ޔޫކްރެއިނުގެ އިރުދެކުނުގައި އޮންނަ ޒަޕޮރީޜިޔާއަށް ރަޝިޔާއިން ދިން ވަރުގަދަ މިސައިލް ހަމަލާތަކެއްގައި އުމުރުން 50 އަހަރުގެ މީހަކާއި 11 އަހަރުގެ ކުޑަކުއްޖަކު މަރުވެއްޖެއެވެ. ޒަޕޮރީޜިޔާއަށް ދިން ހަމަލާތަކުގައި ޢާންމުންގެ ބަޔަކު މަރުވެފައި ވަނީ، އެ މީހުން ދިރިއުޅޭ ޢިމާރާތައް މިސައިލް ހަމަލާތަކެއް އެރުމުންނެވެ.
ޔޫކްރެއިނުގެ އެމަރޖެންސީ ޚިދުމަތްދޭ އިދާރާއިން ބުނީ، ހަމަލާތަކުގައި ޢިމާރާތް ސުންނާފަތިވެފައިވާ ކަމަށާއި، ވެއްޓިފައިވާ ޢިމާރާތުގެ ކޮންކްރީޓްތަކާއި ގައުކުނޑިތަކުގެ ދަށުން ދެ އަންހެނުން ސަލާމަތް ކުރެވުނު ކަމުގައެވެ. އޭގެ ތެރެއިން 46 އަހަރުގެ އަންހެން މީހާއަކީ މަރުވި 50 އަހަރުގެ މީހާގެ އަނބިމީހާ ކަމަށާއި، ދެން ސަލާމަތް ކުރެވިފައި ވަނީ މަރުވި ކުޑަކުއްޖާގެ މަންމަ ކަމުގައި ވެސް އެ އިދާރާއިން ބުންޏެވެ.
ޒަޕޮރީޜިޔާގެ ސިޓީ ކައުންސިލުން ބުނީ، ރަޝިޔާގެ ހަމަލާތަކުގައި ޢާންމުން ދިރިއުޅޭ އެއް ޢިމާރާތް ސުންނާފަތިވެ، އިތުރު 12 ޢިމާރާތަކަށް ބޮޑެތި ގެއްލުންތަކެއް ލިބުނު ކަމުގައެވެ. މިއީ، ޒަޕޮރީޜިޔާގެ ޢާންމުން ދިރިއުޅޭ ސަރަޙައްދުތަކަށް ރަޝިޔާއިން ގަސްދުގައި ދީފައިވާ ހަމަލާތަކެއް ކަމުގައި ވެސް ޔޫކްރެއިނުން ތުހުމަތު ކުރެއެވެ.
އެ ހަމަލާތަކުގެ ރައްދުގައި ޔޫކްރެއިނުގެ ބާރުގެ ދަށުގައި އޮތް ސަރަޙައްދުން ކްރައިމިޔާއަށް ވެސް މިސައިލް ހަމަލަތަކެއް ދީފައިވެއެވެ. 2014 ވަނަ އަހަރު ރަޝިޔާއިން އަތްގަދަކޮށްފައިވާ ކްރައިމިޔާގެ ފިޔޮޑޯސިޔާ ކިޔާ ރަށަކަށް ދީފައިވާ މިސައިލް ހަމަލާތައް ދިފާޢުކޮށްފައިވާ ކަމުގައި ރަޝިޔާގެ އަސްކަރިއްޔާއިން ބުނެއެވެ.
ރަޝިޔާއިން ޒަޕޮރީޜިޔާއަށް ހަމަލާތަކެއް ދީފައި މި ވަނީ، ރަޝިޔާގެ އިސްތިއުމާރީ ސިފައިންނާ ދެކޮޅަށް ޔޫކްރެއިނުން ކުރަމުންދާ ހަނގުރާމައާ ގުޅޭ ގޮތުން އެމެރިކާއިން އެކުލަވައިލާފައިވާ ޖާސޫސީ މަޢުލާމާތު ހިމެނޭ ސިއްރު ލިޔެކިޔުންތަކެއް ލީކުވެފައިވާ ދަނޑިވަޅެއްގައެވެ. އެ ލިޔެކިޔުންތައް ސޯޝަލް މީޑިޔާގައި ލީކުކޮށްލާފައި ވަނީ ރަޝިޔާއިން ކަމަށް އެމެރިކާއިން ތުހުމަތު ކުރެއެވެ.
ހަނގުރާމައިގައި މަރުވެފައިވާ ރަޝިޔާ ސިފައިންގެ ޢަދަދުތައް ވެސް ލީކުކޮށްލާފައިވާ ލިޔެކިޔުންތަކުގައި ހިމެނޭ ކަމުގައި އެމެރިކާ އޮފިޝަލުން ބުނެއެވެ. ނަމަވެސް، ލީކުކޮށްލުމުގެ ކުރިން، އެ ޢަދަދުތަކަށް ބަދަލު ގެނެސް، ޢަދަދުތައް ދަށްކޮށްފައިވާ ކަމުގައި ވެސް އެމެރިކާއިން ބުނެއެވެ. މި ކަމާ ގުޅޭ ގޮތުން އެއްވެސް އެއްޗެއް ބުނުމަށް ރަޝިޔާއިން ވަނީ ދެކޮޅު ހަދާފައެވެ. އެ ލިޔެކިޔުންތަކުގައި ޔޫކްރެއިނުގެ އިތުރުން މެދުއިރުމައްޗާއި ޗައިނާއާ ގުޅޭ ގޮތުން އެމެރިކާއިން އެއްކޮށްފައިވާ ޖާސޫސީ މަޢުލޫމާތުތަކެއް ހިމެނޭ ކަމުގައި ވެސް އެމެރިކާގެ ނޫހެއް ކަމުގައިވާ ދަ ނިއު ޔޯކް ޓައިސްގައި ރިޕޯޓުކޮށްފައިވެއެވެ.
އެމެރިކާގެ ސިއްރު ލިޔެކިޔުންތަކެއް މި ފަދަ ގޮތަކަށް ސޯޝަލް މީޑިޔާގައި ލީކުކޮށްލުމަކީ ޢާންމު ކަމެއް ނޫނެވެ. އަދި، އެ ޤައުމުގެ ޖަސްޓިސް ޑިޕާޓްމަންޓާއި ދިފާޢީ އިދާރާއިން ދަނީ މި މައްސަލަ ތަހުޤީޤު ކުރަމުންނެވެ. މީގެ އިތުރުން، އެމެރިކާގެ ޖާސޫސީ އިދާރާ – ސީ.އައި.އޭ.އިން ވެސް ދަނީ މި މައްސަލަ ތަހުޤީޤު ކުރަމުންނެވެ.
ލީކުކޮށްލާފައިވާ އެއް ލިޔުމުގައި ބުނެފައި ވަނީ، ރަޝިޔާ-ޔޫކްރެއިން ހަނގުރާމައިގައި މިހާތަނަށް މަރުވެފައިވާ ރަޝިޔާ ސިފައިންގެ ޢަދަދު ގާތްގަނޑަކަށް 17,500 އަށް އަރާ ކަމުގައެވެ. މިއީ ސައްޙަ ޢަދަދުތަކެއް ނޫން ކަމުގައި އެމެރިކާގެ އޮފިޝަލުން ވިދާޅުވެއެވެ. އަދި، ހަނގުރާމައިގައި މަރުވެފައިވާ އަދި ޒަޚަމުވެފައިވާ ރަޝިޔާ ސިފައިންގެ ޢަދަދުތައް 200,000 އަށްވުރެ މައްޗަށް އަރާނެ ކަމަށް އެމެރިކާއިން އަންދާޒާ ކުރެއެވެ.