ސޫރިޔާގެ ޚާރިޖީ ވަޒީރު ފައިޞަލް މިޤްދާދް ސަޢޫދީ ޢަރަބިއްޔާއަށް ވަޑައިގަންނަވައިފިއެވެ. މިއީ، 2011 ވަނަ އަހަރު ސޫރިޔާގައި ދާޚިލީ ހަނގުރާމަ ފެށި ފަހުން އޭނާ ސަޢޫދީ ޢަރަބިއްޔާއަށް ކުރައްވާ ފުރަތަމަ ދަތުރުފުޅެވެ. އޭނާ ސަޢޫދީ ޢަރަބިއްޔާއަށް ވަޑައިގަންނަވާފައި މި ވަނީ ސަޢޫދީ ޚާރިޖީ ވަޒީރު ޕްރިންސް ފައިޞަލް ބިން ފަރްޙާންގެ ދަޢުވަތަކަށެވެ.
ޕްރިންސް ފަރްޙާނާ އެކު ބޭއްވެވި ބައްދަލުވުމުގައި މިޤްދާދް ވަނީ ސޫރިޔާގެ ދާޚިލީ ހަނގުރާމަ ނިމުމަކަށް ގެނެސް، ހަމަޖެހުން ގާއިމުކުރުމާ ގުޅޭ ގޮތުން މަޝްވަރާ ކުރައްވާފައެވެ. އަދި، ސޫރިޔާގެ ދާޚިލީ ހަނގުރާމައާ ގުޅިގެން އެހެން ޤައުމުތަކަށް ހިޖުރަކޮށްފައިވާ އެ ޤައުމުގެ ރައްޔިތުން އެނބުރި ޤައުމަށް ގެންދިޔުމާ ގުޅޭ ގޮތުން ވެސް ދެ ބޭފުޅުން މަޝްވަރާ ކުރެއްވި ކަމުގައި ސަޢޫދީ ޢަރަބިއްޔާއިން ބުނެއެވެ.
މިޤްދާދް ސަޢޫދީ ޢަރަބިއްޔާއަށް ވަޑައިގަންނަވާފައި މި ވަނީ، ޢަރަބި ލީގުގެ ބައެއް ޤައުމުތަކުގެ މެދުގައި މުހިންމު ބައްދަލުވުމެއް ބާއްވަމުންދާ ދަނޑިވަޅެއްގައެވެ. އެ އިއްތިހާދުގެ ނުވަ ޤައުމަކުން ބައިވެރިވާ މި ބައްދަލުވުމުގެ މައިގަނޑު މައުޟޫޢަކީ ވެސް، އަންނަ މޭ މަހު ބާއްވަން ހަމަޖެހިފައިވާ ޢަރަބި ލީގުގެ ސަމިޓަށް ސޫރިޔާގެ ރައީސް ބައްޝާރު ހާފިޛް އަލް-އަސަދަށް ދަޢުވާދިނުމާ ގުޅޭ ގޮތުން މަޝްވަރާ ކުރުމެވެ.
މި ކަމާ ގުޅޭ ގޮތުން މަޝްވަރާ ކުރުމަށް ބާއްވާ ބައްދަލުވުމުގައި ބައިވެރިވާ ޤައުމުތަކުގެ ތެރޭގައި ގަލްފުގެ ޤައުމުތަކުގެ ތެރޭގައި ހިމެނޭ ބަޙްރެއިން، ކުވެއިތު، އޮމާން، ޤަޠަރު، ސަޢޫދީ ޢަރަބިއްޔާ އަދި އެކުވެރި ޢަރަބި ޢިމާރާތް (ޔޫ.އޭ.އީ) ހިމެނެއެވެ. މީގެ އިތުރުން، މިޞްރާއި އުރުދުނާއި އިރާޤުން ވެސް މި ބައްދަލުވުމުގައި ބައިވެރިވެއެވެ.
ސޫރިޔާގެ ދާޚިލީ ހަނގުރާމަ ފެށުނީ، ސަރުކާރާ ދެކޮޅަށް އަޑުއުފުލައި، މުޒާހަރާ ކުރުމަށް ބާއްވަމުން ދިޔަ މުޒާހަރާތަކެއް ރޫޅައިލުމަށް އަސަދުގެ ސަރުކާރުން ބާރުގެ ބޭނުންކުރުމުގެ ސަބަބުންނެވެ. ހަނގުރާމަ ފެށުމާ އެކު ޢަރަބި ދުނިޔޭގެ ގިނަ ޤައުމުތަކަކުން ވަނީ ސޫރިޔާގެ ސަރުކާރާ އެކު ގޮތް ގުޅުން ކަނޑައިލާފައެވެ. އަދި، ޢަރަބި ލީގުން ވެސް އެ ޤައުމު ވަނީ އެކަހެރިކޮށްފައެވެ.
ނަމަވެސް، ސޫރިޔާއާއި ޢަރަބި ދުނިޔޭގެ ޤައުމުތަކާ ދެމެދު ފަހަކަށް އައިސް ގުޅުންތައް އާލާކުރަން ފަށާފައިވާ ކަން ފާހަގަކުރެވެއެވެ. އަސަދު ދާދި ފަހުން ވަނީ މިޞްރާއި އޮމާނުގެ އިތުރުން ސަޢޫދީ ޢަރަބިއްޔާއަށް ވެސް ވަޑައިގަންނަވާފައެވެ. އަދި، އެ ޤައުމުތަކާ އެކު ގުޅުންތައް ބަދަހިކުރުމުގެ މަސައްކަތް ވަނީ ފަށާފައެވެ.
ސަޢޫދީ ޢަރަބިއްޔާގައި ކުރިއަށްދާ ޢަރަބި ލީގުގެ ބައްދަލުވުމުގެ އެޖެންޑާގައި ދެވަނައަށް އޮތް އެންމެ މުހިންމު ކަމަކީ، އެ އިއްތިހާދުގެ ޤައުމުތަކާއި އީރާނާ ދެމެދު އޮތް ގުޅުންތައް އަލުން އިޔާދަކުރުމެވެ. ހަތް އަހަރުގެ މެދުކެނޑުމަކަށް ފަހު ސަޢޫދީ ޢަރަބިއްޔާއިން ވަނީ އީރާނާ އެކު ސިޔާސީ ގުޅުން އަލުން ގާއިމުކޮށްފައެވެ. އަދި، ދެ ޤައުމުގެ ދެމެދުގައި އޮތް ގުޅުންތައް ބަދަހިކުރަން ފަށާފައިވާއިރު، އީރާނާ އެކު އެހެން ޤައުމުތަކުން ވެސް ގުޅުން އިޔާދަކުރުމަށް ސަޢޫދީ ޢަރަބިއްޔާއިން އެދެއެވެ.