އީފާސް މޯބައިލް އެޕްލިކޭޝަން އަޕްގްރޭޑްކުރުމުގެ މަސައްކަތްތަކެއް ކުރަމުންދާތީ، އެޕްގައި ހިމެނޭ ބައެއް ޚިދުމަތްތައް ބޭނުންކުރުމުގައި ދަތިތަކާ ކުރިމަތިވެދާނެ ކަމަށް ނޭޝަނަލް ސެންޓަރ ފޮރ އިންފޮމޭޝަން ޓެކްނޮލޮޖީން ވިދާޅުވެއްޖެއެވެ.
އެންސީއައިޓީން ވިދާޅުވީ، މިކަމާގުޅޭ މަސައްކަތްތައް ކުރިއަށް އޮތް 10 ދުވަހަށް ކުރިޔަށްދާނެކަމަށެވެ.
އީފާސްއަކީ 2012ވަނަ އަހަރުން ފެށިގެން ނޭޝަނަލް ސެންޓަރ ފޮރ އިންފޮމޭޝަން ޓެކްނޯލޮޖީން ތަރައްޤީކޮށް ބަލަހައްޓަމުން އަންނަ ނިޒާމެކެވެ. މިއީ ސަރުކާރާއި ދައުލަތުގެ މުވައްސަސާތަކުން އޮންލައިންކޮށް ފޯރުކޮށްދޭ ޚިދުމަތްތައް ފޯރުކޮށްދިނުމުގައި، ބޭނުންކުރަމުން އަންނަ ޑިޖިޓަލް އައިޑެންޓިޓީގެ ނިޒާމެވެ.
މި ޚިދުމަތް ފުޅާކުރުމަށް އީފާސް އެޕްލިކޭޝަން އެކުލަވާލާ ބޭނުންކުރަމުން އަންނައިރު، ޚިދުމަތް ލުއިފަސޭހަކުރުމަށް އެޕްލިކޭޝަނަށް އަންނަނީ ބަދަލު ގެންނަމުންނެވެ. އެގޮތުން މިހާރު ލިބޭ ޚިދުމަތްތައް އަޕްގްރޭޑްކުރުމާއި، އިތުރު ޚިދުމަތްތަކާއި ފީޗަރސްތައް އީފާސްގެ ތެރެއިން ލިބޭނެ ގޮތް ހެދުން ހިމެނެއެވެ.
އެންސީއައިޓީން ވިދާޅުވީ، މިހާރު ކުރިއަށްދާ އަޕްގްރޭޑިންގެ މަސައްކަތްތައް ކުރިއަށް އޮތް 10 ދުވަހަށް ހިނގަމުންދާނެ ކަމަށާއި އެ މަސައްކަތްތައް ކުރިއަށްދާއިރު، އެޕްލިކޭޝަންގެ ބައެއް ބައިތައް މަސައްކަތް ނުކުރުން އެކަށީގެންވާ ކަމަށެވެ. މި މަސައްކަތްތައް ނިމުނުހާ އަވަހަށް އެކަން އަންގަވާނެކަމަށެވެ. އަދި ކުރިއެކޭ އެއްގޮތަށް މައްސަލަ ދިމާނުވެ އެޕްލިކޭޝަންގެ ޚިދުމަތްތައް ބޭނުންކުރެވޭނެކަމަށް އެންސީއައިޓީން ވިދާޅުވެއެވެ.
ޚިދުމަތްތައް އޮންލައިންކޮށް، ޑިޖިޓަލައިޒްކުރުމަށް ކުރިއަށްގެންދާ މަސައްކަތުގައި ރާއްޖެއިން އަންނަނީ ބޮޑެތި ކުރިއެރުން ހޯދަމުންނެވެ. އަދި މި ޚިދުމަތް ބޭނުންކުރާ މީހުން އަންނަނީ އިތުރުވަމުންނެވެ. އެގޮތުން މިހާތަނަށް 137000 އަށްވުރެ ގިނަ މީހުން މި ޚިދުމަތުގައި ރަޖިސްޓްރީކޮށްފައިވެއެވެ. އަދި 440 އަށްވުރެ ގިނަ ޚިދުމަތް މި ޕޯޓަލްގެ ތެރެއިން އަންނަނީ ފޯރުކޮށްދެމުންނެވެ.
އީފާސް ނިޒާމުގެ ތެރެއިން ޑިޖިޓަލް އައިޑީ ކާޑްގެ ޚިދުމަތް ފެށުމަށްވެސް ވަނީ ތައްޔާރުވެފައެވެ. މިއާއެކުވެސް މި އެޕްލިކޭޝަން ބޭނުންކުރާ މީހުންގެ މިންވަރު މިހާރަށްވުރެ އިތުރުވާނެއެވެ.