މިއަދު ކުރިއަށްދާ ރައްޔިތުންގެ މަޖިލީހުގެ ގުރައިދޫ ދާއިރާގެ ބައި-އިލެކްޝަންގައި މިހާތަނަށް ވޯޓްލާފައިވަނީ ވޯޓްލުމުގެ ޙައްޤު ލިބިފައިވާ މީހުންގެ ތެރެއިން 32 އިންސައްތަ މީހުންކަމަށް އިލެކްޝަންސް ކޮމިޝަނުން ހާމަކުރައްވައިފިއެވެ.
އިލެކްޝަންސް ކޮމިޝަނުން އެންމެފަހުން ޢާއްމުކުރައްވައިިފައިވާ މައުލޫމާތުތައް ދައްކާގޮތުން ވޯޓްލުމުގެ ޙައްޤު ލިބިފައިވާ 3423 މީހުންގެ ތެރެއިން މިހާތަނަށް ވޯޓްލާފައިވަނީ 1097 މީހުންނެވެ. މިއީ ވޯޓްލުމުގެ ޙައްޤުލިބިފައިވާ މީހުންގެ 32.05 އިންސައްތައެވެ.
މިހާތަނަށް ވޯޓްލީ މީހުންގެ ތެރޭގައި ހިމެނެނީ 566 ފިރިހެނުންނާއި 531 އަންހެނުންނެވެ.
މި އިންތިޚާބުގެ ވޯޓުލުން ކުރިއަށްދަނީ ގުރައިދޫ ދާއިރާގައި ހިމެނޭ 3 ރަށްކަމަށްވާ ގުރައިދޫ، މާފުށި، ގުޅީގެ އިތުރުން މާލެ ސިޓީގައެވެ.
އިލެކްޝަންސް ކޮމިޝަނުން ކަނޑައަޅުއްވައިފައިވަނީ ގުރައިދޫ ދާއިރާގެ ބައި-އިލެކްޝަންގެ ވޯޓުލުން މިއަދު ހެނދުނު 8:00 ން ހަވީރު 4:00 އާ ހަމައަށް ކުރިއަށްގެންދެވުމަށެވެ. އަދި ހަވީރު 4:00 ޖަހާއިރު ވޯޓު ފޮށި ކައިރީގައި ވޯޓުލާން މީހަކު ނެތްނަމަ ފޮށި ބަންދުކުރައްވައި 30 މިނެޓުފަހުން ވޯޓު ގުނަން ފެށްޓެވުމަށްވެސް އިލެކްޝަންސް ކޮމިޝަނުން ވަނީ ނިންމަވައިފައެވެ.
މިފަހަރުގެ ބައި-އިލެކްޝަން ރޯދަމަހު ކުރިއަށް ދިޔަނަމަވެސް، އިންތިޚާބުގެ ކަންކަމަށްވެސް އެއްވެސް ބަދަލެއް ގެންނަވައިފައެއް ނުވެއެވެ.
ގުރައިދޫ ދާއިރާގެ ބައި-އިލެކްޝަންގައި ޖުމްލަ 6 ވޯޓު ފޮށީ ވަނީ ބަހައްޓަވައިފައެވެ. އެއީ ގުރައިދޫގައި 2 ފޮށި، މާފުށީގައި 2 ފޮށި، ގުޅީގައި 1 ފޮށި އަދި ގުރައިދޫ ދާއިރާގެ މީހުން ވޯޓުލުމަށް މާލޭ ޢިއްޒުއްދީން ސްކޫލްގައި 1 ފޮށްޓެވެ. މި ބައި-އިލެކްޝަންގައި ޖުމްލަ 3423 މީހަކަށް ވޯޓުލުމުގެ ޙައްޤު ލިބިގެންވެއެވެ.
ގުރައިދޫ ދާއިރާގެ ބައި-އިލެކްޝަންގައި 3 ޕާޓީއަކުން 3 ކެނޑިޑޭޓެއް ވާދަކުރެއެވެ. އެއީ ޕީޕީއެމްގެ ކެނޑިޑޭޓް ޙުސައިން ރިޒާއާއި، އެމްޑީޕީގެ ކެނޑިޑޭޓް އިބްރާޙިމް ޝާޒްގެ އިތުރުން މޯލްޑިވްސް ނެޝަނަލް ޕާޓީގެ ކެނޑިޑޭޓް ޢަލީ ޢާރިފެވެ.
ގުރައިދޫ ދާއިރާގެ ބައި-އިލެކްޝަން މި ބާއްވަނީ އެ ދާއިރާގެ މެންބަރުކަމުގައި ހުންނެވި އަލްއުސްތާޛް އިބްރާހީމް ރިޒާ ކެންސަރުގެ އާލާސްކަންފުޅެއްގައި ފެބުރުއަރީ 23 ވަނަ ދުވަހު އަވަހާރަވުމާ ގުޅިގެންނެވެ.
މިއީ މިހާރު ހިނގަމުންދާ 19 ރައްޔިތުންގެ މަޖިލީހުގެ 2 ވަނަ ބައި-އިލެކްޝަނެވެ. މީގެ ކުރިންވަނީ، ކޮމަންޑޫ ދާއިރާގެ މެންބަރު ޙުސައިން ވަޙީދު އަވަހާރަވުމާ ގުޅިގެން އެ ދާއިރާގެ ބައި-އިލެކްޝަންވެސް ބާއްވަވައިފައެވެ.