ވ. އާރަށުގެ މައްސަލައިގައި ކުރީގެ ރައީސް އަބްދުﷲ ޔާމީންގެ މައްޗަށް އިއްވާފައިވާ ހުކުމްގެ އިސްތިއުނާފް ހައިކޯޓުން ބަލައިގެންފިއެވެ.
ވ. އާރަށުގެ މައްސަލައިގައި ރައީސް ޔާމީންގެ މައްޗަށް ވަނީ ރިިޝްވަތު ގަބޫލުކުރުމާއި މަނީ ލޯންޑަރިންގ ދައުވާ ސާބިތުވެ، 11 އަހަރަށް ޖަލަށްލުމާއެކު 5 މިލިއަން ޑޮލަރުން ޖޫރިމަނާކުރުމަށް ހުކުމްކުރީ މިދިޔަ ޑިސެމްބަރުމަހުގެ 25 ވަނަ ދުވަހުއެވެ.
މި މައްސަލަ ޔާމީންގެ ފަރާތުން ކޯޓުގައި އިސްތިއުނާފްކުރީ ފެބްރުއަރީމަހުގެ 21 ވަނަ ދުވަހުއެވެ. ނަމަވެސް މައްސަލައިގައި ހުރި ބައެއް ކަންކަން އިސްލާހުކުރުމަށް އެންގުމުން، އެކަންކަން އިސްލާހުކުރުމަށްފަހު މިދިޔަމަހުގެ ތެރޭގައި މައްސަލަ ވަނީ އަލުން ހައިކޯޓަށް ހުށަހަޅާފައެވެ.
ހައިކޯޓުން މިއަދު ވިދާޅުވީ ޔާމީންގެ ފަރާތުން ހުށަހަޅާފައިވާ އިސްތިއުނާފްގެ މައްސަލަ އެކޯޓުގައި ރަޖިސްްޓްރީކޮށްފައިވާކަމަށެވެ. ނަމަވެސް މައްސަލައިގެ އަޑުއެހުންތައް ފަށާނެ ދުވަހެއް ހާމައެއް ނުކުރެއެވެ.
ވ. އާރަށުގެ މައްސަލައިގައި ކުރީގެ ރައީސް އަބްދުﷲ ޔާމީންގެ އިތުރުން، ރައްޔިތުންގެ މަޖިލީހުގެ ކުރީގެ މެންބަރު ޔޫސުފް ނައީމުގެ މައްޗަށްވެސް ވަނީ ކުށް ސާބިތުވެ، 3 އަހަރާއި 2 މަހާއި 12 ދުވަހަށް ޖަލަށްލުމަށް ހުކުމްކޮށްފައެވެ.