މިއަހަރުގެ ޖެނުއަރީމަހު ރާއްޖެއަށް 108,000 އަށްވުރެ ގިނަ ފަތުރުވެރިން ޒިޔާރަތްކޮށްފިއެވެ. މިއީ މިދިޔަ އަހަރުގެ ޖެނުއަރީ މަހާ އަޅާބަލާއިރު 11.7 އިންސައްތަ އިތުރު އަދަދެކެވެ.
ޓޫރިޒަމް މިނިސްޓްރީން އާއްމުކުރައްވާފައިވާ ތަފާސް ހިސާބުތައް ދައްކާގޮތުން ޖެނުއަރީމަހު ދުނިޔޭގެ ހުރިހާ ސަރަޙައްދަކުންވެސް ރާއްޖެއަށް ޒިޔާރަތްކުރި ފަތުރުވެރިންގެ އަދަދަށް ބޮޑު ކުރިއެރުމެއް ވަނީ އައިސްފައެވެ. ޖެނުއަރީމަހު ރާއްޖެއަށް އެންމެ ގިނައިން ފަތުރުވެރިން އައިސްފައިވަނީ ޔޫރަޕްގެ ޤައުމުތަކުންނެވެ. އެގޮތުން މިއަހަރުގެ ޖެނުއަރީ މަހު ޔޫރަޕުން، 55،000 އަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވާއިރު މިއީ 2015 ވަނަ އަހަރުގެ ޖެނުއަރީމަހާ އަޅާބަލާއިރު 5.4 އިންސައްތަ އިތުރު އަދަދެކެވެ.
ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރާ ޤައިމުކަމަށްވާ ޗައިނާއިން، މިދިޔަ އަހަރުގެ ފަހުކޮޅުން ފެށިގެން ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ދަށްވެފައި އޮތުމަށްފަހު، ޖެނުއަރީމަހު ޗައިނާއިން ރާއްޖެއަށް ޒިޔާރަތްކުރި ފަތުރުވެރިންގެ އަދަދު ވަނީ އިތުރުވެފައެވެ. ޖެނުއަރީމަހު ޗައިނާއިން 23،000 އަށްވުރެ ގިނަ ފަތުރުވެރިން ޒިޔާރަތްކޮށްފައިވެއެވެ. މިއީ 2015 ވަނަ އަހަރުގެ ޖެނުއަރީމަހާ އަޅާ ބަލާއިރު 13.5 އިންސައްތަ އިތުރު އަދަދެކެވެ.
2015 ވަނަ އަހަރުގެ ނިޔަލަށް ރާއްޖެއަށް ޒިޔާރާތްކޮށްފައިވަނީ 1.2 މިލިއަން ފަތުރުވެރިން، އަދި މިއަހަރުގެ ތެރޭގައި ރާއްޖެއަށް ޒިޔާރަތްކުރާ ފަތުރުވެރިންގެ އަދަދު 1.5 މިއަލިއަނަށް އެރުވުމަކީ ސަރުކާރުގެ އަމާޒެވެ.