ނ.މަނަދޫ އަންނާރުމާގެ 62އ، ނައީމާ މޫސާގެ މަރާއި ގުޅިގެން، އެރަށުގެ ބައެއް ސަރަހައްދުތައް ބަންދުކޮށްގެން ތަހްގީގުގެ ބޭނުމަށް އެސަރަހައްދުތައް ބަލައިފިއެވެ. ނަޢީމާ މަރުވެފައި އޮއްވާ ފެނުނީ މިދިޔަ ހުކުރު ދުވަހު އޭނާ ދިރިއުޅުނު ގޭގެ ކޮޓަރިއެއްގެ ތެރޭގައި އޮއްވައެވެ. އެނާ ފެނުނުއިރު ޒަޚަމްތަކެއް ހުރިކަމަށް އެރަށުން ވާހަކަ ދެއްކި މީހުން ބުނެފައިވެއެވެ.
މަނަދޫ ކައުންސިލްގެ ރައީސް ޢަބްދުއް ރަހުމާނު ސަބީހު ވިދާޅުވީ، ނަޢީމާގެ މަރުގެ މައްސަލާގައި އޭނާ ދިރިއުޅުނު ގޭގެ އިތުރުން ބަންދުކޮށްފައިވަނީ، އެ ގެޔާއި ދުރު ސަރަޙައްދެއްކަމަށެވެ. އެއީ އެ ރަށުގެ ހޮސްޕިޓަލްގެ ހުޅަނގު ސަރަޙައްދެއްކަމަށްވެސް ކައުންސިލްގެ ރައީސް ވިދާޅުވިއެވެ. ނަމަވެސް މިހާރު އެ ސަރަހައްދު ފުލުހުން ވަނީ ހުޅުވާލާފައެވެ.
ނާޢީމާގެ މަރުގެ ތަޙުޤީޤުކުރިއަށް ގެންދަނީ ހޮމިސައިޑް ނުވަތަ މަރާލާފައިވާ މީހެއްގެ ތަޙުޤީޤުގެ ގޮތުގައެވެ. އަދި ފުލުހުންގެ ސީރިއަސް އެންޑް އޮގަނައިޒްޑް ކްރައިމް ޑިޕާރޓްމަންޓްގެ ޚާއްސަ ތަހުގީގު ޓީމަކާއި، ފޮރެންސިކް ތަޙުގީގު ޓީމެއްގެ އިތުރުން ފޮރެންސިކް ޕެތޮލޮޖިސްޓެއް މަނަދޫގައި ހަރަކާތްތެރިވަމުން އަންނަކަމަށް ފުލުހުން ވިދާޅުވިއެވެ.
ތަހުޤީޤަށް ބޭނުންވާ މަޢުލޫމާތާއި ސާމްޕަލްތައް ނެގުމަށްފަހު ނަޢީމާގެ ހަށިގަނޑު ވަޅުލާފައިވަނީ އިއްޔެގެ ހަވީރުއެވެ. ފުލުހުން ވިދާޅުވީ ނަޢީމާ މޫސާގެ ހަށިގަނޑު އާއިލާއާއި ހަވާލުކުރީ، ތަހުލީލުތަކަށް ބޭނުންވާ ސާމްޕަލް ނެގުމަށްފަހު އިތުރަށް ޕޯސްޓްމޯޓަމް ހަދަންޖެހޭ ސަބަބެއް ނެތްކަމަށް ފުލުހުންގެ ފޮރެންސިކް ޕެތޮލޮޖިސްޓް ނިންމުމުންކަމަށެވެ. މި ހާދިސާގެ އެއްވެސް ތަފްސީލެއް ފުލުހުން ހާމަކޮށްފައެއް ނުވެއެވެ. ނަމަވެސް މަޢުލޫމާތު ލިބޭގޮތުގައި، ނަޢީމާ ފެނުނުއިރު އޭނާގެ ހަޑިގަނޑުގައި ބޮޑެތި ޒަޙަމްތައް ހުއްޓެވެ. އެގޮތުން ހަޑިގަނޑުގެ 21 ތަނަކަށް ވަޅިން ހަމަލާ ދީފައިވާ ނިޝާންތައް ހުރިކަމަށް މަޢުލޫމާތު ލިބެއެވެ.
މަރުގެ މި ހާދިސާއާއި ގުޅިގެން، ފުލުހުންގެ ހުއްދަ ނެތި ރަށަށް މީހުން އަރާ ފޭބުމާއި، އަދި އުޅަނދުފަހަރު ރަށަށް ދަތުރުކުރުމުގައިވެސް ފުލުހުންގެ ހުއްދަ ނެތި ނުކުރުމަށް ވަނީ އަންގާފައެވެ. އަދިވެސް ޢަމަލުކުރަމުންދަނީ މިގޮތަށްކަމަށް ކައުންސިލްގެ ރައީސް ވިދާޅުވިއެވެ.
ފުލުހުން ވަނީ ނަޢީމާގެ މަރާ ގުޅޭ އެއްވެސް މަޢުލޫމާތެއް ޙިއްސާކުރައްބޭނުންވާ ފަރާތެއްނަމަ ފުލުހުންގެ ސީރިއަސް އެންޑް އޮގަނައިޒްޑް ކްރައިމް ޑިޕަރޓްމަންޓްގެ ނަންބަރު 9911099އަށް ގުޅާ ޙިއްސާކުރުމަށް އެދިފައެވެ.