ރަޝިޔާއިން އަލަށް އުފެއްދި "ކުރިއަރާފައިވާ" އިންޓަރކޮންޓިނެންޓަލް ބެލިސްޓިކް މިސައިލް (އައި.ސީ.ބީ.އެމް) އެއް ޓެސްޓުކޮށްފިއެވެ. އައި.ސީ.ބީ.އެމަކީ އެހެން ބައްރެއްގައި އޮންނަ ޤައުމަކަށް ހަމަލާދިނުމަށް ބޭނުން ކުރެވޭ ދުރު ރާސްތާ މިސައިލެކެވެ. އެއީ ނިއުކްލިޔަރ ހަމަލާއެއް ދިނުމަށް ވެސް ބޭނުންކުރެވޭނެ މިސައިލެކެވެ.
ރަޝިޔާއިން އަލަށް އުފައްދާފައިވާ ޒަމާނީ އައި.ސީ.ބީ.އެމެއް ޓެސްޓުކޮށްފައި މި ވަނީ، އެ ޤައުމާއި އެމެރިކާއާ ދެމެދު ހަދާފައިވާ ނިއުކްލިޔަރ ހަތިޔާރާ ބެހޭ އެންމެ ފަހުގެ އެއްބަސްވުމަށް އަމަލުކުރުން ހުއްޓައިލިތާ ދުވަސްކޮޅެއް ފަހުންނެވެ. ނިއުކްލިޔަރ ހަތިޔާރުގެ ޢަދަދު ކޮންޓްރޯލް ކުރަން ދެ ޤައުމުން ހަދާފައިވާ "ނިއު ސްޓާޓް ޓްރީޓީއަށް" އަމަލުކުރުން ރަޝިޔާއިން ހުއްޓައިލާފައި ވަނީ ފެބުރުވަރީ މަހުއެވެ.
ރަޝިޔާގެ ދިފާޢީ ވުޒާރާއިން ބުނީ އައި.ސީ.ބީ.އެމް. އުދުއްސައިލާފައި ވަނީ އެ ޤައުމުގެ ކެޕުސްޓިން ޔާރް ޓެސްޓު ސައިޓުން ކަމުގައެވެ. އަދި، މިސައިލް ބޭނުންކޮށްގެން ހަމަލާދީފައި ވަނީ ކަޒަކިސްތާނުގައި އޮންނަ ސަރީ-ޝާގަން އަސްކަރީ ތަމްރީނުދޭ މަރުކަޒުގައި އޮތް އަމާޒަކަށް ކަމުގައެވެ. އަދި، މި ޓެސްޓު ކާމިޔަބުކަމާ އެކު ނިންމައިލާފައިވާ ކަމުގައި ވެސް އެ ޤައުމުން ބުނެއެވެ.
2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހު ރަޝިޔާގެ ރައީސް ވްލަޑިމިޔަރ ޕުޓިން ވަނީ އެ ޤައުމުގެ ސިފައިން ޔޫކްރެއިނަށް ފޮނުވައިގެން ހަނގުރާމައެއް ފައްޓަވާފައެވެ. މި ހަނގުރާމައިގައި ޔޫކްރެއިނުގެ ބައެއް ސަރަޙައްދުތަކަށް ރަޝިޔާ ސިފައިން އަތްގަދަކޮށްފައިވާއިރު، މި ހަނގުރާމައިގައި ރަޝިޔާއިން ނިއުކްލިޔަރ ހަތިޔާރެއް ބޭނުންކުރުމަކީ އެކަށީގެންވާ ކަމެއް ކަމުގައި ވިދާޅުވެ ޕުޓިން ވަނީ އިންޒާރު ދެއްވާފައެވެ.
އަދި، ނޭޓޯގެ ބޯޑަރު ކައިރީގައި ރަޝިޔާގެ ނިއުކްލިޔަރ ހަތިޔާރު ބަހައްޓަން ވެސް ޕުޓިން ވަނީ ނިންމަވާފައެވެ. އަދި، ބެލަރޫސްއާ ނޭޓޯގެ ޤައުމުތަކާ ގުޅޭ ސަރަޙައްދީ ރޮނގު ކައިރީގައި ރަޝިޔާގެ "ޓެކްޓިކަލް" ނިއުކްލިޔަރ ހަތިޔާރު ބެހެއްޓުމަށް ކުރަންޖެހޭ ތައްޔާރީތައް ކުރަން ފަށާފައެވެ.
ބެލަރުސްއަކީ ނޭޓޯގެ ތިން ޤައުމަކާ އެކު ސަރަޙައްދީ ރޮނގު ހިއްސާކުރާ ޤައުމެކެވެ. އެ ޤައުމުގެ އުތުރުން އޮންނަނީ ލެޓްވިޔާއާއި ލިތުއޭނިޔާއެވެ. އަދި، ހުޅަނގުގައި އޮތީ ޕޮލެންޑެވެ. އެ ތިން ޤައުމަކީ ވެސް ނޭޓޯގެ މެންބަރުންނެވެ.
ބެލަރުސްއަށް ނިއުކްލިޔަރ ހަތިޔާރު ފޮނުވަން ނިންމައި، ޒަމާނީ އައި.ސީ.ބީ.އެމެއް ރަޝިޔާއިން ޓެސްޓު ކުރުމުން ނޭޓޯއިން ވަނީ އެ ކަމާ ކަންބޮޑުވުން ފާޅުކޮށްފައެވެ. ރަޝިޔާއިން އަލަށް ޓެސްޓުކުރީ ކޮން ބާވަތެއްގެ އައި.ސީ.ބީ.އެމެއް ކަން އެ ޤައުމުން ހާމަކޮށްފައެއް ނުވެއެވެ. ނަމަވެސް، އައު ހަތިޔާރުތަކާއި މިސައިލްތައް ޓެސްޓުކުރަން ފަށާފައިވާ ކަމުގައި އެ ޤައުމުން ބުނެއެވެ.
މި އަހަރުގެ ފެބުރުވަރީ މަހުގައި ވާހަކަފުޅު ދައްކަވަމުން ޕުޓިން ވަނީ އެ ޤައުމުން އައު އައި.ސީ.ބީ.އެމެއް ބޭނުންކުރަން ފަށާނެ ކަމުގެ މަޢުލޫމާތު ހާމަކުރައްވާފައެވެ. އެމެރިކާއިން ބުނާ ގޮތުގައި އެއީ "ސަރްމަޓް" މަރުކާގެ މިސައިލެކެވެ. އެއީ، ގިނަ ޢަދަދެއްގެ ނިއުކްލިޔަރ ވޯހެޑް އުފުލުމުގެ ގާބިލުކަން ލިބިފައިވާ މިސައިލެއް ކަމަށް ވެސް އެމެރިކާގެ ޖާސޫސީ އިދާރާތަކުން ގަބޫލުކުރެއެވެ.