ދުނިޔޭގެ ބާޒާރުގައި ތަކެތީގެ އަގުތައް އުފުލިގެން ދިޔަނަމަވެސް ސަރަހައްދީ އެހެން ޤައުމުތަކާއި އަޅާބަލާއިރު އެކަމުގެ އަސަރު ރާއްޖެއަށް ކުރަނީ ކުޑަކޮށްކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.
ފިނޭންސް މިނިސްޓަރ އަމީރު މިހެން ވިދާޅުވީ، ދުނިޔޭގެ ބާޒާރަށް އަންނަ ލޮޅުންތަކާއެކު ރާއްޖޭގައިވެސް އިންފްލޭޝަން ނުވަތަ ތަކެތީގެ އަގު އުފުލޭ މިންވަރު މައްޗަށް ދިއުމުގެ ފުރުސަތު އޮތްކަމަށް ވޯލްޑް ބެންކުން ބުނެފައިވާ ދަނޑިވަޅެއްގައެވެ.
ރާއްޖޭގެ އިޤްތިޞާދީ ހާލަތާއި ގުޅޭގޮތުން ފިނޭންސް މިނިސްޓަރ ވިދާޅުވީ މި އަހަރުގެ މިހާތަނަށް ފަތުރުވެރިން ޒިޔާރަތްކުރި މިންވަރު ވަނީ 2022 ވަނަ އަހަރާ އަޅާބަލާއިރު 21.5 އިންސައްތަ އިތުރުވެފައިކަމަށެވެ. އަދި މި އަހަރު ރާއްޖެއަށް ރެކޯޑު މިންވަރަކަށް ފަތުރުވެރިން ޒިޔާރަތްކުރާނެކަމަށް ލަފާކުރެވޭއިރު އިގުތިސާދީ ކުރިއެރުން މިހާރުގެ އަންދާޒާތަކަށްވުރެ މަތިވާނެކަމަށް ފިނޭންސް މިނިސްޓަރ ވިދާޅުވިއެވެ.
ވޯލްޑް ބޭންކުން އެންމެފަހުން ނެރުނު ރިޕޯޓްގައި ރާއްޖޭގެ އިޤްތިސާދު ކުރިއަރާނެކަމަށް ލަފާކުރި މިންވަރު ދަށްވާނެކަމަށް ވަނީ ބުނެފައެވެ. މިނިސްޓަރ އަމީރު ވިދާޅުވީ ރާއްޖޭގެ އިޤްތިޞާދީ ދުވެލި އަންދާޒާ ކުރިވަރަށްވުރެ ދަށްވާނެކަމަށް ލަފާކޮށްފައިވަނީ، 2021 ވަނަ އަހަރުގެ ޤައުމީ އުފެއްދުންތެރިކަން ކުރިއެރި މިންވަރު \އަންދާޒާކުރި މިންވަރަށްވުރެ މަތިވެފައިވާތީ، ހިސާބުކުރުމުގައި އަންނަ ބޭސް އިފެކްޓް އާ ގުޅިގެންކަމަށެވެ.
ފިނޭންސް މިނިސްޓަރ ވިދާޅުވީ މިއީ ދުނިޔޭގެ ބާޒާރުގައި ތަކެތީގެ އަގުތައް އުފުލިފައި ހުރި ދަނޑިވަޅަކަށްވީނަމަވެސް، ރާއްޖެއަށް މިކަމުގެ އަސަރު ކުރަމުންދާ މިންވަރު އަވައްޓެރި ގިނަ ގައުމުތަކާ އަޅާބަލާއިރު ކުޑަކަމަށެވެ. އަދި ރާއްޖޭގައި އިންފްލޭޝަން މަތިވާ މިންވަރު ހިފެހެއްޓިފައި ހުރީ ސަރުކާރުން ތެޔޮ، ކަރަންޓު އަދި ކާޑުގެ އަގު ހެޔޮކުރަން ދެމުންދާ ސަބްސިޑީގެ ސަބަބުންކަން މިނިސްޓަރ ފާހަގަކުރެއްވިއެވެ. ނަމަވެސް ދުނިޔޭގެ ބާޒާރުގެ ތަކެތީގެ އަގުތައް އުފުލުމާއެކު ސަބްސިޑީތަކަށް ކުރާ ހޭދަ ވަނީ ވަރަށް ބޮޑަށް އިތުރުވެފައިކަމަށްވެސް މިނިސްޓަރ ވިދާޅުވިއެވެ.
މި އަހަރުގެ މިހާތަނަށް ފަތުރުވެރިން ޒިޔާރަތްކުރި މިންވަރު ވަނީ 2022 ވަނަ އަހަރާ އަޅާބަލާއިރު 21.5 އިންސައްތަ އިތުރުވެފަ. ލަފާކުރެވެނީ މި އަހަރު ރެކޯޑު މިންވަރަކަށް ފަތުރުވެރިން ރާއްޖެ ޒިޔާރަތްކުރާނެކަމަށް. ވީމާ އިގުތިސާދީ ކުރިއެރުން މިހާރުގެ އަންދާޒާތަކަށްވުރެ މަތިވާނެ. (6/1)
— Ibrahim Ameer (@iameeru) April 5, 2023
ތަކެތީގެ އަގުތައް އުފުލުމާ ގުޅިގެންނާއި އަދި އެ ނޫނަސް ކުރިމަތިވާ މާލީ ހިރާސްތައް މެނޭޖްކުރުމަށް އަޅަންޖެހޭ ފިޔަވަޅުތައް ސަރުކާރުން އަޅަމުންދާކަމަށް މިނިސްޓަރ ވިދާޅުވިއެވެ. އަދި ކޮވިޑްގެ ހާލަތާއި ގުޅިގެން އިތުރުވި ދަރަނި މެދުރާސްތާގައި ދާނީ ދަށަށްކަމަށްވެސް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ އިޤްތިޞާދީ ކުރިއެރުމަށް ސިޔާސަތުތަކަށް ބަދަލު ގެންނާނީ ރައްޔިތުންނަށް އެކަންކަމުގެ އަސަރު އެންމެ ކުޑަ ވާނެގޮތަށްކަމަށެވެ.
ދައުލަތުގެ އާމްދަނީ އިތުރުކޮށް، އިޤްތިޞާދު ކުރިއެރުވުމަށް ސަރުކާރުން ގިނަ ފިޔަވަޅުތަކެއް ދަނީ އަޅަމުންނެވެ. އެގޮތުން މިއަހަރުން ފެށިގެން ރާއްޖޭގައި ނަގަމުން އަންނަ ބައެއް ޓެކްސްތައް ބޮޑުކޮށްފައިވާއިރު ބައިނަލްއަޤްވާމީ މާލީ އިދާރާތަކުން ވަނީ އެކަމަށް މަރުހަބާ ކިޔާފައެވެ. ޓެކްސް ރޭޓަށް ބަދަލު ގެނައުމުގެ އިތުރުން ހިންގުމުގެ ނިޒާމަށް ގެންނަ ބަދަލުތަކުގެ ތެރެއިންވެސް ދައުލަތުގެ ހަރަދުތައް ކުޑަކޮށް، އާމްދަނީ އިތުރުކުރެވޭނެ ގޮތްތައް ސަރުކާރުން ދަނީ ހޯދަމުންނެވެ.