އިސްރާޢީލުން ވެރިވެގަނެފައިވާ ހުޅަނގު އައްސޭރިއަށް ޔަހޫދީ އަސްކަރިއްޔާގެ ސިފައިން އަރައި ހިންގި އުދުވާންތަކެއްގައި ފަލަސްޠީނުގެ ޒުވާނެއް ޝަހީދުކޮށްލައިފިއެވެ. ފަލަސްޠީނުގެ ޞިއްޙަތާ ބެހޭ ވުޒާރާއިން ބުނީ ޔަހޫދީ ޖައްބާރު ސިފައިން ޙަމަލާދީ ޝަހީދުކޮށްލާފައި ވަނީ އުމުރުން 20 އަހަރުގެ އަޙަދް ސާލިމް ކަމުގައެވެ.
އޭނާ ޝަހީދުކޮށްލާފައި ވަނީ ހުޅަނގު އައްސޭރީގެ އުތުރުގައިވާ ޤަލްޤިލްޔާ ކައިރީގައި އޮންނަ އައްޒޫން ކިޔާ ރަށެއްގައެވެ. އޭނާގެ މެޔާއި ބަނޑަށް ޔަހޫދީ ސިފައިން ވަރަށް ގިނަ ފަހަރު ބަޑި ޖަހާފައިވާ ކަމުގައި ވެސް ފަލަސްޠީނުގެ ޞިއްޙަތާ ބެހޭ ވުޒާރާއިން ބުނެއެވެ.
އަޙަދް ޝަހީދުކޮށްލާފައި ވަނީ ކޮން ސަބަބަކާ ގުޅިގެން ކަން އަދި ސާފެއް ނޫނެވެ. ނަމަވެސް، ބަރަކާތްތެރި ރަމަޟާން މަސް ފެށުނު ފަހުން ޔަހޫދީ ޓެރެރިސްޓު ސިފައިންނާއި ފުލުހުން ދަނީ ކޮންމެ ދުވަހަކު ކަހަލަ ގޮތަކަށް ފަލަސްޠީނުގެ ބިންތަކަށް އަރައި މުސްލިމުންނަށް ހަމަލާދީ، ގިނަ ޢަދަދެއްގެ ބަޔަކު ޝަހީދުކުރަމުންނެވެ. އަދި، މުސްލިމުންނަށް ފުރައްސާރަކޮށް ދުއްތުރާ ކުރަމުންނެވެ.
ރަމަޟާން މަސް ފެށުނު ފަހުން ޔަހޫދީ ޖައްބާރު ފުލުހުން ވަނީ ދެ ދުވަހެއްގެ މަތިން ވަނީ މަސްޖިދު އަލް-އަޤްޞާއަށް ވަދެ، ތިންވަނައަށް އެންމެ މުޤައްދަޞް މިސްކިތުގެ ހުރުމަތް ކަނޑާފައެވެ. ޔަހޫދީންގެ ޖައްބާރު ފުލުހުން އަލް-އަޤްޞާއަށް ގަދަބާރުން ވަދެފައި ވަނީ ފަތިސް ނަމާދު ވަގުތުގައި ގިނަ ޢަދަދެއްގެ ބަޔަކު ޖަމާޢަތުގައި ބައިވެރިވުމަށް މިސްކިތަށް އަރައި ތިބި ވަގުތުގައެވެ.
ގަދަބާރުން މިސްކިތަށް ވަދެ، ޔަހޫދީ ފުލުހުން ވަނީ ނަމާދަށް ތިބި މުސްލިމުންނަށް ހަމަލާދީފައެވެ. އެ މީހުންނަށް ފުރައްސާރަކޮށް އަނިޔާކޮށްފައެވެ. އަދި 300 އަށްވުރެ ގިނަ މުސްލިމުން ހައްޔަރުކޮށްފައެވެ. ޔަހޫދީން ވަނީ މިސްކިތުގެ ތެރޭގައި ހަތިޔާރު ބޭނުންކޮށް، މިސްކިތަށް ބޮޑެތި ގެއްލުންތަކެއް ދީފައެވެ. ރަބަރު ވަޒަން ޖަހައި ގިނަ ޢަދަދެއްގެ ބަޔަކު ޒަޚަމުކޮށްލާ، މިސްކިތުގެ ތެރޭގައި ކަރުނަ ގޭސް ޖަހާފައެވެ.
ފަލަސްޠީނުގެ މިނިވަންކަމަށް ޖިހާދުކުރަމުންދާ މުޖާހިދުންގެ ޖަމާޢަތްތަކުން ވަނީ މި އުދުވާންތަކުގެ ބަދަލުހިފުމުގެ ގޮތުން އިސްރާޢީލަށް އަމާޒުކޮށް ވަރުގަދަ ރޮކެޓް ހަމަލާތަކެއް ދީފައެވެ. އަދި، ބަޑީގެ ހަމަލާތަކެއްދީ، ޔަހޫދީންގެ ދެ މީހަކު މަރައިލާ، ގިނަ ޢަދަދެއްގެ ބަޔަކު ޒަޚަމުކޮށްލާފައެވެ. އިސްރާޢީލަށް ދަތުރުކުރި އިޓަލީވިލާތުގެ ފަތުރުވެރިއެއް ވެސް މި ފަދަ ހަމަލާއެއްގައި ވަނީ މަރުވެފައެވެ.