ޔަހޫދީ އިސްރާޢީލުގެ އަސްކަރިއްޔާއިން ފަލަސްޠީނުގެ މުސްލިމުންނާ ދެކޮޅަށް ހިންގަމުންދާ ލާއިންސާނީ އުދުވާންތަކާއި، ފަލަސްޠީނުގެ ރަށްތަކަށް ބޮންއެޅުން ހުއްޓުވުމަށް މަސައްކަތް ކުރަމުންދާ ކަމުގައި ޤަޠަރުން ބުނެފިއެވެ. ބަރަކާތްތެރި ރަމަޟާން މަހާ ދިމާކޮށް ޔަހޫދީ ޓެރެރިސްޓު ސިފައިންނާއި ޖައްބާރު ފުލުހުން ހިންގަމުންދާ އުދުވާންތައް ވަނީ އިތުރުކޮށްފައެވެ. ޔަހޫދީންގެ ނުބައިކަން ވަނީ ހައްދުފަހަނައަޅާފައެވެ.
ޔަހޫދީ ފުލުހުން ދެ ދުވަހެއްގެ މަތިން ވަނީ މަސްޖިދު އަލް-އަޤްޞާއަށް ވަދެ، ތިންވަނައަށް އެންމެ މުޤައްދަޞް މިސްކިތުގެ ހުރުމަތް ކަނޑާފައެވެ. ޔަހޫދީންގެ ޖައްބާރު ފުލުހުން އަލް-އަޤްޞާއަށް ގަދަބާރުން ވަދެފައި ވަނީ ފަތިސް ނަމާދު ވަގުތުގައި ގިނަ ޢަދަދެއްގެ ބަޔަކު ޖަމާޢަތުގައި ބައިވެރިވުމަށް މިސްކިތަށް އަރައި ތިބި ވަގުތުގައެވެ.
ގަދަބާރުން މިސްކިތަށް ވަދެ، ޔަހޫދީ ފުލުހުން ވަނީ ނަމާދަށް އަރައި ތިބި މުސްލިމުންނަށް ހަމަލާދީފައެވެ. އެ މީހުންނަށް ފުރައްސާރަކޮށް އަނިޔާކޮށްފައެވެ. އަދި 300 އަށްވުރެ ގިނަ މުސްލިމުން ހައްޔަރުކޮށްފައެވެ. ޔަހޫދީން ވަނީ މިސްކިތުގެ ތެރޭގައި ހަތިޔާރު ވެސް ބޭނުންކޮށްފައެވެ. ރަބަރު ވަޒަން ޖަހައި ގިނަ ޢަދަދެއްގެ ބަޔަކު ޒަޚަމުކޮށްލާ، މިސްކިތުގެ ތެރޭގައި ކަރުނަ ގޭސް ޖަހާފައެވެ.
ޤަޠަރުގެ އިތުރުން މުސްލިމް އުންމަތުން ވަނީ ޔަހޫދީންގެ ޖައްބާރު އަމަލުތައް އެންމެ ހަރުކަށި އިބާރާތުން ކުށްވެރިކޮށްފައެވެ. ޔަހޫދީ ފުލުހުން ހިންގާފައި ވަނީ ވަރަށް އަނިޔާވެރި ކުށުގެ އަމަލުތަކެއް ކަމުގައި ޤަޠަރުން ބުންޏެވެ. އަދި، މި ފަދަ ލާއިންސާނީ އުދުވާންތައް ހުއްޓައިލަން ޔަހޫދީ ސަރުކާރަށް ގޮވައިލާފައެވެ.
އަލް-އަޤްޞާގެ ހުރުމަތް ކެނޑުމުން ފަލަސްޠީނުގެ މިނިވަންކަމަށް ޖިހާދު ކުރަމުންދާ މުޖާހިދުންގެ ޖަމާޢަތްތަކުން ވަނީ އެ ކަމުގެ ބަދަލުހިފަން ތެދުވެފައެވެ. އަދި، ޣައްޒާއާއި ލުބުނާނުގެ ސަރަޙައްދުތަކުން ޔަހޫދީ އިސްރާޢީލުގެ އުތުރުގެ ރަށްތަކަށް ރޮކެޓް ހަމަލާތަކެއް ދީފައެވެ. އަދި، އިސްރާޢީލުން ވެރިވެގަނެފައިވާ ހުޅަނގު އައްސޭރީގައި ދިރިއުޅޭ ޔަހޫދީ ޢާއިލާއަކަށް ހަމަލާދީ ދެ މީހުން މަރައިލާފައެވެ.
އޭގެ ފަހުން، އިސްރާޢީލުގައި ދިރިއުޅޭ ޢަރަބި ދަރިކޮޅުގެ މީހަކު ވަނީ ކާރަކުން ޖައްސައި އެކަކު މަރައިލާ، އިތުރު ބަޔަކު ޒަޚަމުކޮށްލާފައެވެ. ރޮކެޓް ހަމަލާތަކުގެ ރައްދުގައި ޔަހޫދީ އިސްރާޢީލުގެ އަސްކަރީ މަތިންދާބޯޓުތަކުން ވަނީ ޣައްޒާއާއި ލުބުނާނުގެ ސަރަޙައްދުތަކަށް ވަރުގަދަ ވައިގެ ހަމަލާތަކެއް ދީފައެވެ.
ރަމަޟާން މަހާ ދިމާކޮށް ފަލަސްޠީނުގެ މުސްލިމުންނާއި ޔަހޫދީ ޖައްބާރު ސިފައިންނާއި ޓެރެރިސްޓު ފުލުހުންނާ ދެމެދު ފަށާފައިވާ ހަމަނުޖެހުންތައް ހުއްޓުވަން މަސައްކަތް ކުރަމުންދާ ކަމުގައި ޤަޠަރުން ބުނެއެވެ. އެ ޤައުމުގެ އޮފިޝަލެއް ވިދާޅުވީ، މެދުވެރިއެއްގެ ގޮތުން ފަލަސްޠީނުގެ މުސްލިމުންނާއި ޖައްބާރު ޔަހޫދީންނާ އެކު މަޝްވަރާ ކުރަން ފަށާފައިވާ ކަމުގައެވެ.
މުޅި މުސްލިމް އުންމަތުން ޔަހޫދީންގެ ލާއިންސާނީ އުދުވާންތައް ކުށްވެރިކޮށް، ހަމަނުޖެހުންތައް ހުއްޓައިލަން ގޮވައިލަމުންދާއިރު، އ.ދ.ގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝް ވަނީ ޔަހޫދީންނަށް އަމާޒުކޮށް ޣައްޒާއާއި ލުބުނާނުގެ މުސްލިމުން ދީފައިވާ ރޮކެޓް ހަމަލާތައް ވެސް ކުށްވެރި ކުރައްވާފައެވެ. ޔަހޫދީން ހިންގަމުންދާ ލާއިންސާނީ އުދުވާންތަކާ ގުޅިގެން އ.ދ.ގެ ސަލާމަތީ މަޖިލީހުން ވެސް ވަނީ ކުއްލި ބައްދަލުވުމެއް ބާއްވާފައެވެ. އެ ބައްދަލުވުން ބާއްވާފައި ވަނީ އެކުވެރި ޢަރަބި ޢިމާރާތް (ޔޫ.އޭ.އީ)އާއި ޖަޕާނުގެ އިސްނެގުމުގެ މަތިންނެވެ.
"ފަލަސްޠީނާއި އިސްރާޢީލުގައި ހިންގަމުންދާ ހަމަނުޖެހުންތަކާ ގުޅޭ ގޮތުން ސަލާމަތީ މަޖިލީހުގެ ހުރިހާ މެންބަރުން އެއްބަސްވާ ކަމަކީ، ހަމަނުޖެހުންތައް ވަގުތުން ހުއްޓައިލަން ޖެހޭ ކަން. އަދި، ހަމަޖެހުން ގާއިމުކުރަން ޖެހޭ ކަން،" ޔޫ.އޭ.އީ.އިން އ.ދ.އަށް ކަނޑައަޅާފައި ހުންނަވާ ދާއިމީ މަންދޫބު ލާނާ ޒަކީ ނުޞައިބާ ވިދާޅުވިއެވެ.
ޔޫކްރެއިނަށް އަރައި އެ ޤައުމުގެ ރައްޔިތުންނާ ދެކޮޅަށް ހަނގުރާމަ ކުރަމުންދާ ރަޝިޔާއިން ވެސް ވަނީ ޔަހޫދީ އިސްރާޢީލުގެ އަމަލުތައް ކުށްވެރިކޮށްފައެވެ. "މިއަދު މި ފެންނަ ހަމަނުޖެހުންތަކަކީ ވަރަށް ނުރައްކާތެރި ހަމަނުޖެހުންތަކެއް. އިސްރާޢީލަށް ވެސް ވަނީ ހަމަލާދީފައި. އަދި އިސްރާޢީލުން ވަނީ ލުބުނާނަށް ވެސް ވައިގެ ހަމަލާތައް ދީފައި. ހަމަނުޖެހުންތައް އިތުރަށް ދެމިގެންދިޔަ ދީގެން ނުވާނެ،" ރަޝިޔާއިން އ.ދ.އަށް ކަނޑައަޅާފައި ހުންނަވާ ދާއިމީ މަންދޫބު ވަސީލީ ނެބެންޒްޔާ ވިދާޅުވިއެވެ.