ކެނެޑާގެ އެންމެ އާބާދީ ބޮޑު ސަރަޙައްދުތަކަށް ފިނީގެ ތޫފާނެއް އަރައި ހިނގި ހާދިސާތަކުގައި ދެ މީހަކު މަރުވެ، ބޮޑު ސަރަޙައްދަކުން ކަރަންޓުގެ ޚިދުމަތް މެދުކެނޑިއްޖެއެވެ. ތޫފާނާ އެކު ބޯކޮށް ވާރޭވެހި ވައި ބާރުވުމާ ގުޅިގެން ގިނަ ޢަދަދެއްގެ ގަސްތައް ވެއްޓި ކަރަންޓުގެ ޚިދުމަތް ދިނުމަށް ބޭނުންކުރާ ހޮޅިދަނޑިތަކަށް ވަނީ ގެއްލުން ލިބިފައެވެ.
ފިނީގެ ތޫފާނުގެ އަސަރު އެންމެ ބޮޑަށް ކުރަމުން ދަނީ ކުއެބެކާއި އޮންޓާރިޔޯއަށެވެ. ކުއެބެކްގައި ކަރަންޓުގެ ޚިދުމަތް ކެނޑިފައިވާ ރައްޔިތުންގެ ޢަދަދު މިލިޔަނަކަށް އަރާއިރު، އޮންޓާރިޔޯގައި އެ ޚިދުމަތް ނުލިބޭ މީހުންގެ ޢަދަދު 110,000 އަށް އަރާ ކަމުގައި އޮފިޝަލުން ވިދާޅުވެއެވެ. ކުއެބެކާއި އޮންޓާނިރޯއަކީ ކެނެޑާގެ އާބާދީ އެންމެ ބޮޑު ދެ ރަށެވެ. އެ ސަރަޙައްދުގައި 39 މިލިޔަން މީހުން ދިރިއުޅެއެވެ. އެއީ، ކެނެޑާގެ އާބާދީގެ ދެބައިކުޅަ އެއްބައެވެ.
ކުއެބެކްގައި އެކަކު މަރުވީ ވައިބާރުވެ ވެއްޓުނު ގަހެއްގެ ދަށުވެގެންނެވެ. މަރުވެފައިވާ ދެވަނަ މީހަކީ އޮންޓާރިޔޯގެ ރައްޔިތެކެވެ. އޭނާ ވެސް މަރުވީ ގަހަކުން ވެއްޓުނު ގޮފިގަނޑަކުން ޖެހިގެންނެވެ. ފިނީގެ ތޫފާނާ އެކު ގަސްތައް ވެއްޓުން އިތުރުވެފައިވާއިރު، މި ކަމަށް ސަމާލުވުމަށް އޮފިޝަލުން ވަނީ ކުއެބެކާއި އޮންޓާރިޔޯގެ ރައްޔިތުންނަށް އިލްތިމާސްކޮށްފައެވެ.
ކަރަންޓުގެ ޚިދުމަތް މެދުކެނޑިފައިވާ ސަރަޙައްދުތަކަށް އެ ޚިދުމަތް އަލުން ގުޅައިދިނުމަށް، އެ ޚިދުމަތް ފޯރުކޮށްދޭ ކުންފުނިތަކުން ދަނީ މަސައްކަތް ކުރަމުންނެވެ. ނަމަވެސް، ގެއްލުންލިބިފައިވާ ވަސީލަތްތައް މަރާމާތުކޮށް ބައެއް ސަރަޙައްދުތަކަށް އަލުން ޚިދުމަތް ގުޅައިދިނުމަށް ގިނަ ދުވަސްތަކެއް ހޭދަވެދާނެ ކަމުގައި އޮފިޝަލުން ވިދާޅުވެއެވެ.
"މިއީ ވަރަށް ދަތި ވަގުތުކޮޅެއް. ގިނަ ބަޔަކު ވަނީ ކަރަންޓުގެ ޚިދުމަތުން މަހުރޫމްވެފައި. ގަދަ ވަޔާއެކު ގަސްތައް ވެއްޓެނީ. ޢިމާރާތްތަކާއި އެއްގަމު އުޅަނދުފަހަރަށް ވަނީ ގެއްލުން ލިބިފައި. މިއީ ކަންބޮޑުވާ މައްސަލައެއް،" ކެނެޑާގެ ބޮޑުވަޒީރު ޖަސްޓިން ޓްރިޑޯ ވިދާޅުވިއެވެ. އޭނާވަނީ، ހާލުގައި ޖެހިފައިވާ މީހުންނަށް ސަރުކާރުން އެހީތެރިކަން ފޯރުކޮށްދޭނެ ކަމުގައި ވެސް ވިދާޅުވެފައެވެ.
ކުއެބެކްގައި ކަރަންޓުގެ ޚިދުމަތް ފޯރުކޮށްދޭ ހައިޑްރޯ-ކުއެބެކް ކުންފުނިން ބުނީ، ކަރަންޓުގެ ޚިދުމަތް ކެނޑިފައިވާ މީހުންގެ 70 އިންސައްތަ މީހުންނަށް އެ ޚިދުމަތް އަލުން ގުޅައިދިނުމަށް މަސައްކަތް ކުރަމުންދާ ކަމަށާއި، ދެން ތިބި މީހުން ޚިދުމަތް ގުޅައިދިނުމަށް ދަތިތަކެއް ކުރިމަތިވެފައިވާ ކަމުގައެވެ. އަދި، ކުރިއަށް އޮތީ ހަފުތާ ބަންދު ކަމަށް ވުމާ އެކު މަސައްކަތްތަކަށް ހުރަސްއެޅިފައިވާ ކަމުގައި ވެސް އެ ކުންފުނިން ބުންޏެވެ.
ކުއެބެކާއި އޮންޓާރިޔޯގެ އިތުރުން އޮޓަވާއަށް ވެސް ވަނީ ފިނީގެ ތޫފާނުގެ އަސަރުކޮށްފައެވެ. އަދި، އެ ރަށުގެ ވެސް ބޮޑު ސަރަޙައްދަކުން ކަރަންޓުގެ ޚިދުމަތް މެދުކެނޑިފައިވާއިރު، ޚިދުމަތް ކެނޑުނު 65,000 އަށްވުރެ ގިނަ މީހުންނަށް މިހާރު ޚިދުމަތް އަލުން ގުޅައިދީފައިވާ ކަމުގައި އޮޓަވާގެ އޮފިޝަލުން ވިދާޅުވެއެވެ.