އިޓަލީވިލާތުގެ އައްސޭރިފަށަށް ފެތުނު ދެ ބޯޓެއްގައި ދަތުރުކުރަމުން ދިޔަ 1,200 އަށްވުރެ ގިނަ މީހުން ސަލާމަތްކުރަން މަސައްކަތް ކުރަމުންދާ ކަން އެ ޤައުމުގެ ކޯސްޓްގާޑުން ހާމަކޮށްފިއެވެ. ފެތިފައިވާ ދެ ބޯޓުގައި ދަތުރުކޮށްފައި ވަނީ ޤަވާޢިދާ ޚިލާފަށް އެ ޤައުމަށް ހިޖުރަކުރަން މަސައްކަތް ކުރި ބަޔެކެވެ.
މީގެ ތެރެއިން އެއް ބޯޓު ފެތިފައި ވަނީ އިޓަލީވިލާތުގެ ސިސިލީގެ ރަށެއް ކަމުގައިވާ ސިރަކިޔުސްގެ އައްސޭރިފަށުން 190 ކިލޯމީޓަރު ދުރުން މެޑިޓެރޭނިޔަން ކަނޑުގެ ސަރަޙައްދަށެވެ. އެ ބޯޓަކީ މަސްވެރިކަމުގައި ބޭނުންކުރާ އުޅަނދެއް ކަމަށާއި، އެ ބޯޓުގައި ދަތުރުކުރި ކަމަށް ބެލެވޭ 800 އަށްވުރެ ގިނަ މީހުން ސަލާމަތް ކުރަން މަސައްކަތް ކުރަމުންދާ ކަމުގައި އިޓަލީވިލާތުގެ ކޯސްޓްގާޑުން ބުނެއެވެ.
ކަނޑުވެފައިވާ ރެފިޔުޖީން ސަލާމަތް ކުރުމަށް އެ ސަރަޙައްދުގައި ހަރަކާތްތެރިވަމުން ދިޔަ ޢާންމުންގެ އުޅަނދުފަހަރުގެ އިތުރުން، ރެފިޔުޖީންނާ ބެހޭ އިދާރާތަކުން ހިންގާ އުޅަނދުފަހަރު ވެސް ދަނީ ހަރަކާތްތެރިވަމުންނެވެ. ދެވަނަ ބޯޓު ފެތިފައި ވަނީ ސިސިލީގެ އެންމެ ދެކުނުގައި އޮންނަ ކާޕޯ ޕާއްސެރޯގެ އައްސޭރިފަށަށެވެ. އެ ބޯޓުގައި ވެސް 400 އަށްވުރެ ގިނަ ރެފިޔުޖީން ދަތުރުކުރަމުން ގޮސްފައިވާ ކަމުގައި ކޯސްޓްގާޑުން ބުނެއެވެ.
މެޑިޓެރޭނިޔަން ކަނޑު ހުރަސްކޮށް ވިލާތުގެ ޤައުމުތަކަށް ހިޖުރަކުރަން އުޅުމުގެ ތެރޭގައި ހާލުގައި ޖެހޭ މީހުންނަށް އެހީތެރިކަން ފޯރުކޮށްދޭން މަސައްކަތް ކުރާ ޖަމުޢިއްޔާއެއް ކަމުގައިވާ އެލާމް ފޯނުން ބުނީ، ދެ ބޯޓު ވެސް ފުރާފައި ވަނީ ލީބިޔާއިން ކަމުގައެވެ. އަދި، ދެ ބޯޓުގައި ވެސް ގިނަ ޢަދަދެއްގެ އަންހެނުންނާއި ކުޑަކުދިން ތިބި ކަމަށާއި، އޭގެ ތެރެއިން ގިނަ ބަޔަށް ޞިއްޙީ ފަރުވާ ބޭނުންވާ ކަމުގައި ވެސް އެ ޖަމުޢިއްޔާއިން ބުންޏެވެ.
ޤަވާޢިދާ ޚިލާފަށް ވިލާތުގެ ޤައުމުތަކަށް ހިޖުރަކުރާ ރެފިޔުޖީންގެ ޢަދަދު މި އަހަރުގެ ތެރޭގައި އެތައް ގުނައެއް އިތުރުވެފައިވާ ކަން ފާހަގަކުރެވެއެވެ. އޭގެ ތެރެއިން ގިނަ ޢަދަދެއްގެ ބަޔަކު ކަނޑުވެ ހާލުގައި ޖެހެއެވެ. އޭޕްރިލް މަހުގެ 7 ވަނަ ދުވަހުން ފެށިގެން މިއަދާ ހަމައަށް 2,000 އަށްވުރެ ގިނަ ރެފިޔުޖީން ކަނޑުމަތިން ސަލާމަތް ކޮށްފައިވާ ކަމުގައި އިޓަލީވިލާތުގެ ކޯސްޓްގާޑުން ބުނެއެވެ.
އިޓަލީވިލާތަށް ހިޖުރަކުރާ ރެފިޔުޖީންގެ ތެރޭގައި ގިނައީ މެދުއިރުމައްޗާއި އެފްރިކާ ބައްރުގެ ޤައުމުތަކަށް ނިސްބަތްވާ މީހުންނެވެ. މެޑިޓެރޭނިއަން ކަނޑު ހުރަސްކުރުމުގެ ތެރޭގައި ހާލުގައި ޖެހޭ މީހުން ސަލާމަތްކުރަން މަސައްކަތް ކުރާ ޖަރުމަނުވިލާތުގެ އުޅަނދެއް ކަމުގައިވާ ރެސްކިޔުޝިޕްއިން ބުނީ، އޭޕްރިލް 9 ވަނަ ދުވަހު ރެފިޔުޖީންނާ އެކު ދަތުރުކުރި ބޯޓެއް ފެތި، ދެ މީހުން މަރުވި ކަމުގައެވެ. އަދި، އިތުރު 20 މީހަކު ވަނީ ގެއްލިފައެވެ. އެއީ، ތޫނިސްއިން ފުރައިގެން ދަތުރުކުރި ބޯޓެކެވެ.
މި އަހަރުގެ މިހާތަނަށް އިޓަލީވިލާތަށް ހިޖުރަކޮށްފައިވާ ރެފިޔުޖީންގެ ޢަދަދު 14,000 އަށްވުރެ މައްޗަށް އަރާ ކަމުގައި އެ ޤައުމުގެ ދާޚިލީ ވުޒާރާއިން ބުނެއެވެ. އެއީ، 2022 ވަނަ އަހަރުގެ ފުރަތަމަ ތިން މަސްދުވަހާ އަޅައިބަލާއިރު އެތައް ގުނައެއް އިތުރު ޢަދަދެކެވެ. އެ އަހަރުގެ އެ މުއްދަތުގައި އިޓަލީވިލާތަށް ހިޖުރަކޮށްފައި ވަނީ 5,300 ރެފިޔުޖީންނެވެ. 2021 ވަނަ އަހަރުގެ އެ މުއްދަތުގައި ހިޖުރަކޮށްފައި ވަނީ 4,300 މީހުންނެވެ.