މިދިޔަ ހުކުރުދުވަހު މަނަދޫގައި މަރުވެފައި އޮތްވާ ފެނުނު ނަޢީމާ މޫސާގެ މަރުގެ ތަޙުޤީޤުތައް ކުރިއަށްދާތީ، އެކަމާއި ގުޅޭ ތަފްސީލް މިވަގުތު ހާމަކުރެވެން ނެތްކަމަށް ފުލުހުން ބުނެފިއެވެ.
ނ.މަނަދޫގައި، 62 އަހަރުގެ ނަޢީމާ މޫސަ މަރުވެފައި އޮއްވާ ފެނުނީ، އޭނާގެ ހަބަރެެއް ނުވެގެން ހޯދަމުންދަނިކޮށް މިދިޔަ ހުކުރުދުވަހުގެ އިރުއޮއްސެނިކޮށް އޭނާ ދިރިއުޅެމުން ދިޔަ ގޭގެ ކޮޓަރިންނެވެ.
ފުލުހުން ވިދާޅުވެފައިވަނީ ނައީމާ މޫސާގެ މަރުގައި ސުވާލު އުފެދޭ ކަންތައްތަކެއް ހުރުމުން ނަޢީމާގެ މަރުގެ ތަޙުޤީޤުކުރިއަށް ގެންދަނީ ހޮމިސައިޑް ނުވަތަ މަރާލާފައިވާ މީހެއްގެ ތަޙުޤީޤުގެ ގޮތުގައިކަމަށެވެ. މި ތަހުގީޤަށް ފުލުހުންގެ ސީރިއަސް އެންޑް އޮގަނައިޒްޑް ކްރައިމް ޑިޕާރޓްމަންޓްގެ ޚާއްސަ ތަހުގީގު ޓީމަކާއި، ފޮރެންސިކް ތަޙުގީގު ޓީމެއްގެ އިތުރުން ފޮރެންސިކް ޕެތޮލޮޖިސްޓެއް މަނަދޫގައި ދަނީ ހަރަކާތްތެރިވަމުންނެވެ.
މިދިޔަ ހުކުރުދުވަހު ހިނގި މި ޙަދިސާއާއި ގުޅިގެން ޕީއެސްއެމް ނިއުސްއަށް މައުލޫމާތުދެއްވަމުން ފުލުހުން ވިދާޅުވީ މި މައްސަލައާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައި ނުވާކަމަށެވެ. އަދި ތަހުގީޤް ކުރިއަށްދާތީ އެކަމާއި ގުޅޭ މައުލޫމާތު ހިއްސާ ކުރެވެން ނެތްކަމަށްވެސް ފުލުހުން ވިދާޅުވެއެވެ.
ތަހުޤީޤަށް ބޭނުންވާ މަޢުލޫމާތާއި ސާމްޕަލްތައް ނެގުމަށްފަހު ނަޢީމާގެ ހަށިގަނޑު ވަޅުލާފައިވަނީ ހޮނިހިރުދުވަހުގެ ވަގުތެއްގައެވެ.
ފުލުހުން ވިދާޅުވީ ނަޢީމާ މޫސާގެ ހަށިގަނޑު އާއިލާއާއި ހަވާލުކުރީ، ތަހުލީލުތަކަށް ބޭނުންވާ ސާމްޕަލް ނެގުމަށްފަހު އިތުރަށް ޕޯސްޓްމޯޓަމް ހަދަންޖެހޭ ސަބަބެއް ނެތްކަމަށް ފުލުހުންގެ ފޮރެންސިކް ޕެތޮލޮޖިސްޓް ނިންމުމުންކަމަށެވެ.
މި ކޭސްއާއި ގުޅިގެން ނަޢިމާ ދިރިއުޅެމުން ދިޔަ ގޭގެ ސަރަޙައްދު އަދިވެސް އޮތީ ބަންދުކޮށްފައެވެ. އަދި ރަށުގެ އިތުރު ސަރަޙައްދުތައްވެސް ފުލުހުން ވަނީ ބަލާފައެވެ.
ނައިމާގެ މަރާއި ގުޅިގެން ފުލުހުންގެ ހުއްދަ ނެތި ރަށަށް މީހުން އަރާ ފޭބުމާއި، އުޅަނދުފަހަރު ރަށަށް ދަތުރުކުރާއިރުވެސް ފުލުހުންގެ ހުއްދަ ހޯދުމަށް ވަނީ އަންގާފައެވެ.
ފުލުހުން ވަނީ ނަޢީމާގެ މަރާ ގުޅޭ އެއްވެސް މަޢުލޫމާތެއް ޙިއްސާކުރަން ބޭނުންވާ ފަރާތެއްވާނަމަ ފުލުހުންގެ ސީރިއަސް އެންޑް އޮގަނައިޒްޑް ކްރައިމް ޑިޕަރޓްމަންޓްގެ ނަންބަރު 9911099އަށް ގުޅާ ޙިއްސާކުރުމަށް އެދިފައެވެ.