ތައިވާނުގެ ސަރަޙައްދަށް އަނެއްކާވެސް ޗައިނާގެ އަސްކަރީ އުޅަނދުތަކެއް ވަދެފައިވާ ކަން ތައިވާނުން ހާމަކޮށްފިއެވެ. ތައިވާނުގެ ދިފާޢީ ވުޒާރާއިން ބުނީ، ދެ ޤައުމުގެ ގުޅޭ ސަރަޙައްދީ ރޮނގު ހުރަސްކޮށް ޗައިނާގެ 11 އަސްކަރީ މަނަވަރާއި 59 އަސްކަރީ މަތިންދާބޯޓު ތައިވާނުގެ ސަރަޙައްދަށް ވަދެފައިވާ ކަމުގައެވެ.
މި އުޅަނދުތަކަކީ ޗައިނާއިން މިހާރު ހިންގަމުންދާ އަސްކަރީ ތަމްރީނުތަކުގައި ބައިވެރިވާ އުޅަނދުތަކެކެވެ. ޗައިނާއިން އަސްކަރީ ތަމްރީނުތައް ކުރިއަށް ގެންދަނީ ތައިވާނު ވަށައިގެންވާ ސަރަޙައްދުގައެވެ. މި ތަމްރީނުތަކުގެ ތެރެއިން ތައިވާނު ހިފާނެ ގޮތުގައި ތަމްރީނުތައް ވެސް ބާއްވާފައިވާ ކަމުގައި ޗައިނާއިން ބުނެއެވެ.
ޗައިނާއިން އަސްކަރީ ތަމްރީނުތައް ފަށާފައި ވަނީ، ތައިވާނުގެ ރައީސް ސައި އިންގް-ވެން އެމެރިކާއަށް ކުރެއްވި ނުރަސްމީ ދަތުރުފުޅެއްގެ ތެރެއިން އެމެރިކާގެ ހައުސް އޮފް ރެޕްރެޒެންޓެޓިވްސްގެ ރައީސް ކެވިން މެކާތީއާ ބައްދަލުކުރެއްވުމުން އެ ކަމުގެ ރައްދުގައެވެ. ސައިއާއި މެކާތީ ބައްދަލުކުރައްވާފައި ވަނީ ޗައިނާއިން އެ ކަމާ މެދު ނުރުހުން ފާޅުކޮށްފައި ވަނިކޮށެވެ.
ޗައިނާއިން އަސްކަރީ ތަމްރީނުތައް ބާއްވައި ތައިވާނަށް ބިރުދައްކަމުންދާތީ އެ ކަމާ ނުރުހުން ފާޅުކުރައްވައި ވާހަކަފުޅު ދައްކަވަމުން ސައި ވިދާޅުވީ، މި ފަދަ ބިރުދެއްކުންތަކަށް ތައިވާނުން ނުސިހޭނެ ކަމަށާއި، މި ފަދަ ފިއްތުންތަކާ ގުޅިގެން އެ ޤައުމާއި އެމެރިކާއާ ދެމެދު އޮތް ގުޅުމަށް ބަދަލެއް ނުގެންނަވާނެ ކަމުގައެވެ.
އަދި، ތައިވާނުގެ މިނިވަންކަމަށް އަރައިގަނެ، އިސްތިއުމާރީ ބާރެއްގެ ގޮތުގައި ޗައިނާއިން މަސައްކަތް ކުރަމުންދާ ކަމަށާއި، ޗައިނާގެ އަސްކަރީ ބާރުވެރިކަން ފުޅާކޮށް، ނުފޫޒު ފަތުރަން މަސައްކަތް ކުރަމުންދާ ކަމުގައި ވެސް ސައި ވިދާޅުވިއެވެ.
ސައި އެމެރިކާއަށް ކުރެއްވި ދަތުރުފުޅާ މެދު ނުރުހުންވެ ޗައިނާއިން ފަށާފައިވާ އަސްކަރީ ތަމްރީނުތަކުގައި ގިނަ ޢަދަދެއްގެ އަސްކަރީ މަނަވަރުތަކާއި މަތިންދާބޯޓުތަކުން ދަނީ ބައިވެރިވަމުންނެވެ. ތައިވާނުގެ އިތުރުން އެމެރިކާއިން ވެސް ވަނީ ޗައިނާގެ އަސްކަރީ ތަމްރީނުތައް ކުށްވެރިކޮށްފައެވެ. އެމެރިކާގެ ޚާރިޖީ ވުޒާރާއިން ބުނީ ސައި އެމެރިކާއަށް ކުރެއްވި ދަތުރުފުޅަކީ، ޗައިނާއާއި ތައިވާނާ ދެމެދު އޮތް ހާލަތު ބަދަލުކުރަން ޖެހޭ ފަދަ ކުށެއް ނޫން ކަމުގައެވެ.
ތައިވާނަކީ ޑިމޮކުރަސީގެ ހަމަތަކުގެ މަތިން ހިންގާ ޤައުމެއް ނަމަވެސް، އެއީ ޗައިނާގެ ބައެއްގެ ގޮތުގައި އެ ޤައުމުން ޤަބޫލު ކުރެއެވެ. އަދި، ބާރުގެ ބޭނުންކޮށްގެން ތައިވާނު ހިފުމަކީ ޗައިނާގެ ހައްޤެއް ކަމުގައި ވެސް އެ ޤައުމުން ބުނެއެވެ. ތައިވާނުގެ މިނިވަންކަން ބަލައިގަނެފައި ވަނީ މަދު ޤައުމަކުންނެވެ.