އެފްރިކާ ބައްރުގެ ޤައުމެއް ކަމުގައިވާ ޑިމޮކްރެޓިކް ރިޕަބްލިކް އޮފް ކޮންގޯގެ އިރުމަތީގައިވާ އިތޫރީ ޕުރޮވިންސުގެ އަވަށްތަކަކަށް ހަމަލާދީ ޢާންމުންގެ 43 މީހުން މަރާލައިފިއެވެ.
އިތޫރީ ޕުރޮވިންސުގެ ތިން އަވަށަކަށް ހަމަލާދިނީ އެ ޤައުމުގައި ހަރަކާތްތެރިވާ ހަނގުރާމަވެރި ޖަމާޢަތެއް ކަމުގައިވާ "ކޯޕޮރޭޓިވް ފޯރ ދަ ޑެވޮލޮޕްމަންޓް އޮފް ދަ ކޮންގޯ" (ކޮޑޭކޯ)ން ކަމުގައި ކޮންގޯގެ އޮފިޝަލުން ވިދާޅުވެއެވެ. ކޮޑޭކޯއަކީ ކޮންގޯގެ ސަރުކާރާ ދެކޮޅަށް ހަނގުރާމަ ކުރަމުންދާ ހަތިޔާރުއެޅި ޖަމާޢަތެކެވެ. އެ ޖަމާޢަތް އެކުލެވިގެން ވަނީ ލެންޑޫ ދަރިކޮޅުގެ މީހުންގެ މައްޗަށެވެ. އިތޫރީ ޕުރޮވިންސުގެ ވެރިރަށް ބުނީޔާއާ 60 ކިލޯމީޓަރު ދުރުގައި އޮތް ތިން އަވަށަކަށް ކޮޑޭކޯއިން ހަމަލާދީފައިވާ ކަމުގައި ރިޕޯޓުތައް ބުނެއެވެ.
އިތޫރީގެ އޮފިޝަލެއް ކަމުގައިވާ އިނޮސެންޓް މަޓުކަޑަލާ ވިދާޅުވީ ކޮޑޭކޯއިން އަވަށްތަކަށް ހަމަލާދީ ޢާންމުންގެ ގިނަ ޢަދަދެއްގެ ބަޔަކު މަރާލާފައި ވަނީ ފަތިހުގެ ވަގުތެއްގައި ކަމުގައެވެ. އަދި، ކޮންގޯގެ އަސްކަރިއްޔާއަށް އެ ސަރަޙައްދަށް ދެވިފައި ވަނީ ހަމަލާއަށް ފަހު ތިން ގަޑިއިރު ފާއިތުވި ފަހުން ކަމުގައިވެސް އޭނާ ވިދާޅުވިއެވެ. ކޮޑޭކޯގެ ހަމަލާތަކުގައި 43 މީހުން މަރުވެފައިވާކަން ކަށަވަރުވާއިރު، އޭގެ ތެރޭގައި ފަސް ކުޑަކުދިން ވެސް ހިމެނޭ ކަމުގައި ހަތޫރީގެ މަދަނީ ޖަމުޢިއްޔާގެ އިސް އޮފިޝަލެއް ކަމުގައިވާ ރޮބަރޓް ބަސިލޮކޯ ބުންޏެވެ. މިފަދަ ހަމަލާތަކުގައި ކޮންމެ ދުވަހަކުވެސް ބަޔަކު މަރުވަމުންދާ ކަމުގައި އޭނާ ބުންޏެވެ.
ކޮންގޯގެ އިރުމަތީގެ ސަރަޙައްދުތަކުގައި ގިނަ ޢަދަދެއްގެ ހަތިޔާރުއެޅި ޖަމާޢަތްތައް ހަރަކާތްތެރިވެއެވެ. އަދި، އިތޫރީ ޕުރޮވިންސަކީ އެ ޖަމާޢަތްތަކުން ކޮންޓްރޯލް ކުރަން ބޭނުންވާ ސަރަޙައްދެކެވެ. މި ކަމާ ގުޅިގެން، އެ ސަރަޙައްދުގައި ދޭ ހަމަލާތަކުގެ ޢަދަދުތައް ފަހަކަށް އައިސް ވަނީ އިތުރުވެފައެވެ.