ރަޝިޔާއިން ޔޫކްރެއިނަށް އަރައި ކުރަމުންދާ ހަނގުރާމައިގެ ތެރެއިން ވަގަށް ގެންގޮސްފައިވާ ޔޫކްރެއިނުގެ ކުޑަކުދިންގެ ތެރެއިން 31 ކުއްޖަކު މިނިވަންކޮށް، އަނބުރާ ޔޫކްރެއިނާ ހަވާލުކޮށްފައިވާ ކަމުގައި މަދަނީ ޖަމުޢިއްޔާއަކުން ބުނެފިއެވެ. "ސޭވް ޔޫކްރެއިން" ޖަމުޢިއްޔާއިން ބުނީ، ރަޝިޔާއިން ފޭރިގަނެގެން ގެންގޮސްފައިވާ ޔޫކްރެއިނުގެ ކުޑަކުދިންގެ ތެރެއިން 31 ކުދިން އެ ކުދިންގެ ޢާއިލާތަކަށް ރައްދުކޮށްފައިވާ ކަމުގައެވެ.
އެ ޖަމުޢިއްޔާގެ އިސް އޮފިޝަލެއް ކަމުގައިވާ މައިކޮލާ ކުލެބާ ބުނީ، ވަގަށް ރަޝިޔާއަށް ގެންގޮސްފައިވާ ކުދިންނަކީ، ރަޝިޔާއިން ވެރިވެގަނެފައިވާ ޔޫކްރެއިނުގެ ރަށްތަކުގެ ކުދިން ކަމުގައެވެ. އޭގެ ތެރޭގައި ޔޫކްރެއިނުގެ އިރުއުތުރުގައިވާ ޚާރްކިވްގެ ކުދިންނާއި، ދެކުނުގައިވާ ޚާރްސަންގެ ކުދިން ހިމެނޭ ކަމުގައި ވެސް އޭނާ ބުންޏެވެ. ސޭވް ޔޫކްރެއިން ޖަމުޢިއްޔާއަކީ، ގަދަބާރުން ރަޝިޔާއަށް ގެންގޮސްފައިވާ ޔޫކްރެއިނުގެ ކުޑަކުދިން ސަލާމަތް ކުރުމަށް މަސައްކަތް ކުރާ ޖަމުޢިއްޔާއެކެވެ.
ރަޝިޔާއިން މިނިވަންކޮށްފައިވާ 31 ކުދިން މިހާރު ވަނީ ޔޫކްރެއިނުގެ ސަރުކާރުގެ ބާރުގެ ދަށުގައި އޮތް ސަރަޙައްދަށް ގެންގޮސްފައެވެ. އެ ކުދިންގެ މައިންބަފައިން ވަނީ އެ ކުދިންނާ ހަވާލުވުމަށް އެ ސަރަޙައްދަށް ދަތުރުކޮށްފައެވެ. މިއީ، ސޭވް ޔޫކްރެއިން ޖަމުޢިއްޔާއިން މިހާތަނަށް ހިންގާފައިވާ އެންމެ ނުރައްކާތެރި އޮޕަރޭޝަން ކަމުގައި އެ ޖަމުޢިއްޔާއިން ބުނެއެވެ.
ރަޝިޔާ ސިފައިން ޔޫކްރެއިނަށް ފޮނުވައިގެން އެ ޤައުމުގެ ރައީސް ވްލަޑިމިޔަރ ޕުޓިން ހަނގުރާމަ ފައްޓަވާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. އޭގެ ފަހުން މިހާތަނަށް ޔޫކްރެއިނުގެ 16,000 އަށްވުރެ ގިނަ ކުޑަކުދިން ރަޝިޔާއަށް ގެންގޮސްފައިވާ ކަމުގައި ޔޫކްރެއިނުން ތުހުމަތުކުރެއެވެ. އެ ކުދިން މިހާރު ދިރިއުޅެމުން ދަނީ، ރަޝިޔާގެ ކުޑަކުދިން ބަލަހައްޓާ މަރުކަޒުތަކާއި ފޮސްޓަރ ޢާއިލާތަކާ އެކުގައެވެ.
މިއީ ހަނގުރާމައިގެ ކުށެއްގެ ގޮތުގައި ކަނޑައަޅައި، ބައިނަލްއަޤުވާމީ ޖިނާޢީ ކޯޓު (އައި.ސީ.ސީ)އިން ވަނީ ޕުޓިން ހައްޔަރު ކުރުމުގެ އަމުރެއް ނެރެފައެވެ. ޕުޓިންގެ އިތުރުން ކުޑަކުދިންގެ ހައްޤުތަކާ ބެހޭ ރަޝިޔާގެ ކޮމިޝަނަރު ލްވޯވާ-ބެލޯވާއާ ދެކޮޅަށް ވެސް ހަމަ އެ ކުށުގެ ތުހުމަތުގައި އައި.ސީ.ސީން ވަނީ އަމުރު ނެރެފައެވެ. ނަމަވެސް، އެ ކޯޓުގެ ތުހުމަތުތައް ޕުޓިން ދޮގު ކުރައްވައެވެ.
ލްވޯވާ-ބެލޯވާ ވިދާޅުވެފައި ވަނީ، ހަނގުރާމަ ފެށި ފަހުން ރަޝިޔާއަށް ހިޖުރަކޮށްފައިވާ ޔޫކްރެއިނުގެ ފަސް މިލިޔަނަށް ވުރެ ގިނަ މީހުންގެ ތެރޭގައި 730,000 އަށްވުރެ ގިނަ ޢަދަދެއްގެ ކުޑަކުދިން ހިމެނޭ ކަމުގައެވެ. ރަޝިޔާއަށް ހިޖުރަކުރި މީހުންގެ ތެރޭގައި ގިނައީ ދޮންބާސްގެ ޖުމްހޫރިއްޔާތަކުގެ ރައްޔިތުން ކަމުގައި ވެސް އޭނާ ވިދާޅުވިއެވެ. ދޮންބާސްގެ ޖުމްހޫރިއްޔާތައް ކަމުގައި ރަޝިޔާއިން ދެކެނީ އެ ޤައުމުން އަތްގަދަކޮށްފައިވާ ޔޫކްރެއިނުގެ އިރުމަތީގައިވާ ދޮންބާސް ސަރަޙައްދަށެވެ. އެ ސަރަޙައްދު ބެހިފައި ވަނީ ލުހާންސްކާއި ޑޮނެޓްސްކުގެ މައްޗަށެވެ.