އިންޑޮނީޝިޔާގެ މައި ރަށް ކަމުގައިވާ ޖާވާގެ އުތުރު ފަރާތުގައި އޮންނަ ކަނޑަށް ރިކްޓަރ މިންގަނޑުން 7 ގެ ބާރުމިނުގައި ބިންހެލުމެއް އަތުވެއްޖެއެވެ. މި ބިންހެލުމާ ގުޅިގެން ސުނާމީ އުފެދިދާނެ ކަމުގެ އިންޒާރު ދީފައެއް ނުވެއެވެ. ބިންހެލުން އައިސްފައި ވަނީ 594 ކިލޯމީޓަރު އަޑިއަށް ކަމުގައި އެ ޤައުމުގެ ބިންހެލުންތައް ދިރާސާކުރާ އިދާރާއިން ބުނެއެވެ.
ބިންހެލުމާ ގުޅިގެން ޖާވާގެ އުތުރުގެ ގިނަ ސަރަޙައްދުތަކަށް ބާރުގަދަ ލޮޅުންތަކެއް އެރިއެވެ. ނަމަވެސް، އެއްވެސް މީހަކަށް އަނިޔާވި ކަމުގެ ރިޕޯޓެއް ކޮށްފައެއް ނެތެވެ. އަދި، ޢިމާރާތަކަށް ގެއްލުންވެފައިވާ ކަމުގެ މަޢުލޫމާތެއް ވެސް ރިޕޯޓްކޮށްފައެއް ނެތެވެ. އިންޑޮނީޝިޔާ އޮންނަ "ރިންގް އޮފް ފަޔަރ"ގެ ނަން ދީފައިވާ ސަރަޙައްދަކީ އަލިފާން ފަރުބަދަތަކާއި ބިންހެލުންތައް ގިނަ ސަރަޙައްދެކެވެ.
ބިންހެލުން އައިސްފައި ވަނީ އެ ޤައުމުގެ ދެވަނައަށް އެންމެ އާބާދީ ބޮޑު ސުރަބާޔާ ސަރަޙައްދުގެ ހުޅަނގުއުތުރުން 160 ކިލޯމީޓަރު ދުރަށެވެ. އެއީ، ދެ މިލިޔަނަށް ވުރެ ރައްޔިތުން ދިރިއުޅޭ ސަރަޙައްދެކެވެ. ޖާވާގެ ބޮޑު ބަޔަކަށް ބިންހެލުމުގެ ލޮޅުންތައް އިހުސާސްކުރެވުނު އިރު، ބާލީއާއި ލޮމްބޮކަށް ވެސް ލޮޅުންތައް އަރާފައިވެއެވެ.
ރިކްޓަރ މިންގަނޑުން 7 ގެ ބާރުމިނުގައި އައި ބިންހެލުމުގެ ގަޑިއެއްގެ އިރު ކުރިން އެ ސަރަޙައްދަށް ރިކްޓަރ މިންގަނޑުން 5.5 ގެ ބާރުމިނުގައި އިތުރު ބިންހެލުމަށް އައިސްފައިވެއެވެ. އިންޑޮނީޝިޔާގެ ކާރިސާތަކާ ބެހޭ އިދާރާގެ ތަރުޖަމާނު ޢަބްދުލް މުހާރީ ވިދާޅުވީ، ބިންހެލުމުގައި ބޮޑު ގެއްލުންތަކެއް ލިބިފައި ނުވަނީ، ބިންހެލުން އައި ފުންމިނުމުގެ ސަބަބުން ކަމުގައެވެ.
2022 ވަނަ އަހަރުގެ ނޮވެމްބަރު މަހު ހުޅަނގު ޖާވާ ސަރަޙައްދަށް ރިކްޓަރ މިންގަނޑުން 5.6 ގެ ބާރުމިނުގައި އައި ބިންހެލުމަކާ ގުޅިގެން 602 މީހުން ވަނީ މަރުވެފައެވެ. ގިނަ ޢަދަދެއްގެ ބަޔަކު މަރުވެފައި ވަނީ ބިންހެލުމުގައި ވެއްޓުނު ޢިމާރާތްތަކުގެ ދަށުވެ، ނުވަތަ ބިންގަނޑު ކަނޑައިގެން ދިޔުމުގެ ސަބަބުންނެވެ. އޭޕްރިލް 3 ވަނަ ދުވަހު ވެސް ސުމާޓްރާ ކައިރިއަށް ރިކްޓަރ މިންގަނޑުން 6.1ގެ ބާރުމިނުގައި ބިންހެލުމެއް އައެވެ.