ރަޝިޔާގެ އަސްކަރިއްޔާއިން ޔޫކްރެއިނުގެ އިރުމަތީގައިވާ ޑޮނެޓްސްކުގެ ދެ ރަށަކަށް ދެމުންދާ ހަމަލާތައް ފުޅާކޮށް، އިތުރަށް ވަރުގަދަކޮށްފިއެވެ. ޑޮނެޓްސްކަކީ ދޮންބާސް ސަރަޙައްދުގައި ހިމެނޭ ދެ ސަރަޙައްދުގެ ތެރެއިން އެއް ސަރަޙައްދެވެ. ރަޝިޔާއިން މި ވަގުތު އެންމެ ވަރުގަދަ ހަމަލާތަކެއް ދެމުންދަނީ ބަޚްމުތާއި އަވްދީވްކާއަށެވެ.
ޔޫކްރެއިނުގެ އަސްކަރިއްޔާއިން ބުނީ، ފާއިތުވި 24 ގަޑިއިރުގެ ތެރޭގައި ރަޝިޔާގެ ފައުޖުތަކުން އެ ދެ ރަށަށް 40 ފަހަރެއްގެ މަތިން ވަރުގަދަ ހަމަލާތަކެއް ދީފައިވާ ކަމުގައެވެ. ނަމަވެސް، ޔޫކްރެއިނުގެ މިނިވަންކަމަށް ހަނގުރާމަ ކުރަމުންދާ ފައުޖުތަކުން ރަޝިޔާގެ ހަމަލާތައް ދިފާޢުކޮށް، ހުއްޓުވާފައިވާ ކަމުގައި ކީވްއިން ބުނެއެވެ. ދެ ޤައުމުގެ ފައުޖުތަކުގެ ދެމެދުގައި އެންމެ ވަރުގަދަކޮށް ހަމަލާ ބަދަލުކުރަމުން ދަނީ ބަޚްމުތްގައެވެ. އެ ރަށް ހިފުމަށް ރަޝިޔާއިން މަސައްކަތް ފަށާފައި ވަނީ މީގެ އަށެއްކަ މަސް ކުރިންނެވެ. އަދި، އެ ރަށުގެ ބޮޑު ބަޔަކަށް މިހާރު އަތްގަދަކޮށްފައިވީ ނަމަވެސް، އެ ރަށް ރަޝިޔާގެ ސިފައިންގެ އަތްދަށަށް އަދި ވެއްޓިފައެއް ނުވެއެވެ.
ބަޚްމުތްގެ މެދުތެރޭގެ ސަރަޙައްދުތައް ވެސް ރަޝިޔާއިން ދާދިފަހުން ވަނީ ހިފާފައެވެ. އެ ކަން ހާސިލުކުރީ ޔޫކްރެއިނަށް ރަޝިޔާއިން ފޮނުވާފައިވާ ވެގްނަރ ގުރޫޕުގެ ކުލީ ސިފައިންނެވެ. އެ ރަށަށް ފަހު، ރަޝިޔާއިން ދެން ހިފަން މަސައްކަތް ކުރާނެ ކަމަށް ބެލެވޭ ރަށަކީ އަވްދީވްކާއެވެ. އެ ރަށަށް މިހާރު ވެސް ހަމަލާތައް ދޭން ވަނީ ފަށާފައެވެ.
ކޮންމެ ރެޔަކު ވީޑިޔޯ މެދުވެރިކޮށް ދެއްވާ މެސެޖުގައި ޔޫކްރެއިނުގެ ރައީސް ވޮލޮޑޮމީރް ޒެލެންސްކީ ވިދާޅުވީ ބަޚްމުތާއި އަވްދީވްކާއަށް ރަޝިޔާއިން ވަރުގަދަ މިސައިލް ހަމަލާތަކެއް ދީފައި ވަނީ ނަޞްރާނީން ފާހަގަކުރާ ދީނީ މުނާސަބަތަކާ ދިމާކޮށް ކަމުގައެވެ. އަދި، އޭނާ ވަނީ އެ ހަމަލާތައް އެންމެ ހަރުކަށި އިބާރާތުން ކުށްވެރި ކުރައްވާފައެވެ.
"ޔޫކްރެއިނުގެ ނަޞްރާނީން ދީނީ އަޅުކަމެއް ފާހަގަކުރަމުން ދަނިކޮށް ރަޝިޔާއިން މިސައިލް ހަމަލާތައް ދިނީ. މިއީ، ރަޝިޔާއިން އެ މުނާސަބަތު ފާހަގަކޮށްފައިވާ ގޮތް. ރަޝިޔާގެ މައްޗަށް ޔޫކްރެއިނުގެ ސިފައިން ނަޞްރު ހޯދާޏެ. އަދި، ކުރިއަށް އޮތް އަހަރު ޔޫކްރެއިނުގެ ރައްޔިތުން ހޭދަކުރާނީ މިނިވަން، އުފާވެރި ޖައްވެއްގައި،" ޒެލެންސްކީ ވިދާޅުވިއެވެ. ޔޫކްރެއިނުގެ ދިފާޢުގައި ހަނގުރާމަ ކުރަމުންދާ ސިފައިންނަށް ވެސް އޭނާ ވަނީ ޝުކުރު އަދާކުރައްވާފައެވެ.
ޔޫކްރެއިނުގެ އިރުދެކުނުގައިވާ ޒަޕޮރީޜިޔާއަށް ވެސް ރަޝިޔާއިން ވަނީ ވަރުގަދަ ހަމަލާތަކެއް ދީފައެވެ. ޒަޕޮރީޜިޔާގެ ބޮޑު ބަޔެއް މިހާރު ވެސް އޮތީ ރަޝިޔާ ސިފައިންގެ އަތްދަށުގައެވެ. އެ ރަށަށް ދިން މިސައިލް ހަމަލާތަކުގައި ޢާންމުން ދިރިއުޅޭ އެޕާޓްމަންޓްތައް ހުންނަ ޢިމާރާތަކަށް ގެއްލުންވެ، ދެ މީހަކު ވަނީ މަރުވެފައެވެ. ޒަޕޮރީޜިޔާގައި މަރުވެފައި ވަނީ އުމުރުން 50 އަހަރުގެ ފިރިހެނަކާއި، އުމުރުން 11 އަހަރުގެ ކުޑަ އަންހެން ކުއްޖެއް ކަމުގައި ޔޫކްރެއިނުގެ އެމަރޖެންސީ ޚިދުމަތްތަކާ ބެހޭ އިދާރާއިން ބުނެއެވެ. އުމުރުން ދުވަސްވީ މީހާގެ އަނބިމީހާއާއި، މަރުވި ކުޑަ އަންހެން ކުއްޖާގެ މަންމަ ވަނީ ޢިމާރާތުގެ ދަށުން ސަލާމަތް ކުރެވިފައެވެ.