރުން ފާހަގަކުރުމަށް ޑާންސް ސްޓޫޑިޔޯއެއްގައި ބޭއްވި ޕާޓީއެއްގައި ކަމަށް އެ ރަށުގެ ފުލުހުންގެ އިދާރާގެ ތަރުޖަމާނު ސަރޖެންޓް ޖެރެމީ ބަރކެޓް ވިދާޅުވިއެވެ. މި ހަމަލާގައި ޒަޚަމުވި 28 މީހުންގެ ތެރެއިން ބައެއް މީހުންގެ ހާލު ސީރިޔަސް ކަމުގައި ވެސް އޭނާ ވިދާޅުވިއެވެ.
ހަމަލާގައި މަރުވި މީހުންގެ ތެރޭގައި އުފަންދުވަސް ފާހަގަކުރި ކުއްޖާގެ ފިރިހެން ކޮއްކޮ ވެސް ހިމެނެއެވެ. ޕާޓީއަށް ދިޔަ މެހެމާނުންނަށް ބަޑިން ހަމަލާދީފައިވާ ސަބަބު އަދި މިހާތަނަށް ދެނެގަނެވިފައި ނުވާ ކަމަށާއި، މި ހާދިސާގެ ތަހުޤީޤު ކުރިއަށްދާ ކަމުގައި ބަރކެޓް ވިދާޅުވިއެވެ. ޑޭޑްވިލްއަކީ ގާތްގަނޑަކަށް 3,000 މީހުންގެ އާބާދީއެއް ދިރިއުޅޭ ރަށެކެވެ.
މި ހަމަލާއާ ގުޅިގެން ރައީސް ޖޯ ބައިޑަން ވަނީ ހިތާމަ ފާޅުކުރައްވާ ކަމުގައި ވިދާޅުވެފައެވެ. އަދި، އެއްވެސް ހައްޤަކާ ނުލައި ކުޑަކުދިންތަކެއްގެ ފުރާނަ ނަގައިލާފައިވާ ކަމުގައި އޭނާ ވިދާޅުވިއެވެ. "މިހާރު އަޅުގަނޑުމެންގެ ދަރިންގެ އުފަންދުވަހުގެ ޕާޓީތައް ވެސް މި ވަނީ ބިރުވެރި ކަމަކަށް ބަދަލުވެފައި. ޤައުމުގެ އަދުގެ ހާލަތާ މެދު ސުވާލު އުފެދޭ. އެމެރިކާގައި އެންމެ ގިނަ ޢަދަދަކަށް ކުޑަކުދިން މަރުވަނީ ބަޑީގެ ހަމަލާތަކުގައި. މިއީ އެއްވެސް ހާލެއްގައި ބަލައިގަނެވޭނެ ކަމެއް ނޫން،" ބައިޑަން ވިދާޅުވިއެވެ.
ޑޭޑްވިލްގައި ދިން ބަޑީގެ ހަމަލާތަކުގައި ޒަޚަމުވި 15 މީހަކަށް ފަރުވާދީފައި ވަނީ ލޭކް މާޓިން ކޮމިޔުނިޓީ ހޮސްޕިޓަލުގައެވެ. އެ އެންމެންނަކީ ވެސް ޒުވާން އުމުރުފުރައިގެ ކުދިން ކަމުގައި އެ ހޮސްޕިޓަލުން ބުންޏެވެ. އަދި، އެ ހުރިހާ ކުދިންގެ ހަށިތަކަށް ވެސް ވަޒަން އަރާފައިވާ ކަމުގައި އެ ހޮސްޕިޓަލުން ބުންޏެވެ.
އޭގެ ތެރެއިން ހަ ކުއްޖަކަށް ފަރުވާދިނުމަށް ފަހު ދޫކޮށްލާފައިވާއިރު، ނުވަ ކުއްޖަކު ވަނީ އިތުރު ފަރުވާ ކުރުމަށް އެހެން މަރުކަޒުތަކަށް ބަދަލުކޮށްފައެވެ. އޭގެ ތެރެއިން ފަސް ކުއްޖެއްގެ ހާލު ސީރިޔަސް ކަމުގައި ހޮސްޕިޓަލުގެ އޮފިޝަލުން ވިދާޅުވެއެވެ. ޑޭޑްވިލްގައި ހަމަލާދިން ދުވަހު، އެމެރިކާގެ އިރުދެކުނުގައިވާ ކެންޓަކީ ސްޓޭޓްގެ ލުއީވިލްގައި ވެސް ބަޑިޖަހައި ދެ މީހުން ވަނީ މަރައިލާފައެވެ.އެ ހަމަލާގައި އިތުރު ހަތަރު މީހަކު ޒަޚަމުވިއެވެ.
ހަމަ އެ ރަށުގެ ބޭންކެއްގެ ތެރޭގައި މީގެ ހަފުތާއެއްހާ ދުވަސް ކުރިން ދިން ބަޑީގެ ހަމަލާތަކެއްގައި ފަސް މީހަކު ވަނީ މަރުވެފައެވެ. އެ ހަމަލާގައި މަރުވި ފަސް މީހުންނަކީ ވެސް ބޭންކުގެ މުވައްޒަފުންނެވެ.
އެމެރިކާގެ އާބާދީ 330 މިލިޔަނަށް އަރާއިރު، އެ ޤައުމުގެ ޢާންމުން ރައްޔިތުން 400 މިލިޔަނަށް ވުރެ ގިނަ ބަޑި ފަދަ ހަތިޔާރު ގެންގުޅެއެވެ. އަދި، މިފަދަ މާސް ޝޫޓިން ނުވަތަ ބަޑީގެ ހަމަލާތައް ފަހަކަށް އައިސް ވަނީ ޢާންމުވެފައެވެ. ޑޭޑްވިލްގެ ހަމަލާދީފައި މި ވަނީ، އެ ޤައުމުގައި ހިނގާފައިވާ މި ފަދަ އެންމެ ހިތާމަވެރި އެއް ހާދިސާއަށް 16 އަހަރު ފުރުމާ ދިމާކޮށެވެ. 2007 ވަނަ އަހަރު ވަރޖިނިޔާ ޓެކް ސްކޫލްގައި ދިން ބަޑީގެ ހަމަލާތަކެއްގައި 32 މީހުން މަރުވިއެވެ.
މި އަހަރުގެ މިހާތަނަށް އެމެރިކާގައި މި ފަދަ މާސް ޝޫޓިންގެ 163 ހާދިސާ ހިނގާފައިވާ ކަމަށް މަސްރަޙު ދިރާސާ ކުރާ ފަރާތްތަކުން ބުނެއެވެ. މާސް ޝޫޓިންގެ ގޮތުގައި ބެލެނީ މަދުވެގެން ހަތަރު މީހެއްގެ ފުރާނައަށް ނުރައްކާވާ ބަޑި ޖެހުމުގެ ހާދިސާތަކަށެވެ. ޢާންމުންނަށް ބަޑި ގެންގުޅުމުގެ ހައްޤު ހަނިކުރުމަށް ބައިޑަން ގެންދަވަނީ މަސައްކަތް ކުރައްވަމުންނެވެ. ނަމަވެސް، އިދިކޮޅު ރިޕަބްލިކަން ޕާޓީން ދަނީ އެ މަސައްކަތްތަކަށް ހުރަސް އަޅަމުންނެވެ.