އައްޞަފާ ޕްރައިވެޓް ލިމިޓެޑް މެދުވެރިކޮށް ޢުމްރާއާށް ނުފުރުނު މީހުން، މިރަމަޟާންމަހުގެ 20ވަނަ ދުވަހު ފުރުމަށް ހުރިހާ އިންތިޒާމްތައް ހަމަޖެހިއްޖެކަމަށް އެ ގްރޫޕުން ބުނެފިއެވެ.
އެ ގްރޫޕް މެދުވެރިކޮށް މިއަހަރު 180 މީހުން އުމްރާގެ އަޅުކަމަށް ދިއުމަށް ފައިސާ ދައްކާފައިވެއެވެ. ނަމަވެސް ފުރަން ވަރަށް ވަގުތު ކުޑަތަންވެފައިވަނިކޮށް، ވިސާ ހަމަނުޖެހޭކަމަށް ބުނެ ދަތުރު ކެންސަލްކުރިއެވެ. މިކަމާ ގުޅިގެން ޢުމްރާވެރިންގެ އާއިލާތަކާއި ޢާންމު ގިނަ ފަރާތްތަކުން ކަންބޮޑުވުން ފާޅުކޮށްފައިވެއެވެ. އަދި އެ ގްރޫޕުން ހުކުރު ދުވަހު ވަނީ ދަތުރު މުޅިން ކެންސަލް ކޮށްފައިވާކަމަށްވެސް ޢުމްރާވެރިންނަށް އަންގާފައެވެ.
މިކަމާއި ގުޅިގެން އިސްލާމިކް މިނިސްޓްރީން ވަނީ މި ރަމަޞާން މަހު، ވީހާވެސް އަވަހަށް އެމީހުންނަށް ފުރޭނެ އިންތިޒާމް ހަމަޖެއްސުމަށް ޞަފާ ގްރޫޕަށް އަންގާފައެވެ. އަދި އެމީހުންގެ އަތުން އިތުރަށް އެއްވެސް ފައިސާއެއް ނުނެގުމަށްވެސް އަންގާފައިވެވެ. މި މައްސަލައިގައި ކަންހިނގައިދިޔަ ގޮތް މިނިސްޓްރީން ބަލަމުންދާކަމަށްވެސް ވިދާޅުވެފައިވެއެވެ.
ޞަފާ ގްރޫޕުން ޕީއެސްއެމްއަށް މަޢުލޫމާތު ދެމުން ބުނެފައިވަނީ މިހާރު ދަތުރުގެ އިންތިޒާމްތައް އަލުން ހަމަޖައްސާފައިވާކަމަށެވެ. އެގޮތުން ރަމަޟާން މަހުގެ 20ވަނަ ދުވަސް ކަމުގައިވާ، އަންނަ އަންގާރަ ދުވަހު އެމީހުންނަށް އުމްރާގެ އަޅުކަމަށް ފުރޭނެ އިންތިޒާމް މިހާރު ހަމަޖައްސާފައިވާކަމަށެވެ. އެގޮތުން ޓިކެޓާއި ވިސާއާއި، އެމީހުން ސަޢުދީގައި ތިބުމާއި އަޅުކަމުގެ ހުރިހާ އިންތިޒާމްތައްވެސް މިހާރު ހަމަޖެހިފައިވާކަމަށް ޞަފާ ގުރޫޕުން ބުންޏެވެ.
ބުރާސްފަތި ދުވަހު އިސްލާމިކް މިނިސްޓްރީން ނެރުނު ބަޔާނުގައި ވިދާޅުވީ، ޢުމްރާވެރިންނަށް ނުފުރުނީ ސަޢުދީ ސަރުކާރުން ނުވަތަ ދިވެހި ސަރުކާރުން ދޭންޖެހޭ އެއްވެސް ހުއްދައެއް ނުލިބިގެން ނޫންކަމަށެވެ. އަދި ޢުމްރާ ވިސާއަކީ 3 މަސްދުވަހަށް ދުރާލާ ލިބޭ އެއްޗަކަށްވާއިރު، ކުންފުނިން އެގޮތަށް ހަމަޖައްސާފައި ނުވާކަމަށް އިސްލާމިކް މިނިސްޓްރީން ވިދާޅުވެފައިވެއެވެ.
އިސްލާމިކް މިނިސްޓްރީން ވިދާޅުވީ، ޢުމްރާ ވިސާއަކީ ސަޢުދީ ސަރުކާރުން އެކަމަށް ހުއްދަ ދީފައިވާ އެޖެންސީތަކުން ޢުމްރާ ކުންފުނިތަކަށް ދޭ ޚިދުމަތެއްކަމަށެވެ. އެގޮތުން މި ވިސާއަކީ މޯލްޑިވްސް ޙައްޖު ކޯޕަރޭޝަނުންވެސް ފޯރުކޮށްދޭ ޚިދުމަތެއްކަމަށް މިނިސްޓްރީން ވިދާޅުވެއެވެ. ނަމަވެސް މައްސަލަ ދިމާވީ ޞަފާ ގްރޫޕުން ވިސާ ހަމަޖެއްސުމަށް މަސައްކަތްކުރި ސަޢުދީގެ އެޖެންޓުން އެކަން ހަމަޖައްސާފައިނުވާތީކަމަށް އިސްލާމިކް މިނިސްޓްރީން ވިދާޅުވެފައިވެއެވެ.
މިފަދަ މަތިވެރި އަޅުކަމަކަށް ދިއުމަށް ފައިސާ ދައްކާ، ފުރަން އޮންނަ ދުވަހަށް، ދަތުރުވެރިނަން ފުރޭގޮތް ނުވުމަކީ މިނިސްޓްރީން ކަންބޮޑުވާ ކަމެއްކަމަށް އެ މިނިސްޓްރީން ވިދާޅުވެފައިވެއެވެ.
ޢުމްރާއަށް މީހުން ގެންދިއުމަށް މިނިސްޓްރީން ހުއްދަ ދީފައިވާ ކުންފުނިތަކުން "ދިވެހިރާއްޖެއިން ޢުމްރާއަށް މީހުން ގެންދިއުމާބެހޭ އުސޫލު"އާއި އެއްގޮތަށް ދަތުރުގެ އިންތިޒާމްތައް ހަމަޖެއްސުމަށް އެ މިނިސްޓްރީން ވަނީ އިލްތިމާސްކުރައްވާފައެވެ.