ހަތިޔާރު އެޅި ބަޔަކު މެކްސިކޯގެ ރިސޯޓަކަށް ވަދެ ބަޑިން ހަމަލާދީ ކުޑަކުއްޖަކާއި އިތުރު ހަ މީހުން މަރައިލައިފިއެވެ. މި ހާދިސާ ހިނގާފައި ވަނީ މެކްސިކޯގެ މެދުތެރޭގައިވާ ގުވަނަހުވަތޯ ސްޓޭޓްގެ ކޮރްތަޒާރް ކިޔާ ރަށެއްގައި ހުންނަ ލަ ޕާލްމާ ރިސޯޓުގައެވެ. ގުވަނަހުވަތޯއަކީ މަސްތުވާތަކެތީގެ ވިޔަފާރިކުރާ ގިނަ ޢަދަދެއްގެ ނުރައްކާތެރި ގުރޫޕުތެއް ހަރަކާތްތެރިވާ ސަރަޙައްދެކެވެ.
ހަތިޔާރު އެޅި ބަޔަކު އެ ރިސޯޓެއް ވަދެ ދިން ހަމަލާތަކުގައި މަރުވި މީހުންގެ ތެރޭގައި ހިމެނޭ ކުޑަކުއްޖާގެ އުމުރަކީ ހަތް އަހަރެވެ. މި ހަމަލާގައި ދެން މަރުވެފައި ވަނީ ތިން އަންހެނުންނާއި ތިން ފިރިހެނުންނެވެ. މި ހާދިސާގައި އިތުރު މީހަކު ޒަޚަމުވެފައިވާ ކަމަށާއި، އޭނާއަށް ފަރުވާދެމުންދާ ކަމުގައި ކޮރްތަޒާރުގެ އޮފިޝަލުން ވިދާޅުވެއެވެ.
ގުވަނަހުވަތޯގައި ހަރަކާތްތެރިވާ މަސްތުވާތަކެތީގެ ވިޔަފާރިކުރާ ގުރޫޕުތަކުގެ މެދުގައި ހިނގާ ހަމަނުޖެހުންތައް ފަހަކަށް އައިސް އިތުރުވެފައިވާ ކަމުގައި އެ ރަށުގެ އޮފިޝަލުން ވިދާޅުވެއެވެ. މި ހަމަނުޖެހުންތަކުގެ ފަހަތުގައި ވަނީ އެކި ސަރަޙައްދުތަކަށް އަތްގަދަކުރުން ގުރޫޕުތަކުން ކުރަމުންދާ މަސައްކަތްތައް ކަމުގައި ވެސް އޮފިޝަލުން ވިދާޅުވެއެވެ.
ލަ ޕާލްމާ ރިސޯޓުގައި ދިން ހަމަލާދިނީ ކޮން ގުރޫޕެއް ކަން އަދި ސާފު ނުވާ ކަމުގައި އޮފިޝަލުން ވިދާޅުވެއެވެ. ހަމަލާއަށް ފަހު އެ މީހުން އެ ތަން ދޫކޮށް ގޮސްފައި ވަނީ އެ ތަނުގައި ހުރި ސީ.ސީ.ޓީ.ވީ ސިސްޓަމް ހިފައިގެން ކަމުގައި މަންޒަރު ފެނުނު މީހުން ބުނޏެވެ. އެ ކަމާ ގުޅިގެން މި ހާދިސާގެ ތަހުޤީޤެއް ބޮޑެތި ހުރަސްތަކެއް ވަނީ ކުރިމަތިވެފައެވެ.