މިދިޔަ ބުރާސްފަތިދުވަހުގެ ރޭ މާލޭގެ ބޮޑުސަރަހައްދަކުން ކަރަންޓް ކެނޑެން ދިމާވީ ކޭބަލަކަށް ދިމާވި ކަމެއްގެ ސަބަބުން ކަމަށްވާތީ އެ ކޭބަލް މަރާމާތުކުރުމުގެ މަސައްކަތް ސްޓެލްކޯއިން ފަށައިފިއެވެ.
ސްޓެލްކޯއިން ބުނީ ކަރަންޓް ކެނޑުނު ދުވަހު ގެއްލުން ލިބުނު ކޭބަލަކީ 11000 ވޯޓްގެ ކޭބަލެއްކަމަށެވެ.
ބުރާސްފަތިދުވަހުގެ ރޭ މާލޭގެ ބޮޑުސަރަޙައްދަކުން ކަރަންޓްކެނޑެންދިމާވީ މާލޭގެ ޑިސްޓްރިބިއުޝަން ކޭބަލެއް ހަލާކުވެގެންކަމަށާއި، ކޭބަލު މަރާމާތުކުރުމުގެ މަސައްކަތް ފަށާފައިވާކަމަށް ސްޓެލްކޯއިން މައުލޫމާތުދެއެވެ. ކޭބަލަށް ގެއްލުންވީ މަގުކޮނުމުގެ މަސައްކަތްކުރާ ފަރާތްތަކުން އެކަށީގެންވާ ވަރަށް ސަމާލުކަންނުދީ މަސައްކަތްކުރުމުން ކޭބަލަށް ގެއްލުން ލިބިގެންކަމަށް ބެލެވޭކާމަށް ސްޓެލްކޯއިން ބުނެއެވެ. ސްޓެލްކޯގެ ސީނިއަރ އިންޖިނިއަރ އިބްރާހީމް ރައޫފް ވިދާޅުވީ ހަލާކުވި ކޭބަލަކީ ޑިސްޓްރިބިއުޝަން ނެޓްވޯކްގައި ބޭނުންކުރާ 11000 ވޯޓް ކަރަންޓްދީފައިވާ ކޭބަލެއްކަމަށެވެ.
ރައޫފް ވިދާޅުވީ ކޭބަލުން 500 މީޓަރު އަލުން ބަދަލުކުރަންޖެހޭކަމަށެވެ. މަގުމަތި ކޮނުމުގައި މިފަދަ ކޭބަލަށް ގެއްލުންލިބޭގޮތްވުމަކީ މީހެއްގެ ފުރާނައަށްވެސް ނުރައްކާވެދާނެ ފަދަ ކަމަކަށްވާތީ މަގުމަތި ކޮނުމުގެ ކުރިން ސްޓެލްކޯއަށް އެކަން އެންގުމަށް ސްޓެލްކޯއިން އިލްތިމާސްކުރެއެވެ.
ސްޓެލްކޯއިން ބުނީ މިކޭބަލް އަލުން ބަދަލުކުރުމަށް 1.3 މިލިޔަން ރުފިޔާވަރު ޚަރަދުވާނެކަމަށެވެ. މީގެ އިތުރުން މިދުވަސްވަރަކީ ހޫނުގަދަ ދުވަސްވަރެއްކަމުން، ގިނައިން ކަރަންޓް ބޭނުންކުރަމުންދާނެތީ، އިންޖީނުތަކަށް ލޯޑްބޮޑުވާނެކަމަށާއި އެހެންކަމުން ހޭވީލޯޑް ނަގާ ތަކެތި ޕީކްލޯޑްގަޑީގައި ވީވަރަކުން މަދުން ބޭނުންކުރުމަށް ސްޓެލްކޯއިން އިލްތިމާސްކުރެއެވެ.