ހިޔާ ފްލެޓްތަކުގެ ބެލްކަނި އަދި ކޮރިޑޯގައި ސިނގިރެޓް ބުއިމަކީ މަނާކަމެއްކަމަށާއި، އެފަދަ ޢަމަލުތައް ތަކުރާރުވާނަމަ ފިޔަވަޅުއަޅާނެކަމުގެ އިންޒާރު އާރބަންކޯއިން ދީފިއެވެ. އެ ކުންފުނިން މި އިންޒާރު ދީފައި މިވަނީ ހިޔާ ޓަވަރުގެ ޔުނިޓެއްގައި މިރޭ އަލިފާނުގެ ހާދިސާއެއް ހިނގުމާއި ގުޅިގެންނެވެ. އެ ހާދިސާއަކީ ނިވާނުލާ އެއްލާލި ސިނގިރެޓެއްގެ ސަބަބުން ހިނގި ހާދިސާއެއްކަމަށް މިހާތަނަށް ބެލިބެލުމުން އެނގިފައިވާކަމަށް އެކުންފުނިން ވަނީ ވިދާޅުވެފައެވެ. މިއީ މިމަހުގެ ތެރޭގައި ހިނގި މިފަދަ ދެވަނަ ހާދިސާއެވެ.
މިރޭ ހިނގި އަލިފާނުގެ ހާދިސާއާއި ގުޅިގެން އާރބަންކޯއިން ނެރުނު ބަޔާނެއްގައި ވަނީ ހުޅުމާލޭގެ ދެވަނަ ފިޔަވަހީގައި ޢިމާރާތްކޮށްފައިވާ ހިޔާ ފްޓުތަކުގައި މިރޭ ހިނގި އަލިފާނުގެ ހާދިސާއަކީ އިހުމާލުން ހިނގާފައިވާ ހާދިސާއެއްކަން އެކުންފުނިން ބެލިބެލުމުން އެނގިފައިވާކަމަށެވެ. މި ޢަމަލު ކުށްވެރިކުރައްވާ އާރބަންކޯގެ ބަޔާނުގައި ވަނީ މިފަދަ އިހުމާލުގެ ޢަމަލުތަކަކީ އެކުންފުނިން އެއްވެސް ވަރަކަށް ބަލައިގަންނާނެކަމެއް ނޫންކަމަށް ބަޔާންކޮށްފައެވެ.
ހިޔާ ފްލެޓްތަކާއި އެނޫންވެސް ސޯޝަލް ހައުސިން ޔުނިޓްތައް އާރބަންކޯއިން ޢާންމުންނަށް ފޯރުކޮށްދީފައިވަނީ ވަކި އެއްބަސްވުމެއްގެ ދަށުންކަން އެކުންފުނިން ފާހަގަކުރައްވައެވެ. ހިޔާ ފްލެޓްތައް ފަދަ ގިނަ މީހުން ދިރިއުޅޭ އެއްމދު ޢިމާރާތްތަކުގައި ޢާންމުންގެ ސަލާމަތާ ރައްކާތެރިކަން ގެއްލޭނެފަދަ އެއްވެސް ޢަމަލެއް ކުރުމާއި، އުނދަގޫވާނެފަދަ ކަންކަން ކުރުމަކީ ޤާނޫނީ އެއްބަސްވުމެއްގެ ދަށުން މަނާކޮށްފައިވާ ކަމެއްކަމަށް އާރބަންކޯއިން ވިދާޅުވިއެވެ.
"އޭގެތެރޭގައި ސިނގިރޭޓު ބުއިމާއި، އަލިފާން ރޯކުރުމާއި، ޢިމާރާތުގައި ދިރިއުޅޭ ބަޔަކަށް ނުވަތަ ޢިމާރާތަށް ގެއްލުމެއް ވާނެ އެއްވެސް ކަމަކީ މަނާ ކަންކަކަމެވެ. އަދި ވަކިން ޚާއްޞަކޮށް ފްލެޓުގެ ބެލްކަނިން ބޭރަށް ނުވަތަ ކޮރިޑޯއަށް ޢާންމުނަށް އުނދަގޫވާނެގޮތަށް ވޭޕްކުރުމާއި، ސިނގިރެޓު ބުއިން އަދި އަޅިކެނޑުމަކީ މަނާކަމެއްކަން މި އެއްބަސްވުމުގައި ބަޔާންކޮށްފައިވާނެއެވެ." އާރބަންކޯގެ ބަޔާނުގައިވެއެވެ.
މިފަދަ ކަންކަމަކީ އެންމެންގެ ސަލާމަތާއި ރައްކާތެރިކަމަށް ބަލައި ހަދާފައިވާ އުސޫލުތަކަކަށްވާއިރު، ޤާނޫނީ އެއްބަސްވުމެއްގެ ދަށުން މިފަދަ ކަންކަމަށް އެއްބަސްވެ ފްލެޓުގައި ދިރިއުޅެމުން އަންނަ ފަރާތްތަކުން މި އުސޫލްތަކާ ޚިލާފުވާނަމަ އެއްބަސްވުމުގެ ދަށުން ފިޔަވަޅު އަޅާނެކަމުގެ އިންޒާރު އާރބަންކޯއިން ވަނީ ދެއްވާފައެވެ.
އެގޮތުން އެފަދަ ޢަމަލުތައް ތަކުރާރުކުރާ މިންވަރާއި އެއްބަސްވުމާއި ޚިލާފުވާ މިންވަރަށް ބަލައި 1000 ރުފިޔާއާއި 100،000 ރުފިޔާއާ ދެމެދުގެ ޢަދަދކުން ޖޫރިމަނާކުރާނެކަމަށް އެކުންފުނިން ވިދާޅުވިއެވެ. މިފަދަ ހާދިސާތައް ތަހްޤީޤުކުރުމަށްފަހު ރައްޔިތުންގެ ސަލާމަތަށް އިހްމާލުވެފައިވާ ފަރާތްތަކުގެ ޔުނިޓް އަތުލުމުގެ ފުރުޞަތުވެސް އޮންނާނެކަމަށް އެކުންފުނިން ވަނީ ހަނދާންކޮށްދީފައެވެ.
މިފަދަ ޢަމަލުތައް ހިންގާ އެންމެ ފަރުދެއްގެ މަސްލަހަތަށްވުރެ އާބަންކޯއަށް އަބަދުވެސް މުހިންމުވާނީ އަދި އިސްކަންދޭނީވެސް ހުރިހާ ރައްޔިތުންގެ ސަލާމަތާ ރައްކާތެރިކަންކަމަށްވެސް އެކުންފުނިން ފާހަގަކުރައްވާފައިވެއެވެ.
ހިޔާ ފްލެޓް ސަރަހައްދަކީ ހުޅުމާލޭގައި އެންމެ ބޮޑު އާބާދީ ދިރިއޫޅެމުން އަންނަ ސަރަހައްދެވެ. އެގޮތުން 25،000އަށްވުރެ ގިނަ މީހުން އާބާދީއެއް އެސަރަަހއްދުގައި ދރިއުޅޭކަމަށް އާބަންކޯއިން ވިދާޅުވެއެވެ.
ސިނގިރޭޓް ބުއިމަށްފަހު އެއްލާލި ފިލްޓަރެއްގެ ސަބަބުން ހިޔާގެ 5 ވަނަ ޓަވަރުގައި މިދިޔަ ހަފްތާގައިވެސް ވަނީ އަލިފާނުގެ ހާދިސާއެއް ހިނގާފައެވެ.