ތުރުކީވިލާތުގެ އަސްކަރިއްޔާއިން އިރާޤުގެ އުތުރުގައިވާ ސުލައިމާނިއްޔާ ވައިގެ ބަނދަރަށް އަމާޒުކޮށް ޑްރޯން ހަމަލާތަކެއް ދީފައިވާ ކަމަށް ބުނެ، އިރާޤުގެ ސަރުކާރުން އެ ކަމާ މެދު ކަންބޮޑުވުން ފާޅުކޮށްފިއެވެ. މި ކަމާ ގުޅިގެން އިރާޤުގެ ރިޔާސީ ގަނޑުވަރުން ނެރުނު ބަޔާނެއްގައި އަންކާރާގެ ސަރުކާރަށް ވަރަށް ބޮޑަށް ފާޑުކިޔާފައިވެއެވެ.
އިރާޤުން ބުނީ، އެ ޤައުމުގެ ފަސްގަނޑަށް އަރައި އުދުވާންތައް ހިންގުމާއި، އެ ޤައުމަށް ހަމަލާ ދިނުމުގެ އެއްވެސް ހައްޤެއް ތުރުކީވިލާތަށް ނޯންނާނެ ކަމުގައެވެ. އަދި، އެއީ ބައިނަލްއަޤުވާމީ ޤާނޫނުތަކުގެ ހުދޫދުގެ ތެރެއިން ހިންގާފައިވާ އަމަލުތަކެއް ނޫން ކަމުގައެވެ. ތުރުކީވިލާތާ ދެކޮޅު ބަޔަކު އިރާޤުގައި ދިރިއުޅުމަކީ، އިރާޤަށް ހަމަލާދިނުމަށް ތުރުކީވިލާތަށް ހައްޤު ލިބޭ ސަބަބެއް ނޫން ކަމުގައި ވެސް އެ ބަޔާނުގައި ބުނެފައިވެއެވެ.
"ތުރުކީވިލާތުން އެ ދަނީ އިރާޤުގެ ޢާންމު ރައްޔިތުންނަށް ބިރުދައްކައި ފުރައްސާރަ ކުރަމުން. ތުރުކީވިލާތުގެ އަސްކަރިއްޔާއިން ދީފައިވާ ހަމަލާތަކަށް މަޢާފަށް އެދެން ޖެހޭނެ. މަޢާފަށް އެދުމަށް އަންކާރާއަށް ގޮވައިލަން،" އިރާޤުގެ ރިޔާސީ ގަނޑުވަރުން ބުންޏެވެ.
އިރާޤުގެ އުތުރުގައި ވެރިކަންކުރާ ކުރުދީންގެ ސަރަޙައްދީ ސަރުކާރު (ކޭ.އާރް.ޖީ)ގެ ޚާރިޖީ ދާއިރާގެ އިސްވެރިޔާ ލަވްކު ޣަފޫރީ ބުނީ ސުލައިމާނިއްޔާ ވައިގެ ބަނދަރު ހުންނަ ސަރަޙައްދަށް ތުރުކީވިލާތުގެ އަސްކަރީ ޑްރޯނަކުން ހަމަލާދީފައިވާ ކަމުގައެވެ. ނަމަވެސް، މި ހަމަލާގައި އެއްވެސް މީހަކަށް އަދި މުދަލަކަށް ގެއްލުންވެފައި ނުވާ ކަމުގައި ވެސް އޭނާ ބުންޏެވެ. ވައިގެ އުދުހުންތަކަށް ވެސް ބުރޫއަރާފައެއް ނުވެއެވެ.
ނަމަވެސް، އިރާޤުގެ އެއްވެސް ސަރަޙައްދަކަށް އަމާޒުކޮށް އެއްވެސް ހަމަލާއެއް ދީފައި ނުވާނެ ކަމުގައި ތުރުކީވިލާތުގެ އަސްކަރިއްޔާއިން ބުނެއެވެ. އިރާޤުގައި ހަރަކާތްތެރިވާ އެމެރިކާ ސިފައިން ބުނީ، އެމެރިކާގެ އަސްކަރިއްޔާގެ އޮފިޝަލުންތަކެއް ދަތުރުކުރަމުންދިޔަ ގާފިލާއަކަށް އަމާޒުކޮށް ވައިގެ ހަމަލާއެއް ދީފައިވާ ކަމުގައެވެ. ނަމަވެސް، އެ ހަމަލާގައި އެއްވެސް މީހެއްގެ ފުރާނައަށް ނުރައްކާ ނުވާ ކަމުގައި އެމެރިކާގެ އަސްކަރިއްޔާއިން ބުންޏެވެ.
ސުލައިމާނިއްޔާ ސަރަޙައްދުގައި ވެރިކަންކުރާ ޕާޓީ ޕޭޓްރިއަޓް ޔޫނިއަން އޮފް ކުރުދިސްތާން (ޕީ.ޔޫ.ކޭ)އިން ބުނީ، ތުރުކީވިލާތުން ހަމަލާތައް ދިން ވަގުތު ސޫރިޔާގެ ސަރުކާރާ ދެކޮޅަށް ހަނގުރާކުރަމުންދާ ސީރިޔަން ޑިމޮކްރެޓިކް ފޯސަސް (އެސް.ޑީ.އެފް)ގެ އިސްވެރިޔާ މަޒްލޫމް ޢަބްދީއާއި އެމެރިކާގެ އަސްކަރިއްޔާގެ ތިން އިސް އޮފިސަރުން ވައިގެ ބަނދަރު އޮންނަ ސަރަޙައްދުގައި ތިބި ކަމުގައެވެ.
ސޫރިޔާގެ ހަރަކާތްތެރިވާ ކުރުދީންގެ ފައުޖުތަކަކީ ޓެރެރިސްޓުންގެ ގޮތުގައި ތުރުކީވިލާތުން ގަބޫލުކުރެއެވެ. އަދި، އެއީ ތުރުކީވިލާތުގެ މިނިވަންކަމާއި ސިޔާދަތަށް އޮތް ނުރައްކަލެއްގެ ގޮތުގައި އެ ޤައުމުން ދެކެއެވެ. ނަމަވެސް، އެސް.ޑީ.އެފް.އަކީ އެމެރިކާއިން އިސްނަގައިގެން އައި.އެސް. ޖަމާޢަތާ ދެކޮޅަށް ކުރަމުންދާ ހަނގުރާމައިގައި އެ ޤައުމަށް އެހީތެރިކަން ފޯރުކޮށްދެމުންދާ ފައުޖެކެވެ.
މިއީ، އިރާޤުގެ އިތުރުން ސޫރިޔާގެ އުތުރުގެ ސަރަޙައްދުތަކަށް ތުރުކީވިލާތުން ހަމަލާދީފައިވާ ފުރަތަމަ ފަހަރެއް ނޫނެވެ. މި ހަމަލާތައް އަމާޒުކޮށްފައި ވަނީ ސޫރިޔާގެ ކުރުދީ ވައި.ޕީ.ގީ. ހަނގުރާމަވެރިންނާއި، އައި.އެސް. އަދި ކުރުދިސްތާން ވަރކަރސް ޕާޓީ (ޕީ.ކޭ.ކޭ)ގެ ހަނގުރާމަވެރިންނަށެވެ. ޕީ.ކޭ.ކޭ.އަކީ 1984 ވަނަ އަހަރުން ފެށިގެން ތުރުކީވިލާތުގެ ސަރުކާރާ ދެކޮޅަށް ހަނގުރާމަ ކުރަމުންދާ ޖަމާޢަތެކެވެ. ތުރުކީވިލާތުން ދެކޭ ގޮތުގައި އެއީ ވެސް ޓެރެރިސްޓު ޖަމާޢަތެކެވެ.